جول سالاسىنىڭ ساپاسىن قاداعالاۋعا جاۋاپتى بىردەن-ءبىر مەكەمە ول – جول اكتيۆتەرىنىڭ ۇلتتىق ساپا ورتالىعى. جاۋاپتى مەكەمەنىڭ نەگىزگى مىندەتىنە جول سالۋ, رەكونسترۋكتسيالاۋ, جوندەۋ, كۇتىپ ۇستاۋ جۇمىسىن قاداعالاۋ كىرەدى. ياعني سالىنار جولدىڭ قاتپارىنا, توسەلىپ جاتقان جول قاباتىنا ساراپتاما جاسايدى. ءار وڭىردە فيليالى بار مەكەمەدەگى ينسپەكتورلار جىل سايىن 17 مىڭ شاقىرىمنان استام حالىقارالىق جانە رەسپۋبليكالىق, وبلىستىق ماڭىزى بار جولدارعا دياگنوستيكا جۇرگىزەدى. جول-قۇرىلىس ماتەريالدارىنا 220 ءتۇرلى جان-جاقتى زەرتحانالىق زەرتتەۋ جاسالادى. ورتالىقتىڭ وسىنشاما سىن ساداعىنان ءساتتى ءوتىپ, تامامدالعان ساپالى جول البەتتە ساپار جۇگىن جەڭىلدەتەدى.
سول سەبەپتى قۇرىلىسقا قاجەتتى ماتەريال دا, تاجىريبەلى مامان دا – جولعا كەپىل. جول اكتيۆتەرى ۇلتتىق ساپا ورتالىعىنىڭ قاراعاندى وبلىسىنداعى فيليالىنىڭ جول ينجەنەرى اسەل حاسەنوۆا – جىلجىمالى جول زەرتحاناسى ارقىلى وڭىردەگى جول سالاسىنا ەلەۋلى ۇلەس قوسىپ جۇرگەن جۇمىسشى مامان.
جىلجىمالى زەرتحانادا جولدى تەكسەرۋگە قاجەتتىنىڭ ءبارى بار: جول داتچيگى, گەومەتريالىق پارامەترلەردى ولشەۋ جۇيەسى, تەگىستىكتى جانە كولدەنەڭ تەگىستىكتى ولشەۋگە ارنالعان جۇيە, بەينەجازبا, GPS, مۇنىمەن قوسا اقاۋلاردىڭ سىزىقتىق ولشەمدەرىنە دەيىن ولشەيتىن قۇرىلعى. مۇنشاما تەحنولوگيانىڭ ءتىلىن تەرەڭ تۇسىنگەن بىرەگەي ينجەنەر – ۇجىمىندا باعالى مامان.
جاسىرارى جوق, جالپى جول قۇرىلىسى سالاسىندا مامان تاپشىلىعى دەگەن ماسەلە وتە وزەكتى بولىپ وتىر. جول سالىپ جاتقان مەردىگەر كومپانيالاردا زەرتحانا مەڭگەرۋشىلەرى مەن جول-قۇرىلىس ماتەريالدارىنىڭ ينجەنەرلەرى جەتىسپەيدى. مۇنىمەن قوسا اسفالت توسەۋشى, جول تەگىستەيتىن تەحنيكا, بۋلدوزەر مەن اۆتوگرەيدەر وپەراتورلارى تاپشى. بىلىكتى مەحانيزاتورلار, گەودەزيا, كارتوگراف ماماندار, مەتەورولوگتار مەن مەحانيكتەردىڭ جوقتىعى جۇمىس كۇشىن تەجەيدى. سول ءۇشىن ورتالىقتىڭ قىزمەتكەرلەرى بوس جۇمىس ورنى جارمەڭكەلەرىن قالت جىبەرمەي, قاتىسادى. كوللەدج, ۋنيۆەرسيتەت تۇلەكتەرىمەن كەزدەسىپ جاستاردى جۇمىسقا تارتادى. جول سالاسىنا قىزىعىپ كەلگەندەردى اسەل سەكىلدى جەتەكشى ينجەنەر قۋانا قارسى الىپ, بىلگەنىمەن ءبولىسىپ, تەحنولوگيانىڭ ءتۇرلى ءتاسىلىن ۇيرەتەدى. ءسويتىپ سالاداعى بىلىكتى مامان سانى جىل وتكەن سايىن ءوسىپ وتىر.
جەتەكشى ساراپشى اسەل قازىرگى قىزمەتىنە دەيىن ءتۇرلى سالادا قىزمەت اتقارىپ كەلدى. الماتىداعى حالىق شارۋاشىلىعى ۋنيۆەرسيتەتىن قارجىگەر ماماندىعى بويىنشا قىزىل ديپلوممەن ءتامامدايدى. سودان ءوزىنىڭ ومىرلىك جارىن جولىقتىرىپ, قاراعاندىعا قونىس اۋدارادى. قولىنداعى قىزىل ديپلومىمەن قاراعاندى قالاسىنىڭ تەرگەۋ يزولياتورىنىڭ ەسەپ بولىمىنە جۇمىسقا ورنالاسادى. وسىندا جەمىستى ەڭبەك ەتىپ جۇرگەن ول باسقا جۇمىسقا اۋىسۋدى ويلاستىرادى. سول كەزدە قايىن اتاسى قاراجال قالاسىنداعى جولعا جاۋاپتى مەكەمەنى باسقارىپ تۇرعان كورىنەدى. اتاسى اقىل ايتىپ, نۇسقاۋ كورسەتكەن سوڭ «كازاحاۆتودور» مەكەمەسىنە جۇمىسقا تۇرىپتى. «وسى كەزدەن باستاپ جول قۇرىلىس سالاسى باۋرادى», – دەيدى. ءداپ وسى جەردە ەڭبەك ەتە ءجۇرىپ, جول ينجەنەرى مەن زاڭگەر ماماندىعىن وقىپ الىپتى. قازىر قوس ديپلومى, وقىعان ءبىلىمى وزىنە ۇلكەن كومەك. ول جىل سايىن بىلىكتىلىكتى ارتتىراتىن كۋرستان دا قالمايدى. ويتكەنى تەحنولوگيا اي سايىن جاڭارىپ, جاڭعىرىپ وتىرادى.
جول ينجەنەرى سالاۋاتتى ءومىر سالتىن بەرىك ۇستانادى. سپورتتىڭ ءتۇر-تۇرىنەن حابارى بار. جىل سايىن ورتالىقتىڭ بارلىق وڭىردەگى فيليال قىزمەتكەرلەرى اراسىندا ءتۇرلى سپورتتىق سايىس ۇيىمداستىرىلادى. سونىڭ بارىنە بەلسەندى قاتىسىپ, وڭىردەگى قوسىننىڭ قورجىنىن جۇلدەگە تولتىرىپ ءجۇر. ۆولەيبول سەكىلدى دوپ دودالارى, دويبى, تەننيس سەكىلدى تاقتاداعى تارتىستا دا الدىنا جان سالمايتىن قابىلەتى بار.
اسەل – اياۋلى جار, كەلىستى كەلىن, اسىل انا. شاڭىراعىنا شۋاق شاشىپ وتىرعان ونىڭ كوزىنىڭ اعى مەن قاراسىنداي بولعان قوس ق ۇلىنى بار. وتاعاسى جەكە كاسىپپەن اينالىسادى. وتباسىنداعىلار بىلىكتى جول قۇرىلىس ينجەنەرىنە ۇلكەن قولداۋ كورسەتەدى. جەتىستىكتەرىمەن ماقتانادى, مارقايادى. ايتپەسە جاۋاپتى جۇمىستىڭ جۇگى اۋىر. بىلىكتى ينجەنەردىڭ جول سالاسىنا ءسىڭىرىپ جۇرگەن ەڭبەگى وسىنداي جارقىن.
قاراعاندى وبلىسى
