ەرنات سەيىتقازى ۇلى وندىرىستەگى ەڭبەك جولىن 2016 جىلى «قازاقمىس» كورپوراتسياسىنىڭ جەزقازعان بايىتۋ فابريكاسىندا باستاعان. ودان سوڭ ابىز كەن ورنىندا, قۇسمۇرىن-اقباستاۋ كەنىشىندە ەسەلى ەڭبەك ەتتى. قازىر «قازاقمىس» جاۋاپكەرشىلىگى شەكتەۋلى سەرىكتەستىگىنە قاراستى حادجيكونگان كارەرى گەولوگيا ءبولىمىنىڭ تاۋ-كەن جۇمىسشىسى. مۇندا ۆاحتالىق ادىسپەن ەڭبەك ەتىپ ءجۇر. جەتى كۇن كۇندىزگى, جەتى كۇن تۇنگى اۋىسىمدا جۇمىس ىستەيدى.
«وندىرىستەگى ۇدەرىس ساعات ءتىلى سياقتى ۇزدىكسىز توقتاماۋى كەرەك. ەڭبەك اعىنى تىنىمسىز جالعاسا بەرەدى. سوندىقتان جەتى قات جەر استىنداعى جۇمىسقا جوعارى جاۋاپكەرشىلىكپەن قارايمىز. اسىرەسە تەحنيكا قاۋىپسىزدىگىن ساقتاۋ وتە ماڭىزدى. بىرەۋىمىز قاتەلىك جىبەرىپ الساق, بارلىعى بىردەي زارداپ شەگەدى», دەيدى ە.سەيىتقازى ۇلى.
ەڭبەكپەن جاستايىنان شىڭدالعان ونىڭ قولىنان كوپ شارۋا كەلەدى. قۇرىلىسقا دا قۇمبىل. شارۋانىڭ قاي-قايسىسىنا بولسىن شيراق. ءوندىرىس سالاسىنا كەلگەنىنشە ءتۇرلى جۇمىس اتقاردى. دەگەنمەن ءوزى وقىپ-توقىعان ماماندىقپەن مىقتاپ شۇعىلدانىپ, سودان بەرەكە تاپقىسى كەلدى. ءسويتىپ, ويلاعانى ورىندالىپ, ارمانى الدىنان قارسى جولىقتى.
وتباسىنا ماڭداي تەر, تابان اقىمەن تابىس اكەلىپ وتىرعان ازامات ءبىر قىز, قوس ۇلدىڭ اكەسى. بالالارىن دا جاستايىنان ۇيدەگى شارۋاعا جۇمساپ, ەڭبەككە باۋلىپ وتىرادى. «بىلگەندەرى ەرتەڭ وزدەرىنە جاقسى», دەيدى.
ەرنات جۇمىستان تىس, قولى قالت ەتكەن شاقتا ولەڭ جولدارىن قاعازعا تۇسىرەدى. شىعارماشىلىعىن ەڭبەگىمەن ۇشتاستىرىپ, ولەڭ جولدارى ارقىلى ءومىردىڭ ءمان-ماڭىزىن جەتكىزىپ جۇرگەن قالام يەسى. ونىڭ ءار جازعان ولەڭىنەن جان دۇنيەسىن جارىپ شىققان شىنايى تۋىندىنى اڭعارۋعا بولادى.
«بەكەم بول, كەنشى, ابايلا,
ءومىرىڭ قىمبات تالايعا.
باستاماس بۇرىن جۇمىستى,
قاۋىپسىز بە ەكەن, سونى ويلا!
قاعامىن بەلگە مەن قازىق,
تەرەڭگە ءتۇسىپ, كەن قازىپ,
جوسپارعا جەتپەي تىنىم جوق,
بەرەم دەپ ويلا ەلگە ازىق!», – دەگەن ولەڭ جولدارىنان كاسىبي كەنشى مەن سىرشىل اقىننىڭ جۇرەك ءسوزىنىڭ توعىسقانىن ۇعىناسىز. ءوندىرىستى دە, ءومىردى دە قاتار جىرلاپ جۇرگەن ەرنات ەش ۋاقىت قالامىن سۋىتقان ەمەس. ارىپتەستەرى ءبىر ۋاقىت دەمالىپ وتىرعاندا ولەڭ وقىپ بەرۋگە قولقا سالادى. سوندا ەرنات وسى ءبىر جىردى تەبىرەنىپ تۇرىپ, وقىپ بەرەدى. ءتىپتى قاسىندا جۇرگەن ەكى-ءۇش كەنشى جاتتاپ الىپتى. ءسويتىپ, قارا جۇمىستان قاجىعان جىگىتتەردىڭ ەڭسەسىن قايتا تىكتەپ, رۋحىن وياتادى. ودان كەيىن اۋىلىنا, جاقىندارىنا جازعان ولەڭدەرىن جولدايدى. وسىلايشا, كاسىبي كەنشى جەراستىندا كەن قازىپ قانا قويماي, جەلپىنىپ جىر وقىپ تا ءجۇر.
ەڭبەكتىڭ قاراتورىسى بولعان ەرنات مادەنيەتكە ءتىپتى جاقىن. كەنشىلەر قالاسىندا وتەتىن ادەبي, شىعارماشىلىق كەش, كونتسەرتتەردىڭ قاشاندا بەل ورتاسىندا جۇرەدى. ونەردى وتە قاتتى باعالايدى.
«كۇنبە-كۇن ادام كوزىنە ىلىگە بەرمەيتىن, قارا نار عانا تارتاتىن قاجىرلى جۇمىستى تاق تۇرىپ اتقارىپ جۇرگەن كەنشىلەر قاۋىمىنا قۇرمەتپەن قاراپ, بيىلعى جىلدى جۇمىسشى ماماندىقتارى جىلى دەپ جاريالاعان مەملەكەت باسشىسىنىڭ باعدارى كوپ جايدان حابار بەرەدى. ءومىرىمنىڭ ءمانىن دە, بارىن دا وندىرىستەن تاپتىم. ولەڭىمدى دە ولتىرمەدىم. ەلەنسە, ەڭبەك ادامى ەلەنسىن. قاي جەردە دە ولاردىڭ تىنىمسىز تىرلىگى لايىقتى باعاسىن الىپ, جۇرگەن-تۇرعانى ەلگە ۇلگى بولسا, كەيىنگى جاستارىمىز دا ەڭبەككە دەگەن كوزقاراسىن تۇزەتە تۇسەدى», دەيدى ەرنات.
قاراعاندى وبلىسى
