سۋرەت: jjtv.kz
11 اقپان – يراننىڭ ۇلتتىق كۇنى. بيىل يران يسلام توڭكەرىسىنىڭ ورناعانىنا 46 جىل تولىپ وتىر. وسى مەرەكە قارساڭىندا يراندىق ەلشى استانادا باق وكىلدەرىن جيناپ, ەكى مەملەكەت اراسىنداعى ساۋدا-ەكونوميكالىق, ساياسي, مادەني جانە تۋريستىك بايلانىستار, سونداي-اق يراننىڭ بۇگىنگى جەتىستىكتەرى جايىندا ايتىپ بەردى.
«وسىدان 46 جىل بۇرىن ءبىزدىڭ ەلىمىزدە كوپ عاسىرعا سوزىلعان پاتشالىق جۇيە كۇيرەپ, ونىڭ ورنىنا زاماناۋي رەسپۋبليكا ومىرگە كەلدى. سونىڭ ارقاسىندا قوعامدا ساياسي دەڭگەيدە دەموكراتيا مەن ءدىني-مادەني قۇندىلىقتارعا ءمان بەرەتىن جاڭا ديالوگ پايدا بولدى. ول ۋاقىتتا الەم ەكى ۇلكەن بلوكقا ءبولىنىپ تۇرعان: ءبىرى – اقش باستاعان كاپيتاليستىك باتىس, ەكىنشىسى – كەڭەس وداعى باستاعان سوتسياليستىك شىعىس بلوگى. يران يسلام توڭكەرىسىنىڭ باستى ۇراندارىنىڭ ءبىرى – باتىسقا دا, شىعىسقا دا مويىن بۇرماي, ءوز جولىن تاڭداۋ ەدى. ءبىز حالقىمىزدىڭ ءداستۇرى مەن مادەنيەتىنە ساي جولىمىزدى تابۋ ارقىلى بارلىق سالادا ۇلكەن جەتىستىككە جەتتىك», دەپ اتاپ ءوتتى ءا.دجوۋكار.
ونىڭ ايتۋىنشا, قازاقستان مەن يران اراسىنداعى قارىم-قاتىناس ءوزارا دوستىق پەن ىنتىماقتاستىقتىڭ تەڭدەسسىز ۇلگىسى سانالادى. سونىڭ ىشىندە بىلتىرعى ايقىن تابىستىڭ ءبىرى – شانحاي ىنتىماقتاستىق ۇيىمىنا قازاقستاننىڭ توراعالىعى كەزىندە ءارى ونىڭ تىكەلەي قولداۋىمەن يراننىڭ وسى ۇيىمعا مۇشە بولىپ قابىلدانۋى.
«بۇل وقيعا ءبىزدىڭ ەكىجاقتى قارىم-قاتىناسىمىزدى ودان سايىن جاقىنداتا تۇسەرىنە سەنىم مول. بىلتىر قازاقستاندا ۇيىمداستىرىلعان شىۇ-نىڭ بارلىق جيىنىنا يراننىڭ لاۋازىمدى تۇلعالارى دا قاتىسىپ, ساۋدا-ەكونوميكالىق بايلانىستارىمىزدى ارتتىرۋعا باعىتتالعان ىستەردى بىرلەسىپ تالقىلادى», دەدى ول.
ءالي اكبار مىرزا وتكەن جىلى يراننىڭ ەۋرازيالىق ەكونوميكالىق وداققا باقىلاۋشى رەتىندە قوسىلعانىن ءارى وداق ەلدەرىمەن ەركىن ساۋدا اينالىمى كەلىسىمدەرىن جاساۋىن دا باستى جەتىستىكتىڭ ءبىرى رەتىندە اتادى. ونىڭ ايتۋىنشا, بۇل شەشىمنىڭ قابىلدانۋىنا دا قازاقستان تاراپىنىڭ ىقپالى از بولماعان.
«قازىرگى تاڭدا قازاقستان مەن يران قارىم-قاتىناسى ۇلكەن الەۋەتكە يە. وكىنىشكە قاراي, ءبىز سول الەۋەتتى ەڭ تومەنگى دەڭگەيدە پايدالانىپ كەلەمىز. دەگەنمەن الداعى ۋاقىتتا قارىم-قاتىناسىمىز ارتىپ, جاڭا دەڭگەيگە كوتەرىلەمىز دەگەن ءۇمىت زور. ويتكەنى ەكى ەل اراسىندا ءتۇرلى جوبالار, سونىڭ ىشىندە لوگيستيكا سالاسىندا قولعا العان ىستەر بار. اتاپ ايتقاندا, يران-تۇرىكمەنستان-قازاقستان-وزبەكستان, يران-تۇرىكمەنستان-قازاقستان-قىتاي باعىتتارىندا كولىك دالىزدەرىن جەتىلدىرۋ جوسپاردا تۇر. بۇل جۇمىستىڭ ءبارى ساۋدا-ەكونوميكالىق بايلانىستارمەن قاتار, تۋريستىك ىنتىماقتاستىعىمىزدى دا ارتتىرادى دەپ سەنەمىز», دەدى ەلشى.
ونىڭ ايتۋىنشا, ازىرگە قازاقستان مەن يران اراسىندا تۋريزم بايلانىسى تومەن دەڭگەيدە قالىپ وتىر. بۇعان دەيىن بۇل سالادا ايتارلىقتاي جەتىستىك بولادى دەپ كۇتكەنىمەن, بۇگىنگى ناتيجە كوڭىل كونشىتپەيدى. ەلشى يران تۋريستەرىنىڭ قازاقستاننان گورى ورتالىق ازيانىڭ كەيبىر ەلدەرىنە كوبىرەك باراتىنىن, سونداي-اق يرانعا قازاقتارعا قاراعاندا ەۋروپالىق جانە امەريكالىق ساياحاتشىلار كوبىرەك كەلەتىنىن ايتتى.
ء«بىز تۋريزم سالاسىنداعى بارىس-كەلىستى ارتتىرۋ ءۇشىن بۇقارالىق اقپارات قۇرالدارى وكىلدەرىنە كوپ ءۇمىت ارتامىز. ەگەر سىزدەر ەكى ەلدەگى تۋريستىك مۇمكىندىكتەردى كوبىرەك ناسيحاتتاپ, ۇلەس قوسساڭىزدار, ايتارلىقتاي جەتىستىك بولارىنا ءشۇبا جوق. ءبىز ءبىر-بىرىمىزگە كومەك كورسەتۋىمىز كەرەك. مەن يراندى قازاق ساياحاتشىلارى ءۇشىن ەڭ ءتيىمدى ءارى ارزان تۋريستىك باعىتتىڭ ءبىرى دەپ ەسەپتەيمىن. ءبىزدىڭ ەلدە تاماشالاۋعا بولاتىن تاريحي ورىندار دا جەتەرلىك, ەكوتۋريزم دە جاقسى دامىعان, سونداي-اق مەديتسينالىق تۋريزم سۇرانىسقا يە», دەپ اتاپ ءوتتى ءا.دجوۋكار.
