فوتو: قر ۇلتتىق مۋزەي
«تسيفرلاندىرۋ اقپارات كەڭىستىگىنىڭ اشىقتىعىن ارتتىرىپ, حالىققا جەدەل ءارى ساپالى مالىمەت جەتكىزۋگە مۇمكىندىك بەرەرى انىق. بۇل اسىرەسە جالعان اقپاراتپەن كۇرەسۋدە وتە ماڭىزدى. ءبىز Big Data جانە جاساندى ينتەللەكت نەگىزىندە اقپارات اعىنىن سۇزگىدەن وتكىزىپ, قوعامعا سەنىمدى اقپارات تاراتۋ جۇيەسىن جەتىلدىرۋگە ءتيىسپىز», دەپ اتاپ ءوتتى ايدا بالاەۆا.
مينيستر سونىمەن قاتار ۇلتتىق قۇندىلىقتاردى زاماناۋي تەحنولوگيالارمەن ۇشتاستىرا وتىرىپ, رۋحاني مۇرانى كەڭىنەن ناسيحاتتاۋدىڭ ماڭىزىنا توقتالدى. وسىعان بايلانىستى ارحيۆ, كىتاپحانا جانە مۋزەي قورلارىن تسيفرلىق فورماتقا كوشىرۋ جۇمىستارىن كۇشەيتۋ قاجەت ەكەنىن اتاپ ءوتتى.
بۇدان بولەك, ايدا بالاەۆانىڭ ايتۋىنشا, قازاقتىڭ ۇلتتىق فولكلورىن ينتەراكتيۆتى, انيماتسيالىق, ينفوگرافيكالىق جانە ءيلليۋستراتيۆتى فورماتتا جاساۋ جوسپارلانعان. بۇل ماقساتقا جاساندى ينتەللەكت تەحنولوگيالارى قولدانىلماق.
«بيىل قازاقستان مۋزەيلەرىنىڭ ۆيرتۋالدى جەلىسى «E-museum» ۆەب-پورتالىن اشۋدى جوسپارلاپ وتىرمىز. الەمنىڭ كەز كەلگەن بۇرىشىنداعى پايدالانۋشىلار مادەني مۇرالارىمىزدى 3D مودەلدەر ارقىلى تاماشالاۋ ءۇشىن كورنەكى جانە ينتەراكتيۆتى تەحنولوگيالار ەنگىزىلەدى», دەدى مينيستر.
العا قويىلعان جوسپارلاردىڭ قاتارىندا قازاقستاندىق فيلمدەر, سەريالدار مەن انيماتسيالىق تۋىندىلاردى قامتيتىن ستريمينگ پلاتفورمانى ىسكە قوسۋ بار.
سونىمەن قاتار, ۇلى جەڭىستىڭ 80 جىلدىعى اياسىندا مينيسترلىك «باتىرلارعا تاعزىم» اتتى ونلاين-پلاتفورمانى ىسكە قوسپاق. بۇل پلاتفورمادا ەكىنشى دۇنيەجۇزىلىك سوعىسقا قاتىسقان قازاقستاندىقتار تۋرالى مالىمەتتەر ۇسىنىلادى.
