«سەيىتجان قاري ەسجان ۇلى» مەشىتىندە وتكەن كونفەرەنتسيادا سەنات دەپۋتاتى نۇرتورە ءجۇسىپ, مەملەكەت جانە قوعام قايراتكەرى شالاتاي مىرزاحمەتوۆ, مادەنيەت جانە اقپارات مينيسترلىگى ءدىن ىستەرى كوميتەتى توراعاسىنىڭ ورىنباسارى ادىلبەك كاكىم ۇلى, قمدب توراعاسى, باس ءمۇفتي ناۋرىزباي قاجى تاعان ۇلى, ءدىنتانۋشى-عالىم الاۋ ادىلباەۆ, اقىن, ادەبيەتشى اباي قالشابەك جانە وزگە دە قوعام بەلسەندىلەرى سۇبەلى ءسوز سويلەپ, تاقىرىپ اياسىندا ۇسىنىس-پىكىرلەرىن ءبىلدىردى.
«ەلىمىزدەگى وتباسىلىق قۇندىلىقتار حالىقتىڭ مادەني جانە الەۋمەتتىك ەرەكشەلىگىنىڭ ماڭىزدى بولىگى ەكەنى اقيقات. وركەندەگەن قوعامنىڭ نەگىزى – ۇلكەنگە قۇرمەت, بولاشاق ۇرپاققا قامقورلىق جانە وتباسىلىق قاتىناستاعى ۇيلەسىم. وتباسى ءداستۇرىن ساقتاۋ, ولاردى جاڭا جاعدايعا بەيىمدەۋ ءۇشىن قازىرگى زامان قيىندىعى مەن قۇبىلعان كەزەڭدەگى احۋالدى ەسكەرۋ ماڭىزدى. ءبىزدىڭ ەلىمىزدەگى وتباسى – ول حالىقتىڭ تاريحى مەن داستۇرىمەن تىعىز بايلانىستا بولا وتىرىپ, دامۋدى جالعاستىراتىن الەۋمەتتىك قۇرىلىمنىڭ ماڭىزدى بولىگى. وتباسى قۇندىلىقتارىندا يسلام اسەرىنىڭ تامىرى تەرەڭ جانە عاسىرلار بويى قوعامدىق قاتىناستاردا وزىندىك ورنى بار. قازاقتىڭ نەكە مەن بالا تاربيەسى جانە ۇلكەنگە قۇرمەتكە قاتىستى كوپتەگەن ءداستۇرلى ادەت-عۇرپى يسلام ىلىمىمەن تىعىز بايلانىستى. سوندىقتان يسلام قاعيدالارى مەن كوشپەلى ءومىر سالتىنداعى وسى قۇندىلىقتار ۇيلەسىم تابا وتىرىپ, قازاق مادەنيەتىنىڭ ەرەكشەلىگىنە بەيىمدەلدى», دەدى سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ.
قمدب توراعاسى ناۋرىزباي قاجى تاعان ۇلى وتباسى وزەكتىلىگىن ەشقاشان جوعالتپايتىن, زامانا تۇرعانشا ومىرشەڭدىگىن جويمايتىن ماڭىزدى ۇعىم ەكەنىن اتاپ ءوتتى.
«الدىمەن وتباسىنىڭ اللا بەرگەن باعا جەتپەس نىعمەت ەكەنىن ەستەن شىعارماعان ءجون. «سەندەر ءۇشىن وزدەرىڭنەن جۇبايلار جاراتىپ, ارالارىڭا سۇيىسپەنشىلىك پەن مەيىرىمدىلىك سالعانى – ونىڭ بەلگىلەرىنىڭ ءبىرى» دەپ قاسيەتتى قۇران كارىمنىڭ «رۋم» سۇرەسىندە باياندالعانداي, ەر مەن ايەلدىڭ نەكە وداعىن وتباسى دەپ اتايمىز. اتالعان ايات وتباسىنىڭ مەيىرىمدىلىك پەن سۇيىسپەنشىلىككە نەگىزدەلگەنىن كورسەتەدى», دەدى باس ءمۇفتي.
