فوتو: ن.بايبۋلين
ماۋلەن اشىمباەۆ ازاماتتاردىڭ ءال-اۋقاتىن ارتتىرۋ جانە دامىعان, ينكليۋزيۆتى, اشىق قازاقستان قالىپتاستىرۋ ءۇشىن قولعا الىنعان شارالاردى ىسكە اسىرۋ جولىندا بارلىق ەل ازاماتتارىنىڭ كۇش-جىگەرىن بىرىكتىرۋ ماڭىزدى ەكەنىن ايتتى. سونداي-اق ول مەملەكەت باسشىسىنىڭ رەفورمالار باعدارىن زاڭنامالىق تۇرعىدان قامتاماسىز ەتۋ سەنات قىزمەتىنىڭ نەگىزگى باسىمدىعى بولىپ قالا بەرەتىنىن ايتىپ, پالاتا جۇمىسىنىڭ الداعى باسىم باعىتتارىنا نازار اۋداردى.
«پرەزيدەنتىمىز قاسىم-جومارت كەمەل ۇلى توقاەۆ ۇكىمەتتىڭ كەڭەيتىلگەن وتىرىسىندا ەلىمىزدىڭ الداعى جىلدارداعى الەۋمەتتىك-ەكونوميكالىق دامۋىنا قاتىستى ماڭىزدى باعىتتاردى بەلگىلەپ بەردى. مەملەكەت باسشىسى بەرگەن تاپسىرمالار قاتارىندا سالىق-بيۋدجەت ساياساتىن رەفورمالاۋدى كوزدەيتىن جاڭا بيۋدجەت جانە سالىق كودەكستەرى بار. سونداي-اق پارلامەنت جەر قويناۋىن پايدالانۋشىلاردىڭ بىرىڭعاي پلاتفورماسىن زاڭنامالىق تۇرعىدان قامتاماسىز ەتۋ جانە تسيفرلىق اكتيۆتەردى قولدانۋ اياسىن كەڭەيتۋ ءۇشىن ينفراقۇرىلىم قۇرۋ جونىندە تۇزەتۋلەر قابىلداۋعا ءتيىس. وسى سەسسيانىڭ سوڭىنا دەيىن مىندەتتى الەۋمەتتىك مەديتسينالىق ساقتاندىرۋ جۇيەسىن جەتىلدىرۋ تۋرالى زاڭ جوباسىن دا پىسىقتاۋىمىز كەرەك. جۇكتەلگەن مىندەتتەردى ىسكە اسىرۋ جولىندا ناقتى شەشىمدەر مەن جۇيەلى جۇمىس قاجەت», دەدى سەنات توراعاسى.
پالاتا وتىرىسىندا سەناتورلار ماڭىزدى ماسەلەلەرگە قاتىستى دەپۋتاتتىق ساۋالدارىن دا جولدادى.
نۇرتورە ءجۇسىپ ەلىمىزدە ەرتە جۇكتىلىكتىڭ جانە جاسوسپىرىمدەر اراسىندا تۋ كورسەتكىشىنىڭ ارتۋىنا الاڭداۋشىلىق ءبىلدىردى. وسىعان بايلانىستى ول رەپرودۋكتيۆتى دەنساۋلىق ساقتاۋ سالاسىنداعى جۇمىستى ۇلتتىق دەڭگەيدە جۇيەلەۋ جانە بالالار مەن جاسوسپىرىمدەر اراسىندا ءتيىستى ءتۇسىندىرۋ جۇمىستارىن كۇشەيتۋ قاجەت ەكەنىنە توقتالدى.
ال اندرەي لۋكين تۇركىستان وبلىسىنىڭ تاۋلى اۋداندارىندا توتەنشە جاعدايدىڭ الدىن الۋعا ارنالعان جۇمىستى ۇيىمداستىرۋ جانە حابارلاندىرۋ جۇيەسىمەن قامتۋ تومەن دەڭگەيدە ەكەنىن ورتاعا سالدى. اتالعان ماسەلەنى شەشۋ ءۇشىن سەناتور بىرقاتار شارا ۇسىندى. ولاردىڭ قاتارىندا حابارلاندىرۋ جۇيەلەرىنىڭ جاي-كۇيىنە مونيتورينگ جۇرگىزۋ ءۇشىن بىرىڭعاي تسيفرلىق پلاتفورما قۇرۋ سىندى ۇسىنىستارىن جەتكىزدى.
عالياسقار سارىباەۆ جاساندى ينتەللەكت الەۋەتىن كەڭىنەن پايدالانۋ جانە ۇلكەن دەرەكتەرمەن جۇمىس ىستەۋ باعىتىنداعى ماڭىزدى مىندەتتەرگە ۇكىمەتتىڭ نازارىن اۋداردى.
جاننا اسانوۆا ەلدە تەلەفون الاياقتارىنا قاتىستى وقيعالاردىڭ كوبەيگەنىن ايتىپ, دابىل قاقتى. سەناتوردىڭ ايتۋىنشا, ۇيالى نومىرلەردى جاسىرىن پايدالانۋدى بولدىرماۋ ءۇشىن SIP-تەلەفونيانى ليتسەنزيالاناتىن قىزمەت تۇرلەرىنىڭ تىزىمىنە قوسۋ جانە SIP-تەلەفونيا مەن SIM-بوكس ماشينالارىن ليتسەنزياسىز پايدالانعانى ءۇشىن جاۋاپكەرشىلىكتى قاتاڭداتۋ قاجەت.
ساكەن ارۋباەۆ مال شارۋاشىلىعىنا, ونىڭ ىشىندە تەرى مەن ءجۇندى قايتا وڭدەۋ سالالارىنا قاتىستى وزەكتى ماسەلەلەرگە توقتالدى. دەپۋتات شاعىن جانە ورتا كاسىپورىندارعا ارنالعان سۋبسيديا مەن جەڭىلدىكپەن بەرىلەتىن نەسيەلەردىڭ قولجەتىمسىزدىگى, مەملەكەت تاراپىنان جۇيەلى قولداۋ باعدارلامالارىنىڭ بولماۋى جانە شيكىزات ساپاسىنىڭ تومەندىگى سالانىڭ دامۋىنا قولبايلاۋ بولىپ وتىرعانىن باياندادى.
