فوتو: اشىق دەرەككوز
اقش پرەزيدەنتى دونالد ترامپ عىلىمي زەرتتەۋ جۇمىستارىنا فەدەرالدى گرانتتار مەن نەسيەلەردى ءبولۋدى توقتاتا تۇرۋ تۋرالى ءبىرسىپىرا بۇيرىق شىعارعاننان كەيىن امەريكالىق عىلىمي قاۋىمداستىق تۇيىققا تىرەلدى.
ۆاشينگتونداعى فەدەرالدى سوت پرەزيدەنت جارلىعىنىڭ ورىندالۋىنا ۋاقىتشا توسقاۋىل قويعانىمەن, كوپتەگەن ۋنيۆەرسيتەتتەر ءوز قىزمەتكەرلەرىنە عىلىمي زەرتتەۋلەرگە, ونىڭ جابدىقتارىنا كەتەتىن شىعىنداردى توقتاتا تۇرۋدى ۇسىندى.
ايتا كەتەيىك, بۇعان دەيىن اقش پرەزيدەنتىنىڭ اكىمشىلىگى عىلىمي زەرتتەۋلەرگە فەدەرالدى كومەك باعدارلامالارىن ۋاقىتشا توقتاتۋ كەرەك دەگەن مەموراندۋمدى جاريالاعان بولاتىن.
الايدا ناقتى قانداي سالاداعى عىلىمي زەرتتەۋلەردى قارجىلاندىرۋ توقتاتىلعانى تۇسىندىرىلگەن جوق. عالىمداردىڭ جۇمىسىن كىدىرتىپ, باسىن قاتىرعان ساۋال – وسى.
ساراپشىلار ۇكىمەت جارلىعى قاراستىرىلىپ جاتقاندا, ولاردىڭ بۇل شەشىمى عىلىمي ورتادا ۇلكەن ءدۇمپۋ تۋعىزاتىنىن ەسكەرتكەن ەدى.
بۇل رەتتە زاڭگەرلەر عىلىمدى قارجىلاندىرۋدى ۋاقىتشا بولسىن توقتاتۋ پرەزيدەنت وكىلەتىنىڭ شەڭبەرىنەن تىس ارەكەت ەكەنىن ايتادى. ولار ترامپتىڭ بۇل شاراسىن انىق شەكتەن شىعۋ دەپ باعالاپ, قاراجاتتىڭ جۇمسالۋىن باقىلاۋ جۇمىسى كونگرەسكە تيەسىلى ەكەنىن العا تارتىپ وتىر.
ازىرگە اقش بيلىگى عىلىمدى قارجىلاندىرۋ نە سەبەپتەن توقتاپ تۇرعانىن رەسمي مالىمدەگەن جوق.
