سۋرەتتى تۇسىرگەن – جانگەلدى ابدىعالىم
قازاق كينوسىنىڭ كوشى مادەنيەت جانە اقپارات مينيسترلىگى جانە كينو ورتالىعىنىڭ قولداۋىمەن جولعا شىقتى. كورەرمەن نازارىنا وتاندىق بىرنەشە فيلم ۇسىنىلادى.
«كورسەتىلىمدى قاراعاندى وبلىسىنان باستاۋىمىزدىڭ وزىندىك سىرى بار. بۇل ايماق ءوندىرىستىڭ قايناعان ورتاسىندا ورنالاسقان. بيىلعى جىلدى پرەزيدەنتىمىز قاسىم-جومارت توقاەۆ جۇمىسشى ماماندىقتارى جىلى دەپ جاريالاعانى بەلگىلى. سول سەبەپتى دە اۋقىمدى شارانى وسى ايماقتان باستاۋىمىزدىڭ رامىزدىك ءمانى بار. قاراعاندىدان باستاپ ەلىمىزدىڭ ءار بۇرىشىندا قازاق كينوسىنىڭ كۇندەرىن وتكىزۋ وتاندىق كينەماتوگرافيانى ىلگەرىلەتۋگە سەرپىن سىيلايدى. سەبەبى ءاربىر ءفيلمنىڭ ەڭ باستى جەڭىسى – ونىڭ ءوز كورەرمەنىن تابۋى. ءبىزدىڭ ماقساتىمىز دا ۇلتتىق كينونى حالىققا قولجەتىمدى ەتۋ», دەيدى كينو ورتالىعى باسقارما توراعاسىنىڭ كينوجوبالار مونيتورينگى جونىندەگى ورىنباسارى ادىلەت وماروۆ.
ۇيىمداستىرۋشىلار وتاندىق كينونىڭ كوكجيەگىن كەڭەيتىپ جۇرگەن وتاندىق كينوگەرلەردىڭ جەتىستىگىن ەل-جۇرت بىلسە دەيدى. وسىلايشا, اۋدان-قالا مەن شالعاي اۋىلداعى اعايىن ەل تاريحى مەن مادەنيەتىن ايشىقتايتىن ۇزدىك فيلمدەرىمەن قاۋىشادى.
بۇعان دەيىن كينو ورتالىعىنىڭ قولداۋىمەن 117 كارتينا جارىققا شىقتى. ونىڭ 72-ءسى – كوركەم, 37-ءسى – دەرەكتى, 8-ءى – انيماتسيالىق فيلم. پروكاتقا شىققان تۋىندىلاردىڭ دا قاتارى كوبەيىپ كەلەدى.
«كينو كۇندەرى اياسىندا كورسەتىلەتىن «قاجىمۇقان» ۇلتتىق رۋحىمىزدى اسقاقتاتسا, «جامبىل. جاڭا ءداۋىر», «دوس-مۇقاسان» فيلمدەرى ارقىلى تۇلعالارىمىزدىڭ ءجۇرىپ وتكەن جولىنا قانىعادى. «وپەراتسيا نابات», «ۆرەميا پاتريوتوۆ» قۇقىق قورعاۋشىلارىمىزدىڭ ەڭبەگىن كورسەتىپ, وتانعا دەگەن سۇيىسپەنشىلىكتى ارتتىرادى. «بوكسەر» ءفيلمىنىڭ باستى ءپروتوتيپى سەرىك ساپيەۆ ەكەنىن دە ايتا كەتۋ كەرەك. «باۋىرىنا سالۋ» دەپ اتالاتىن كينودا ءداستۇرىمىز دارىپتەلەدى. كىشكەنتاي كورەرمەندەرگە ارنالعان «تايقازان» دەپ اتالاتىن انيماتسيالىق فيلم دە نازارلارىڭىزعا ۇسىنىلادى. «الماتى, يا ليۋبليۋ تەبيا!», «سوڭعى ۇكىم», «دالا قاسقىرى», «ستوپ, نوچ», «شۋلاما» فيلمدەرىنىڭ دە ايتار ويى بار. بيىل تاعى وننان اسا تۋىندى پروكاتقا شىعادى دەپ جوسپارلانىپ وتىر», دەيدى ءا.وماروۆ.
«سارىجايلاۋ» كينوتەاترىندا مادەنيەت جانە اقپارات مينيسترلىگىنىڭ, ۇلتتىق كينونى قولداۋ ورتالىعىنىڭ قولداۋىمەن تۇسىرىلگەن «قاجىمۇقان» كينوسى كورسەتىلدى.
رەجيسسەر قاناعات مۇستافين تاريحي فيلم ستسەناريىنە 2012 جىلى كىرىسىپ, تاقىرىپتى 10 جىلدان اسا زەرتتەپتى. ءتۇسىرىلىمى 2020 جىلى باستالعان كينوتۋىندى بىلتىر كورەرمەن نازارىنا ۇسىنىلعان.
«وسى ءبىر ءفيلمدى ءتۇسىرۋ ءۇشىن كوپ جۇگىردىم. قولداۋ تاپپادىم. ءسويتىپ جۇرگەندە وتاندىق كينونى قولداۋ ورتالىعى اشىلدى. بىردەن ستسەناريىمدى اپارىپ, قورعاپ شىقتىم. قاجىمۇقان اتامىزدىڭ تاعدىرى قانداي قيىن بولسا, كينونى دا ءتۇسىرۋ اۋىر بولدى. ەلىمىزدەگى پروكاتى اياقتالدى. ەندى رەسەيدە كورسەتىلەدى. «بورەتس. كاجىمۋكان – چەمپيون ميرا» دەگەن اتاۋمەن. وزبەكستان مەن قىرعىزستاندا دۋبلياج جاسالىپ جاتىر», دەيدى فيلم رەجيسسەرى.
باستى رولدەردى اعايىندى ەربول مەن دياس تولەپبەرگەن سومداپ شىعادى. بالۋاننىڭ جاس كەزىن سومداعان دياس تا قاراعاندىعا ارنايى كەلدى. جاس اكتەر اعاسى ەكەۋى 1,5 جىل بويى ماماندار ازىرلەگەن راتسيونمەن تاماقتانىپ شىققاندارىن ايتتى. ءتىپتى ەت جەۋگە شەكتەۋ قويىلىپتى. بۇلشىق ەتىن ءوسىرۋ ءۇشىن بوديبيلدينگپەن اينالىسىپ, جاتتىعۋ زالىندا تەر توككەن. 2,5 اي كاسكادەرلىك تاسىلدەردى ۇيرەنىپ, فيلمدە دۋبلەرسىز بارلىق قيمىلدى وزدەرى جاساپ شىققان.
كورسەتىلىم سوڭىندا كينوتەاتر ديرەكتورى سايات ابدىعالي مەيماندارعا سىي-سياپات جاساپ, قۇرمەت كورسەتتى.
قاراعاندى وبلىسى
