«جالعان اقپارات پەن فەيك جاڭالىقتاردىڭ تارالۋى قوعامدا وزەكتى ماسەلەگە اينالدى. فەيك جاڭالىقتار اسىرەسە توتەنشە جاعدايلار, قوعامدىق وقيعالار كەزىندە حالىقتى اداستىرۋ قاۋپىن ارتتىرادى», دەدى مينيستر.
ايدا بالاەۆا ارىپتەستەردى جاڭالىقتار اعىنىن مۇقيات قاداعالاپ, راستالماعان اقپاراتتىڭ تارالۋىنا جول بەرمەۋگە جانە زاڭعا قايشى كونتەنت تاراتپاۋعا شاقىردى.
«اقپاراتتىق ساۋاتسىزدىق فەيك جاڭالىقتاردىڭ تارالۋىنا جول اشادى. سوندىقتان دۇرىس اقپاراتتى تالداي ءبىلۋ داعدىسى دەموكراتيالىق قوعام قۇرۋدىڭ ماڭىزدى ەلەمەنتى سانالادى. جاس ۇرپاق جالعان اقپاراتتىڭ جەتەگىندە كەتپەۋى ءۇشىن ولاردى مەديا ساۋاتتىلىققا مەكتەپ كەزىنەن باستاپ تاربيەلەۋىمىز كەرەك», دەپ اتاپ ءوتتى مينيستر.
سونداي-اق, ول جۋرناليستەرگە ارنالعان فاكتچەكينگ, اناليتيكالىق جۋرناليستيكا, تسيفرلىق قاۋىپسىزدىك بويىنشا ترەنينگتەر وتكىزۋ دە ماڭىزدى ەكەنىن ايتتى.
ءوز سوزىندە مينيستر ەتنوسارالىق جانە كونفەسسياارالىق قاتىناستارعا دا توقتالدى. قازىرگى كەزدە ەلىمىزدە 18 كونفەسسيانى بىلدىرەتىن 4 مىڭعا جۋىق تىركەلگەن ءدىني بىرلەستىك بار. ايدا بالاەۆا ىزگىلىك پەن رۋحاني قۇندىلىقتاردى ناسيحاتتاۋدا ءدىن سالاسىنىڭ ورىنى ەرەكشە ەكەنىن ايتتى.
«بۇل ماسەلەدە زاڭ مەن ءتارتىپ قاعيداسى قاتاڭ ورناۋعا ءتيىس. سوندا عانا ءبىز بىرلىك پەن تۇراقتىلىقتى ساقتاپ, مەملەكەتىمىزدى نىعايتا الامىز. ەل ىشىندە الاۋىزدىق تۋعىزىپ, ءدىني, ەتنوسارالىق ارازدىقتى قوزدىرۋ ماسەلەلەرىن بولدىرماۋ ءۇشىن جاۋاپكەرشىلىكتى كۇشەيتۋىمىز كەرەك», دەپ اتاپ ءوتتى مينيستر.
ايتا كەتەيىك, وتكەن جىلى ۇلتارالىق ارازدىقتى جانە سەپاراتيزمدى قوزدىرۋعا ىقپال ەتەتىن ماتەريالدار بويىنشا قازاقستان رەسپۋبليكاسىنىڭ زاڭناماسىن بۇزعان 413 فاكتى انىقتالدى.
