ويىن بيزنەسى – جوعارى تابىس اكەلەتىن سەكتورلاردىڭ ءبىرى. اسىرەسە, كازينو, ونلاين-كازينو, بۋكمەكەرلىك كەڭسەلەر سياقتى باعىتتار ەل ەكونوميكاسىنا ەلەۋلى كىرىس اكەلەدى. الايدا لۋدومانيا الەۋمەتتىك ماسەلەلەردى دە قوسا ورشىتەدى, اشىعىن ايتقاندا, قۇمار ويىندارعا تاۋەلدىلىك ادامنىڭ وزىمەن قوسا, ونىڭ وتباسىنا ۇلكەن ماشاقات الىپ كەلەدى. سول سەبەپتى ەكونوميست باۋىرجان ىسقاق ويىن بيزنەسىنە قوسىلعان قۇن سالىعىن (ققس) ەنگىزۋدى ابدەن ورىندى دەپ ەسەپتەيدى.
«ققس ەنگىزۋدىڭ بىرنەشە ارتىقشىلىعى بار. بىرىنشىدەن, بۇل مەملەكەتكە قوسىمشا تابىس كوزى بولادى. ويىن بيزنەسى – ءىرى اقشا اينالىمى بار سالا بولعاندىقتان, وعان سالىق سالۋ بيۋدجەتتىڭ كىرىس بولىگىن تولىقتىرۋعا كومەكتەسەدى.
ەكىنشىدەن, ققس ەنگىزۋ ارقىلى ويىن بيزنەسىن زاڭدى تۇردە رەتتەۋگە جانە باقىلاۋدى كۇشەيتۋگە مۇمكىندىك تۋادى. ياعني, رەسمي ەسەپتىلىك جۇرگىزىلىپ, سالاداعى ناقتى تابىستار اشىق كورىنەدى. ۇشىنشىدەن, وسى سالىقتان تۇسكەن قارجىنى قۇمار ويىندارمەن كۇرەسكە جانە الەۋمەتتىك باعدارلامالارعا باعىتتاۋعا بولادى», دەيدى ساراپشى.
سونىمەن قاتار ول ققس ەنگىزۋدىڭ بەلگىلى قيىندىقتارى دا بارىن اتاپ ءوتتى.
«بۇل سالىقتىڭ ەنگىزىلۋى ويىن بيزنەسى سۋبەكتىلەرىنىڭ شىعىندارىن ارتتىرادى. ناتيجەسىندە ولاردىڭ قىزمەت كورسەتۋ قۇنى دا ءوسۋى مۇمكىن. سونىمەن قاتار, بۇل سالاعا سالىناتىن ينۆەستيتسيالاردىڭ ازايۋىنا اسەر ەتۋى ىقتيمال. ەكىنشى ماسەلە – زاڭدى رەتتەۋدىڭ كۇشەيۋى كولەڭكەلى نارىقتىڭ پايدا بولۋىنا اكەلۋى مۇمكىن. سەبەبى كەيبىر وپەراتورلار سالىقتىق اۋىرتپالىقتان قاشىپ, زاڭسىز جۇمىس ىستەۋگە ۇمتىلادى», دەيدى ب. ىسقاق.
ەل ەكونوميكاسىنا ءتيىمدى بولۋ ماقساتىندا ويىن بيزنەسىنە سالىناتىن سالىقتىڭ ورتاشا پايىزدىق مولشەرى قانشا بولۋ كەرەكتىگىن سۇراعانىمىزدا ماماننىڭ جاۋابى تومەندەگىدەي بولدى:
«مەنىڭ ويىمشا, ققس مىندەتتى تۇردە ەنگىزىلۋى كەرەك, بىراق ونىڭ مولشەرى شامادان تىس جوعارى بولماۋى ءتيىس. وپتيمالدى ستاۆكا 14–15% دەڭگەيىندە بەلگىلەنسە, بۇل ويىن بيزنەسى سۋبەكتىلەرىنە ايتارلىقتاي سالماق تۇسىرمەي, زاڭسىز نارىققا كەتۋ قاۋپىن ازايتار ەدى. ەڭ باستىسى – سالىقتى ەنگىزۋ ارقىلى بيۋدجەتتى تولىقتىرۋ عانا ەمەس, سالانى رەتتەپ, الەۋمەتتىك ماسەلەلەردىڭ الدىن الۋ ماڭىزدى».
رەسمي مالىمەتكە سۇيەنسەك, كەيىنگى ەكى ايدا ەلدە 800-گە جۋىق جاڭا بۋكمەكەرلىك سايت تىركەلگەن. قۇقىق قورعاۋ ورگاندارى 260 زاڭسىز ورىندى جاپقانىمەن, قۇمار ويىنعا تاۋەلدىلىك ءالى دە وزەكتى ماسەلە بولىپ وتىر.
