فوتو: اشىق دەرەككوز
«قوعامداعى قۇقىقتىق ءتارتىپ پەن ادام قۇقىقتارىن قورعاۋ – ەلدىڭ تۇراقتىلىعى مەن دامۋى ءۇشىن ماڭىزدى فاكتورلار. پرەزيدەنت قاسىم-جومارت توقاەۆتىڭ قۇقىقتىق ءتارتىپتى نىعايتۋ مەن ادام قۇقىقتارىن قورعاۋدىڭ ماڭىزدىلىعىن اتاپ ءوتۋى – مەملەكەتتىڭ دامۋىنا جول اشاتىن ۇلكەن قادام. «زاڭ مەن ءتارتىپ» قاعيداسى حالىقتىڭ ساناسىنا تەرەڭ ءسىڭۋى قاجەت. قاراپايىم ازاماتتاردان باستاپ جوعارى لاۋازىمدى شەنەۋنىكتەرگە دەيىن ءوز ارەكەتتەرىن قۇقىقتىق نورمالار تۇرعىسىنان باعالاۋى ءتيىس. سونىمەن قاتار ءاربىر قۇقىق بۇزۋشىلىققا «مۇلدەم توزبەۋشىلىك» قاعيداتىنىڭ ۇستانىلۋى قوعامدا ادىلەتتىلىكتى قامتاماسىز ەتىپ, ءتارتىپتى ورناتۋعا نەگىز بولادى. زاڭدى ساقتاۋدىڭ جالعىز جولى تەك جازادان قورقۋ ەمەس, تەرەڭ ىشكى سەنىم بولۋى كەرەك. بۇل – قوعامداعى ادىلەتتىلىكتى قامتاماسىز ەتىپ, ءتارتىپتى ورناتۋعا نەگىز بولادى», دەپ جازدى ن. بايتىلەسوۆ.
دەپۋتاتتىڭ پىكىرىنشە, تاريح پەن الەمدىك تاجىريبە كورسەتكەندەي, ءتارتىپتى قامتاماسىز ەتۋ ءۇشىن بەلگىلى شارالاردىڭ بولۋى قاجەت.
«ديالوگ پەن تۇسىنىستىك ارقىلى قوعامدا كەلىسىم مەن تاتۋلىقتى ساقتاۋ – ەلدىڭ تۇراقتىلىعىنىڭ كەپىلى. باۋىرجان مومىش ۇلى ء«تارتىپسىز ەل بولمايدى, تارتىپكە باعىنعان قۇل بولمايدى» دەگەن. سوندىقتان زاڭعا باعىنۋ, ءتارتىپتى بولۋ – قۇل بولعاننىڭ بەلگىسى ەمەس, كەرىسىنشە ادىلەتتى قوعام قۇرۋعا قوسقان ۇلەس. مەملەكەت باسشىسىنىڭ بۇل ماسەلەگە كوڭىل ءبولۋى ازاماتتاردىڭ قۇقىقتارى مەن بوستاندىقتارىن قورعاۋ جانە ەلدىڭ دامۋى ءۇشىن وتە ماڭىزدى», دەدى دەپۋتات.
نۇرسۇلتان بايتىلەسوۆ مەملەكەت زاڭ مەن ءتارتىپتى قامتاماسىز ەتۋ ءۇشىن ۇلكەن جاۋاپكەرشىلىك الىپ وتىرعانىن تىلگە تيەك ەتتى. بۇل تەك بيلىكتىڭ مىندەتى عانا ەمەس, ءاربىر ازاماتتىڭ دا ورتاق مىندەتى ەكەنىن ءتۇسىنۋ كەرەك.
«مەملەكەت پەن قوعام اراسىندا زاڭدى قۇرمەتتەۋ مەن وعان باعىنۋ ارقىلى بارشامىز ادىلەتتى قوعام قۇرۋعا ۇلەس قوسامىز.زاڭعا قۇرمەتتىڭ نەگىزى وتباسىندا قالانادى. مەملەكەت ءداستۇرلى وتباسى قۇندىلىقتارىن قولداپ, بالالارعا ەرەجەلەر مەن نورمالاردى قۇرمەتتەۋدى ۇيرەتۋگە ۇندەيدى. بۇل قۇقىقتىق ءتارتىپتىڭ نىعايۋىنا ىقپال ەتەتىنى ءسوزسىز», دەپ قورىتىندىلادى دەپۋتات.
