2023 جىلدىڭ قاراشا ايىندا العاشقى ىرگەتاسى قالانعان «كىا» زاۋىتىنىڭ قۇرىلىسى بيىل كۇزدە اياقتالادى. قازىرگى تاڭدا زاۋىت عيماراتىنىڭ قۇرىلىسى تولىق اياقتالىپ, ءوندىرىس جەلىسىنە زاماناۋي قۇرىلعىلار ورناتىلىپ جاتىر. زاۋىت الداعى قازان ايىندا ىسكە قوسىلادى.
«Kia Qazaqstan» جشس باس ديرەكتورى كيم دە كي مينيسترگە زاۋىتتا 1500 جاڭا جۇمىس ورنى اشىلاتىنىن ايتتى. اۆتوماتتاندىرىلعان زاماناۋي كاسىپورىننىڭ دانەكەرلەۋ جەلىسىندە, اۆتوكولىكتى بوياۋ تسەحى مەن قۇراستىرۋ جەلىسىندە 100 روبوت پايدالانىلادى. جوبانىڭ قۇنى – 200 ملن دوللار, ونىڭ 80 پايىزعا جۋىعى شەتەلدىك ينۆەستيتسيانىڭ ۇلەسىندە.
زاۋىت ءوندىرىسى ىسكە قوسىلعان سوڭ جىلىنا 70 مىڭ «كىا Sorento» كروسسوۆەرىن شىعارا باستايدى. ونىڭ 50 مىڭى ۇساق بولشەكتەردەن قۇراستىرىلادى, ياعني بۇل جەردە ءوندىرىستىڭ جەرگىلىكتى ۇلەسىنىڭ مەيلىنشە جوعارى بولۋىنا باسا ءمان بەرىلىپ وتىر.
ساۋدا جانە ينتەگراتسيا ءمينيسترى ارمان شاققاليەۆ ودان كەيىن «KamLitKZ» سەرىكتەستىگىنە باردى. بۇگىندە «KamLitKZ» سەرىكتەستىگى ءۇش بىردەي ءىرى جوبانى جۇزەگە اسىرىپ جاتىر. جشس باس ديرەكتورى الەكسەي كوتوۆتىڭ ايتۋىنشا, قۇنى 78,2 ملرد تەڭگە بولاتىن الپاۋىت كاسىپورىن جىلىنا 45 مىڭ توننا شويىن قورىتىپ, ودان اۋىر ماشيناعا قاجەت ءتۇرلى بولشەكتەر قۇيادى. بۇگىندە مۇندا 500 ادام جۇمىس ىستەپ جاتىر. زاۋىت الەمدىك ستاندارتتارعا سايكەس كەلەتىن زاماناۋي جوعارى تەحنولوگيالىق قۇرىلعىلارمەن جابدىقتالعان.
«بۇل – ءبىزدىڭ سەرىكتەستىك ىسكە اسىرىپ جاتقان ءبىرىنشى جوبا. بىلتىر 2 300 جەڭىل جانە جۇك كولىكتەرىنە ارنالعان شويىن بولشەكتەرىن قۇيدىق. ءوندىرىس تسەحتارى تولىق ىسكە قوسىلعان سوڭ, وبلىستا شويىن قۇيۋ كولەمى شامامەن بەس ەسە ارتادى. سەرىكتەستىك قازىر 82,5 ملرد تەڭگەگە ىشتەن جاناتىن قوزعالتقىشتارعا ارنالعان شويىن قۇيمالارىن جانە جەتەكشى وس تەتىكتەرىن وندىرەتىن ەكى زاماناۋي ءوندىرىس ورنىنىڭ قۇرىلىسىن جۇرگىزىپ جاتىر. بۇل كاسىپورىندار ىسكە قوسىلسا, تاعى 550 جۇمىس ورنى اشىلماق», دەيدى ا.كوتوۆ.
ارمان شاققاليەۆ جۇمىس ساپارى اياسىندا ءسۇت ونىمدەرىن شىعاراتىن «ميلح» سەرىكتەستىگىندە بولىپ, «نوۆىي دەن» ساۋدا بەلگىسىمەن شىعاتىن ءسۇت ونىمدەرىنىڭ تەحنولوگياسىمەن تانىستى. «ميلح» بۇگىندە قازاقستان مەن رەسەي تۇرعىندارىنا ەتەنە تانىس ءجۇز ءتۇرلى ءسۇت ءونىمىن شىعارادى. سەرىكتەستىك باسشىسى سەرگەي بلوك مينيسترگە الداعى ۋاقىتتا كومپانيا ونىمدەرى ەۋروپا ەلدەرىنە ساۋدالاناتىنىن ايتتى.
