سۋرەت: saigez.kz
حالقىمىز «ۇستازى مىقتىنىڭ ۇستانىمى مىقتى» دەپ ايتادى. قازىر قوعامدا مۇعالىمدەردىڭ ەڭبەگى ەرەكشە. اسىرەسە ۇستازداردىڭ ارقاسىندا قانشاما بالا ساپالى ءبىلىم مەن سانالى تاربيە الىپ, تۇلعا بولىپ قالىپتاستى. بۇل تۇتاس قوعامدى ىزگىلەندىرە تۇسەدى. سوندىقتان پەداگوگتەردىڭ ەڭبەگى قانداي قۇرمەتكە دە لايىق.
باسقوسۋ بارىسىندا اۋىل مەكتەبىندەگى ءبىلىمنىڭ وزەكتى ماسەلەلەرى مەن مۇعالىم مارتەبەسى تۋرالى كوبىرەك ءسوز بولدى. ماجىلىستەگى اگرارلىق ماسەلەلەر كوميتەتىنىڭ توراعاسى, «اۋىل» پارتياسىنىڭ باسشىسى سەرىك ەگىزباەۆ سىرشىل اقىن ماعجان جۇماباەۆتىڭ «التى الاشتىڭ بالاسى باس قوسسا, ءتور – مۇعالىمدىكى» دەگەن ءسوزىن مىسالعا كەلتىرىپ, ۇستازداردىڭ ەرەن ەڭبەگى جايىندا سالماقتى وي ءوربىتتى.
سودان كەيىن ورال قالاسىنداعى №34 مەكتەپ-گيمنازياسىنىڭ ورىس ءتىلى مەن ادەبيەتى ءپانىنىڭ مۇعالىمى ەلمارا ترايسوۆا مەملەكەتتىك ءتىلدى ءبىلۋ, دارىپتەۋ تۋرالى وي-پىكىرىن ورتاعا سالسا, سەمەي قالاسىنداعى №7 جالپى ءبىلىم بەرەتىن مەكتەپ-ليتسەيىنىڭ ماتەماتيكا ءپانىنىڭ مۇعالىمى الما شۇكىجانوۆا پەداگوگتەردىڭ قىزمەتى جايىندا ءسوز قوزعادى. ال شىمكەنت قالاسىنداعى №1 مەكتەپ-گيمنازياسىنىڭ بيولوگيا ءپانىنىڭ مۇعالىمى الينا سولوۆەۆا جاستارعا كىتاپ وقۋدىڭ قۇندىلىعى تۋرالى اڭگىمەلەدى. سونداي-اق بىلىكتى ۇستازدار پەداگوگيكا سالاسىنداعى تاجىريبەلەرىمەن ءبولىسىپ, ستۋدەنتتەردىڭ سۇراقتارىنا جاۋاپ بەردى.
جيىن سوڭىندا قازاقستاننىڭ ەڭبەك ەرى ەلمارا ترايسوۆا «اۋىل» پارتياسىنىڭ قاتارىنا قابىلدانىپ, وعان سالتاناتتى تۇردە پارتيالىق بيلەت تابىس ەتىلدى. سونىمەن قاتار مارتەبەلى قوناقتارعا سىي-قۇرمەت كورسەتىلدى.
قايسار قۇسايىن
