قوعامدىق پروتسەستەردى زەرتتەۋ ورتالىعىنىڭ ساراپشىسى دامير بەلگىباەۆ بۇگىنگى وتكەن ۇكىمەتتىڭ كەڭەيتىلگەن وتىرىسىندا كوپتەگەن ماسەلەلەردىڭ قوزعالعانىن, ونىڭ ىشىندە, تۋريزم, اگروشارۋاشىلىق, ينۆەستيتسيا تارتۋ ماسەلەلەرىنە اسا كوڭىل بولىنگەندىگىن اتاپ ءوتتى.
«مەملەكەت باسشىسىنىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا «قازاقستان ءوزىنىڭ قارجىلىق پروبلەمالارىن قالاي شەشەدى؟» دەگەن باستى ساۋال تۇردى. ونىڭ شەشىمدەرى پرەزيدەنتتىڭ باستاماسىمەن ايتىلدى. جالپى, 2024 جىلى ەل ەكونوميكاسىن ارتقا تارتقان بىرنەشە جاعدايلار بولدى. سونىڭ ءبىرى – تاسقىن سۋ اپاتى. ەل ەكونوميكاسى, ارينە, بيۋدجەتتىڭ كىرىس بولىگى سانالاتىن سالىق ەسەبىنەن قايتا تولاتىنى بەلگىلى. وتكەن جىلى وسى باعىتتا ۇلكەن ماسەلەلەر بايقالدى, مىسالى, بىلتىر رەسپۋبليكالىق بيۋدجەتتە 12 ترلن-نان استام سالىق جينالعانىمەن بۇل جوسپاردان از بولىپ شىقتى. سونىمەن قاتار, باسقا دا بيۋدجەت شىعىندارى كىرىستەرگە قاراعاندا ءوسىپ كەلەدى, سەبەبى, ءبىز الەۋمەتتىك مەملەكەتپىز. بۇل جەردە كوپتەگەن الەۋمەتتىك تولەمدەر بار. مۇنىڭ بارلىعىن قايتا تولتىرۋ – سالىق رەفورماسىن قايتا قاراۋ قاجەتتىلىگىن كورسەتەدى», دەيدى ساراپشى.
پرەزيدەنت تاپسىرمالارىنىڭ باستى ماقساتى – ەلىمىزدىڭ ەكونوميكالىق-الەۋمەتتىك تۇراقتىلىعىن قامتاماسىز ەتۋ, سونداي-اق ساپالى دامۋدى جەدەلدەتۋ ەكەنى بەلگىلى.
«وتكەن جىلى 2029 جىلعا دەيىن قازاقستان ەكونوميكاسىنىڭ كولەمىن 450 ملرد دوللارعا دەيىن جەتكىزۋ ماقساتى قويىلعان ەدى. بۇل ارينە ستراتەگيالىق ماقسات. وسى ماقساتتى ارى قاراي جالعاستىرۋ, سونداي-اق حالىقتىڭ تابىسىن ارتتىرۋ ءۇشىن بۇگىنگى بەرىلگەن تاپسىرمالاردى ناقتى ورىنداۋ – ۇكىمەتتىڭ باستى مىندەتى», دەيدى ول.
ساراپشىنىڭ ايتۋىنشا, قازاقستان – ورتا دەرجاۆالى الەۋەتى جوعارى مەملەكەت. سوندىقتان ينۆەستيتسيا تارتۋ ماسەلەسىندە شەتەلدىك بولسىن, وتاندىق بولسىن ينۆەستورلاردى قولداۋ ءۇشىن جەڭىلدىكتەر جاساۋ قاجەت. سونىمەن قاتار, جاڭا ەكونوميكاعا سەرپىن بەرەتىن كريپتاۆاليۋتا, ونلاين ساۋدا, جاساندى ينتەللەكت – زاماناۋي كرەاتيۆتى ويلاردى دامىتاتىن, ەل ەكونوميكاسىنا تۇرتكى بولاتىن سالالار.
«ەۋرازيانىڭ جۇرەگى سانالاتىن قازاق جەرى وتە قولايلى ورنالاسقان. سول الەۋەتىمىزدى پايدالانىپ ينفراقۇرلىمدى, ياعني, شىعىس پەن باتىستى بايلانىستىراتىن جولداردى سالۋ جانە ولاردى جوعارى دەڭگەيدە ۇستاپ وتىرۋ ەل ەكونوميكاسىنىڭ دامۋىنا سەبەپ بولاتىن العىشارتتاردىڭ ءبىرى. سونىمەن قاتار ەل ەكونوميكاسىنىڭ تاعى ءبىر رەتتەۋشى سالاسى – اۋىل شارۋاشىلى. بيىل اۋىل شارۋاشىلىعى مينيسترلىگى تاپسىرمالاردى 12 پايىزعا ارتىق ورىنداعانىمەن بۇل سالا دا دامۋدى تالاپ ەتەدى.
سونىمەن قاتار ينۆەستيتسيالىق شتابتىڭ مىندەتىن قايتا قاراۋ – ۇكىمەتتىڭ ەڭ باستى ماسەلەسى رەتىندە قاراستىرىلدى. پرەزيدەنت بيۋروكراتيزمنىڭ ۇكىمەت جۇمىسىنا كەدەرگى كەلتىرىپ وتىرعانىن, سونداي-اق ول ءۇشىن الداعى ۋاقىتتا جۇيەلى ۇستانىمدار مەن جەدەل ارەكەتتەر قاجەت ەكەندىگىن ايتتى», دەيدى د. بەلگىباەۆ.
ونىڭ ايتۋىنشا, جالپى, ۇكىمەتتىڭ جۇمىسى «قاناعاتتاندىرارلىق» دەپ باعالانعانىمەن پرەزيدەنت بولشاقتا ايتارلىقتاي جۇمىس ىستەۋ قاجەتتىگىن اتاپ ءوتتى. مەملەكەتتىك قىزمەتكەرلەر جاڭاشىلدىقتان قورىقپاي قىزمەت اتقارۋى قاجەت.
