اتالعان فيليال ەلىمىزدەگى ەڭ ۇلكەن اكادەميا اتانىپ وتىر. عيماراتتىڭ جالپى اۋدانى 900 شارشى مەتر, وقۋشى سانى - 1000-عا جۋىق.
«ۇلت ۇياسى – ۇلىتاۋدا سىزدەرمەن قاۋىشقانىما قۋانىشتىمىن. بارلىعىڭىزدى اكادەميانىڭ اشىلۋىمەن شىن جۇرەكتەن قۇتتىقتايمىن. مەملەكەت باسشىسى سپورت سالاسىنا ەرەكشە كوڭىل بولۋدە. ناتيجەسىندە, سپورتشىلارىمىز الەمدىك دودالاردا ارقاشان بيىكتەن كورىنىپ كەلەدى. شاحماتتا ءبىزدىڭ سپورتشىلار الەمدىك دودالاردا وتە جوعارى ناتيجە كورسەتىپ ءجۇر. ەلىمىزدە 8 مىڭنان استام شاحمات ۇيىرمەلەرى جۇمىس ىستەيدى. 270 مىڭنان استام بالا شاحماتپەن اينالىسادى. جانسايانىڭ ءوزى حالىقارالىق گروسسمەيستەر. الەمدىك ارەنادا توپ جارىپ, ءوزىنىڭ سپورتتاعى جولىنان بولەك, بالالاردى سپورتقا باۋلىپ, ولارعا جول اشىپ جاتىر. كەلەشەكتە وسىنداي اكادەميالاردان الەمدىك دودالاردى باعىندىراتىن سپورتشىلاردىڭ ءوسىپ شىعاتىنىنا سەنىمدىمىن», - دەدى اشىلۋ سالتاناتىنا قاتىسقان تۋريزم جانە سپورت ءمينيسترى ەربول مىرزابوسىنوۆ.
سونىمەن قاتار اكادەميانىڭ اشىلۋى اياسىندا KAZAKHMYS YOUTH TEAM CHESS CUP اتتى العاشقى حالىقارالىق بالالار كوماندالىق ءتۋرنيرى ۇيىمداستىرىلدى. اتالمىش دوداعا قازاقستان, رەسەي, بەلارۋس, قىرعىزستان مەن موڭعوليادان كەلگەن 100-دەن استام جاس شاحماتشى قاتىستى.
