شاھار باسشىسى ءوز سوزىندە ۆاسيلي ۆاسيلەۆيچ سياقتى تۇلعالار ەلىمىزدىڭ ماقتانىشى ەكەنىن, ولاردىڭ ارقاسىندا بۇگىنگى بەيبىت ومىرگە قول جەتكىزگەنىمىزدى اتاپ ءوتتى. ارداگەرگە ەستەلىك سىيلىقتار تابىستاپ, سوعىس كەزىندەگى جانە ەلدى سوعىستان كەيىنگى دامىتۋداعى ەرەن ەڭبەگى ءۇشىن العىس ايتتى.
ۇلتتىق ۇلان اكادەمياسىنىڭ تاربيە جانە الەۋمەتتىك-قۇقىقتىق جۇمىس جونىندەگى ورىنباسارى, پولكوۆنيك ەردەن بالعىمباەۆ تا سوعىس ارداگەرىنە ءوزىنىڭ جىلى لەبىزىن ءبىلدىرىپ, سىيلىعىن تارتۋ ەتتى. ارداگەردىڭ ونەگەلى ءومىرى ءۇشىن شىنايى ريزاشىلىعىن ءبىلدىرىپ, ونىڭ ەرلىگى ۇرپاقتىڭ وتانشىل بولىپ وسۋىنە ىقپال ەتەتىنىن اتاپ ءوتتى.
ۆاسيلي ماكيەنكو 1926 جىلى 24 قاڭتاردا سولتۇستىك قازاقستان وبلىسى ۆولوشينكا اۋىلىندا دۇنيەگە كەلگەن. 1943 جىلى قازان اۋدانىنىڭ اسكەري كوميسسارياتى ارقىلى مايدانعا شاقىرىلىپ, اسكەري جولىندا 44-اتقىشتار پولكىندە, 142-اتقىشتار پولكىندە جانە 317-گۆارديالىق اتقىشتار پولكىندە قىزمەت ەتەدى. سوعىس كەزىندە ءىى دارەجەلى «وتان سوعىسى» وردەنىمەن, سونداي-اق «كەنيگسبەرگتى العانى ءۇشىن», «گەرمانيانى جەڭگەنى ءۇشىن» مەدالدارىمەن ماراپاتتالدى.
سوعىستان كەيىن ۆاسيلي ۆاسيلەۆيچ بەيبىت ومىردەگى ەڭبەك جولىن باستادى. ول سۋ قۇبىرى جۇيەسىندە جۇمىس ىستەپ, كەيىن تەحنيكالىق جابدىقتاۋ ءوندىرىسىن باسقارۋ باسقارماسى باسشىسىنىڭ ورىنباسارى بولىپ 13 جىل قىزمەت اتقاردى. 1960 جىلى زەينەتكە شىقتى.
بۇگىندە عاسىرعا تاقاعان جاسىنا قاراماستان, ارداگەر ءالى دە تىڭ. تۋعان-تۋىستارىنىڭ ورتاسىندا, ءتورت قىزدان سەگىز جيەن, التى شوبەرە سۇيگەن باقىتتى اتا. ونىڭ ەل ءۇشىن ەتكەن ەڭبەگىن تەك پەتروپاۆل جۇرتشىلىعى عانا ەمەس, بۇكىل قازاق ەلى مويىنداپ, ماقتان تۇتادى.
