– ءمادي توكەش ۇلى, جىل سايىن بەلگىلى ءبىر سوما مولشەرى ساقتالا ما؟ ساقتالماسا, وعان نە اسەر ەتەدى؟
– بىلتىر 100,52 دوللار اۋدارىلسا, بيىلعى كورسەتكىش 129,38 دوللارعا تەڭ. اۋدارىمنىڭ مولشەرى, ەڭ الدىمەن, ۇلتتىق قورداعى قاراجاتتىڭ كولەمىنە, سونداي-اق ينۆەستيتسيالىق تابىسقا بايلانىستى. ينۆەستيتسيالىق كىرىستى ەسكەرسەك, باعدارلاماعا ەكى جىلدان بەرى قاتىسىپ كەلە جاتقان بالالاردىڭ جالپى جيناق سوماسى 232,94 دوللارعا ارتتى.
– بالا باسقا مەملەكەتكە كوشىپ, تۇرعىلىقتى جەرىن اۋىستىرسا, جيناقتالعان اقشانىڭ ماسەلەسى قالاي شەشىلەدى؟
– قازاقستان ازاماتتىعىنان ايىرىلعان جاعدايدا بۇعان دەيىن اۋدارىلعان بارلىق قاراجات قايتارىلىپ, ەلىمىزدىڭ كامەلەتكە تولماعان ازاماتتارى اراسىندا قايتا بولىنەدى.
– بىلتىر قايتىس بولعان بالالاردىڭ اتىنا شوت اشىلىپ, اقشا اۋدارۋ جاعدايلارى كەزدەسكەنى ءمالىم. بۇل باعىتتا قانداي جۇمىس قولعا الىندى؟
– باعدارلاما جاڭا بولعان سوڭ قاتىسۋشىلاردىڭ ءتىزىمىن قالىپتاستىرۋدا كەمشىلىك بولۋى مۇمكىن. سول سەبەپتى, جىل سايىن ءتىزىم قايتا تەكسەرىلەدى. ماسەلەن, بجزق دەرەكتەردى سالىستىرعاننان كەيىن مالىمەتتەردە سايكەسسىزدىكتەردىڭ بار ەكەنىن انىقتاعان. وسىعان بايلانىستى ءتيىستى سوماعا تۇزەتۋلەر ەنگىزىلدى. وسىدان كەيىن اۋدارىمداردىڭ كەيبىرىن كەرى قايتارىپ, باسقا ازاماتتاردىڭ شوتىن تولىقتىرۋ ارقىلى قايتا ەسەپتەۋ جۇرگىزىلدى. وسىلايشا, 2024 جىلى شامامەن 6 ملن دوللار كولەمىندە قاراجات قايتا ءبولىندى.
– دەنساۋلىعىنا بايلانىستى ءبىلىم الۋعا نەمەسە جىلجىمايتىن م ۇلىككە يە بولا المايتىن بالالار بار. ولار جيناقتالعان قاراجاتتى قالاي پايدالانادى؟
– قاتىسۋشىنىڭ وزدىگىنەن تۇرىپ جۇرۋگە نەمەسە باسقا دا ءىس-قيمىلعا قابىلەتى بولماعان جاعدايدا ونىڭ زاڭدى وكىلى (اتا-اناسى, اسىراپ الۋشىسى, قورعانشىسى, قامقورشىسى جانە وزگە دە ادامدار) باعدارلامانىڭ شەڭبەرىندە جينالعان سومانى تەك اتالعان بالانىڭ ماقساتىنا, ياعني ونىڭ باسپانا جاعدايىن جاقسارتۋعا عانا پايدالانا الادى.
– كەيىنگى جىلدارى ەلىمىزگە كوپتەگەن رەلوكانت كەلە باستادى. ولاردىڭ بالالارىنا وسى تولەم بەرىلە مە؟
– باعدارلاماعا تەك قازاقستان ازاماتتارى قاتىسادى. ەگەر شەتەل ازاماتتارىنىڭ نەمەسە ازاماتتىعى جوق ادامداردىڭ بالالارى قازاقستان ازاماتتىعىن السا, وندا ازاماتتىقتى العان ساتتەن باستاپ 18 جاسقا دەيىن ولارعا «ۇلتتىق قور – بالالارعا» باعدارلاماسى بويىنشا قاراجات تولەنەدى.
– 18 جاسقا تولعان جاس ازامات وسى اقشانىڭ كومەگىمەن اتا-اناسىنىڭ يپوتەكاسىن جابا الا ما؟
– جوق, ول مۇمكىن ەمەس. 18 جاسقا تولعاننان كەيىن ازامات اقشاسىن تەك جىلجىمايتىن م ۇلىك ساتىپ الۋعا; يپوتەكالىق تۇرعىن ءۇي قارىزىن الۋ ءۇشىن باستاپقى جارنانى تولەۋگە; تۇرعىن ءۇي قۇرىلىس جيناعىنا سالىم اۋدارۋعا (ونىڭ ىشىندە اقشانى ودان ءارى جيناقتاۋ ءۇشىن); يپوتەكالىق تۇرعىن ءۇي قارىزى بويىنشا بەرەشەكتى ءىشىنارا نەمەسە تولىق وتەۋگە; يسلام بانكىنىڭ قارجىلاندىرۋ شەڭبەرىندە تۇرعىن ءۇي ساتىپ الۋعا; ساتىپ الۋ قۇقىعىمەن تۇرعىن ءۇيدى ۇزاقمەرزىمدى جالداۋ كەلىسىمشارتتارى بويىنشا اقىنى تولەۋگە; جەكەمەنشىك تۇرعىن ءۇيدى سالۋعا جۇمساۋعا حاقىلى.
اڭگىمەلەسكەن –
اباي ايماعامبەت,
«Egemen Qazaqstan»
