اۋىل بالاسىنىڭ الاڭسىز ءومىرىن ارقاۋ ەتكەن پوۆەستىك شىعارما ادام بويىنداعى ادالدىق, جاناشىرلىق, مەيىرىم سەكىلدى ىزگى قاسيەتتەردى كورسەتۋگە تىرىسادى. باستى كەيىپكەر – ءامىردىڭ بالالىق شاعىن سۋرەتتەۋ ارقىلى اۆتور اۋىل ادامدارىنىڭ كىسىلىك كەلبەتىن, بوز جۋسان بولمىسىن بۇكپەسىز بەرۋگە ۇمتىلادى. سونداي-اق شىعارمادا ادام مەن تابيعات اراسىنداعى ۇزىلمەس ۇندەستىك ءسوز ەتىلەدى.
«بۇگىنگى كۇنى دۇنيەنىڭ ديدارى قۇبىلىپ, ادام بويىنداعى اسىل قاسيەتتەردىڭ ارناسى بۇزىلىپ, جاپپاي وزگەرىسكە ۇشىراپ جاتقانىن بايقاپ كەلەمىز. ونىڭ ىشىندە ۇلت تاربيەسىنىڭ ۇستىنى سانالاتىن وتباسى ينستيتۋتىنىڭ قۇندىلىعى قۇلدىراماسا دا, شاتقاياقتاعانى بەلگىلى. قولىما قالام الىپ, پوۆەستى جازۋعا كىرىسەر الدىندا تۇنىعى لايلانباعان اۋىل ادامدارىنىڭ بەينەسىن بەدەرلەي وتىرىپ وقىرمان ويىنا جىپ-جىلى ساۋلە تۇسىرگىم كەلدى. اكە, انا, بالا اراسىنداعى نازىك, الايدا بەرىك ارا-قاتىناستىڭ ۇيلەسىمدى ۇلگىسىن كورسەتۋدى ماقسات تۇتتىم», دەدى كىتاپ اۆتورى تولەن تىلەۋباي ۇلى.
كىتاپقا «تۇلكىلىتاۋدىڭ اسپانى» پوۆەسىنەن بولەك, شاعىن اڭگىمەلەر دە جيناقتالعان. «اقبوكەن جىلاعان ءتۇن» دەرەكتى-كوركەم اڭگىمەگە قازاقتىڭ باتىر ازاماتى, قورىقشى ەرلان نۇرعاليەۆتىڭ براكونەرلەرمەن ارپالىسى, سونداي-اق وشپەس ەرلىگى نەگىز ەتىپ الىنعان. ال «اق كوگەرشىن», «گۇلسارانىڭ ماحابباتى» اڭگىمەلەرىندە ماحابباتقا ادالدىق پەن البىرت شاقتا ادام ارەكەتىندە كەزدەسەتىن قاتەلىكتەر ءسوز ەتىلەدى.
تانىستىرىلىم بارىسىندا وقىرماندار كىتاپ تۋراسىندا وي-پىكىرىن ءبىلدىرىپ, تولعاندىرعان سۇراقتارىن قويدى. ارتىنشا اۆتور جينالعاندارمەن بىرگە اۆتوگراف سەسسيا وتكىزدى.
