جۇننەن ءتۇرلى كارتينا جاساۋ – گۇلپاحاتتىڭ بالا كەزدەن بەرگى سۇيىكتى ءىسى. سودان دا بولار, ول كاسىبىن اشاردا تاۋەكەلگە بەل بايلادى. ونىڭ جۇننەن توقىلعان كارتينالارى شەتەل نارىعىنا دا شىعا باستادى. اسىرەسە كادەسىي رەتىندە ءوتىمدى.
وسىدان التى جىل بۇرىن ول «دوستىق» ۇيىندە وتكەن شەبەرلىك ساعاتىندا العاش رەت كيىز باسىپ كورەدى دە, بۇل ونەر جانىنا جاقىن ەكەنىن ۇعىنادى. ءجۇن ءتۇتىپ, ءتۇرلى قولونەر بۇيىمدارىن ازىرلەۋگە بولاتىنىن ءتۇسىنىپ, بۇل كاسىپكە دەن قويا باستايدى. اناسى دا – شەبەر. بۇگىندە قاراعاندى وبلىسى «Jadiger» قولونەرشىلەر قاۋىمداستىعىنىڭ توراعاسى. قاراعاندىدا قىز جاساۋىن تىگەتىن ەڭ ۇزدىك شەبەرلەردىڭ ءبىرى. ۇيىندەگى اناسىنا قولعابىس جاساپ, ءىس تىگىپ, ابدەن قولىن جاتتىقتىرىپ الادى. «دوستىق» ۇيىندەگى قولونەر ۇيىرمەسىنە دە ۇزبەي بارىپ جۇرەدى. مەكتەپتە جۇرگەندە-اق العاشقى تابىسىن تابادى.
جۇننەن جاسالعان ونىڭ ونىمدەرىن العاش بولىپ اتىمتاي جومارت كاسىپكەر ەرلان ءاشىم ساتىپ الىپتى. مەتسەنات قازاقى ناقىشتاعى كارتينالاردى ءوزىنىڭ «Turan el» ۇلتتىق مەيرامحاناسىنىڭ قابىرعاسىنا ءىلىپ قويىپتى. ودان بولەك مارتەبەلى مەيماندارىنا كادەسىي رەتىندە ۇسىنىپ ءجۇر ەكەن. سودان جاس شەبەرگە تاپسىرىس توپەلەپ تۇسەدى. ايتپەسە گۇلپاحات مۇحامەدقىزى ءوز ونىمدەرىن ساۋدالاپ, جارناما جاساعان ەمەس. ءوزى ويلاماعان جەردەن تۋىندىلارى ترەندكە اينالىپ شىعا كەلگەن. قازىر دە جارنامانى قاجەت ەتپەيدى. «تسەحتى اشامىن» دەپ, قۇجاتىمەن جۇگىرگەلى بەرى تاپسىرىس تاۋداي بوپ ءۇيىلىپ قالىپتى.
وسى ىسكە بار ىنتا-شىنتاسىمەن كىرىسكەن گۇلپاحات مۇحامەدقىزى – قاراعاندى تەحنولوگيا جانە سەرۆيس كوللەدجىنىڭ ءۇشىنشى كۋرس ستۋدەنتى. ديزاينەر-تىگىنشى ماماندىعى بويىنشا ءبىلىمىن جەتىلدىرىپ جاتىر. كوللەدج باسشىلىعى دا العىر ستۋدەنتتەرىن بارىنشا قولداپ, باسقالارعا ۇلگى ەتەدى.
جاس كاسىپكەر قولونەر شەبەرلەرىنىڭ رەسپۋبليكالىق, حالىقارالىق كورمەلەرىنە ءجيى قاتىسادى.
– 2023 جىلى استانا قالاسىندا وتكەن سامميتكە قاتىسقان ەدىم. سول كەزدە ەل پرەزيدەنتى قاسىم-جومارت توقاەۆ پەن فرانتسيا پرەزيدەنتى ەممانيۋەل ماكرون كەلىپ, قولونەرىمدى تاماشالادى. كەيىن V دۇنيەجۇزىلىك كوشپەلىلەر ويىندارىنا دا تۋىندىلارىمدى اپاردىم. سول كەزدە شەتەلدەن كەلگەن تۋريستەر جۇننەن توقىلعان كارتينامدى, قولسومكەلەردى ساتىپ الىپ, ريزاشىلىعىن ءبىلدىردى, – دەيدى گۇلپاحات.
وسى كاسىپتەن شابىت العان جاس شەبەردىڭ ارمانى دا اسقاق. كيىزدەن جاسالعان قولونەر بۇيىمدارىن الەمدىك برەندكە شىعارسام دەيدى. قارشاداي قىز قالتاسىنىڭ قامى ءۇشىن ەمەس, ۇلتتىڭ مۇددەسىن اۋەلگى كەزەككە قويىپ وتىر.
وڭىرىمىزدە ءجۇن وڭدەيتىن كاسىپورىن جوق دەۋگە دە بولادى. شارۋالار شيكىزات وتكىزەتىن جەر تاپپاي وتىر. امال جوق قانشاما تەرى-ءجۇن دالادا ءشىرىپ جاتىر. گۇلپاحاتتىڭ جاڭادان اشقان شاعىن تسەحى وسى ءبىر ۇلكەن شارۋانىڭ باستاۋىنداي كورىنەدى.
«اتامەكەن» ۇلتتىق كاسىپكەرلەردى قولداۋ پالاتاسىنىڭ ء«بىر اۋىل – ءبىر ءونىم» جوباسىنا قاتىسىپ, بيزنەس جوسپارىن قورعاپ شىققان. سودان وبلىس اكىمىنىڭ 5 ملن تەڭگە قايتارىمسىز گرانتىن ۇتىپ العان. اكىم گرانتى ءسويتىپ كاسىبىن ءارى قاراي دامىتۋعا سەرپىن بەرگەن. قاراجاتقا ءجۇندى تۇتەتىن ءارى سوزاتىن, ءتىپتى, يلەپ بەرەتىن دە ستانوكتار الىپتى. ەندى مەحانيزمى مول جابدىقتىڭ ارقاسىندا جۇمىس كۇشى جەڭىلدەپ, ءونىم كولەمى ارتادى. ونىمەن قوسا تسەحىن جالعا الىپ وتىر.
«جەكە كاسىبىمدى اتا-انامنىڭ كەلىسىمى ارقىلى اشتىم. بۇعان دەيىن ءوزىمنىڭ قىزىعۋشىلىعىممەن جۇننەن كارتينا, كىشىرەك تەكەمەتتەر جاسادىم. ءتۇرلى كورمە-جارمەڭكەگە قاتىسىپ, كليەنت جينادىم. انامنىڭ ءجۇن ءوندىرىسىن اشۋ كەرەك دەگەن ۇسىنىسىنان كەيىن بيزنەس-جوسپار قۇردىم. وعان دەيىن ءوز شارۋاشىلىعىمىزداعى قويدىڭ ءجۇنىن تازالاپ, كادەگە جاراتىپ ءجۇردىم. ال بويالعان ءجۇندى رەسەيدەن الدىرىپ وتىردىم. ول قالتانى قاعىپ تۇسىرەتىن ەدى. سودان ارنايى ءجۇندى بوياۋدىڭ تەحنولوگياسىن دا ۇيرەنىپ الدىم. تسەحىمدا ازىرشە ءبىر جۇمىسشى عانا ەڭبەك ەتەدى. تسەح جۇمىسىن ءبىر ىزگە تۇسىرگەن سوڭ, جۇمىسشى سانىن كوبەيتەمىن», – دەيدى جاس كاسىپكەر.
اكەسى مۇحامەدتىڭ شەت اۋدانى كوكتىڭكولى اۋىلىندا «بىرلىك» قوي شارۋاشىلىعى بار. ازىرگە سونداعى قوي ءجۇنىن كادەگە جاراتىپ وتىر. الداعى كۇنى تەك كارتينا عانا ەمەس, ۇلتتىق ناقىشتاعى ءتۇرلى بۇيىم مەن كيىم-كەشەك ءتۇرىن, كورپە-جاستىقتاردى, قىز جاساۋلارىن نارىققا شىعارۋ جوسپارىندا بار. سوندا باسقا دا فەرمەرلەردىڭ شيكىزاتىن قابىلدايدى.
ايماعىمىزدا گۇلپاحات سەكىلدى كاسىپ اشۋعا تالپىنعاندارعا مەملەكەت تاراپىنان جان-جاقتى قولداۋ كورسەتىلىپ وتىر. ولارعا 2005 جىلدان بەرى وبلىس اكىمىنىڭ گرانتى ۇزدىكسىز بەرىلىپ كەلەدى. بيىل دا مادەنيەت, عىلىم, اقپاراتتىق تەحنولوگيا, مەديا جانە باسقا دا ەرەكشە بيزنەس جوبا ۇسىنعان جاستارعا قارجىلاي قولداۋ بار.
قاراعاندى وبلىسى
