سەميناردىڭ ماقساتى – ۇلتتىق جانە جالپىادامزاتتىق قۇندىلىقتارعا نەگىزدەلگەن ء«بىرتۇتاس تاربيە» باعدارلاماسىن ەنگىزۋ ارقىلى تۇلعانىڭ جان-جاقتى دامۋىنا جاعداي جاساۋ, قۇندىلىقتاردى وقىتۋ جانە تاربيە پروتسەسىنە كىرىكتىرۋ بويىنشا ۇزدىك تاجىريبەلەردى تاراتۋ.
شارا بارىسىندا №90 مەكتەپتىڭ ۇلتتىق ءداستۇردى جاڭعىرتۋعا بايلانىستى زامانمەن ۇيلەسىم تاپقان سالت-ءداستۇر ۇلگىلەرى, مەكتەپ وقۋشىلارى, مۇعالىمدەرى جاساعان ونەر تۋىندىلارى, ءبىلىم بەرۋ جۇيەسىنە يكەمدەلگەن ۇلتتىق ويىندار, تانىمدىق شارالار ۇيىمداستىرىلدى.
سەمينارعا قر وقۋ-اعارتۋ مينيسترلىگىنىڭ, ى. التىنسارين اتىنداعى ۇلتتىق ءبىلىم اكادەمياسىنىڭ وكىلدەرى, وبلىستاردىڭ, استانا, الماتى جانە شىمكەنت قالالارىنىڭ ادىستەمەلىك ورتالىقتارى باسشىلارىنىڭ ورىنباسارلارى, ادىسكەرلەرى, مەملەكەتتىك جانە جەكە مەنشىك ءبىلىم بەرۋ ۇيىمدارىنىڭ باسشىلارى, باسشى ورىنباسارلارى قاتىستى.
كەلەلى كەڭەستە كىرىسپە ءسوز سويلەگەن استانا قالاسى اكىمدىگىنىڭ «ادىستەمەلىك ورتالىعى» باسشىسى سىندار داۋەشوۆا ء«بىرتۇتاس تاربيە» باعدارلاماسىن جۇزەگە اسىرۋداعى ەلوردالىق پەداگوگتەردىڭ وزىق تاجىريبەلەرىن وڭىرلەردەن كەلگەن ارىپتەستەرىنە پاش ەتىپ, ورتاق ماقساتا جۇمىلا ەڭبەك ەتسە عانا ناتيجە بولاتىنىنا توقتالىپ, بۇگىنگى شارانىڭ باستى مىندەتى وسى ەكەندىگىنە نازار اۋداردى.
ى.التىنسارين اتىنداعى ۇلتتىق ءبىلىم اكادەمياسىنىڭ ۆيتسە-پرەزيدەنتى انار تاڭىربەرگەنوۆا ء«بىرتۇتاس تاربيە باعدارلاماسى: بالا تاربيەسىنە نە بەرەدى؟» تاقىرىبىندا جان-جاقتى سارالاۋ جاساپ, ۇلتىق يدەيا, مەملەكەتشىلدىك, وتانشىلدىق, تاۋەلسىزدىك تاقىرىپتارىنا كەڭىنەن توقتالىپ, ءبىلىم بەرۋ ۇيىمدارى وقۋشىلاردىڭ بويىنا دارىتۋى ءتيىس قۇندىلىقتاردىڭ ماڭىزدىلىعىن ايقىنداپ بەردى. باعدارلاما ەنگىزىلگەلى بەرى اتقارىلعان جۇمىستاردىڭ ناتيجەسىنە ناقتى دەرەكتەر كەلتىردى. بارلىق ءبىلىم بەرۋ ۇيىمدارى اتالعان باعدارلامامەن تولىق تانىسىپ, تەورياسىن مەڭگەرىپ العاندىقتان, الداعى ۋاقىتتا ءىس جۇزىندە ءار وڭىردە رەسپۋبليكالىق تاجىريبە الماسۋ شارالارى وتەتىنىن تىلگە تيەك ەتتى.
سەمينار جۇمىسى اياسىندا پەداگوگيكالىق حاكاتون, «ۇلتتىق قاسيەتتەر مەن قوعامدىق وركەنيەت ۇيلەسىمى», «قۇندىلىقپەن بىرگە: قيىندىق, كوزقاراس, وزگەرىس», «وقۋشىلاردىڭ جان-جاقتى دامۋى: تاربيە مەن ءبىلىمنىڭ ۇيلەسىمدىلىگى», «قۇندىلىقتاردى وقىتۋ پروتسەسىنە كىرىكتىرۋ: تاجىريبە جانە تاسىلدەر», «اتا-انا جانە بالا: ۇيلەسىمدى قارىم-قاتىناسقا قول جەتكىزۋ جولدارى», «تاربيە مەن وقىتۋدا قۇندىلىقتار جۇيەسىن قالىپتاستىرۋدىڭ ۇزدىك تاجىريبەلەرى» تاقىرىپتارىندا تاجىريبەلىك الاڭدار جۇمىسى ۇيىمداستىرىلدى.
شاراعا قاتىسۋشىلار ەلوردالىق ءبىلىم بەرۋ ۇيىمدارىندا ء«بىرتۇتاس تاربيە» باعدارلاماسىن جۇزەگە اسىرۋ بارىسىندا اتقارىلىپ جاتقان جۇمىستاردىڭ جاڭاشىلدىعىنا توقتالىپ, ۇلگى الاتىن تۇستارى مول ەكەنىن العا تارتتى.
شارانىڭ ەكىنشى كەزەڭىندە ايماقتاردان كەلگەن ۇستازدار, №8,87,37,90,91, 76 ءبىلىم بەرۋ ۇيىمدارىنىڭ تاجىريبەلەرىن كورىپ, ءوزارا پىكىر الماستى.
