مەملەكەت تاريحى ينستيتۋتىنىڭ جەتەكشى عىلىمي قىزمەتكەرى, ساياسي عىلىمدارىنىڭ كانديداتى باۋىرجان شەريازدانوۆ پرەزيدەنتتىڭ بۇگىنگى جيىندا ەل كوكەيىندەگى ساۋالدارعا جاۋاپ بەرگەنىن, قازاقستان الەمدەگى تاريفتىك تارتىستار مەن سانكتسيالىق تەكەتىرەستەر كەزىندە ەكونوميكالىق-الەۋمەتتىك دامۋ جولىنان تانباۋ ءۇشىن, ءار سالانى جاڭاشىلدىققا بەيىمدەپ, ءتيىمدى باعدار ۇستانۋى قاجەت ەكەنىن اتاپ ءوتتى.
«پرەزيدەنت بۇگىنگى وتىرىستا قوعام, حالىق اراسىندا كوتەرىلىپ جۇرگەن كوپ سۇراقتارعا جاۋاپ بەرە وتىرا ەلىمىزدەگى ساياسي, الەۋمەتتىك, ەكونوميكالىق, قارجىلىق, سالىقتىق جاعدايدى تولىق قاداعالاپ وتىرعانىن بايقاتتى. بۇل قاراپايىم حالىققا ەرتەڭگى كۇنگە سەنىممەن قاراۋعا مۇمكىندىك ۇيالاتادى», دەدى باۋىرجان شەريازدانوۆ.
ساياسي ساراپشى پرەزيدەنت باستامالارى جەكەلەي سالالارعا دا سەرپىن بەرەتىنىنە نازار اۋداردى.
«تۇرمىستى تۇزەۋگە ىقپالدى اگروونەركاسىپ كەشەنىنىڭ الەۋەتىن ارتتىرۋ قاجەتتىگىن مەملەكەت باسشىسى تاعى دا قايتالاپ ايتتى.
ءبىرىنشى. شارۋالاردى قولداۋ تەتىكتەرىن قايتا قاراۋ. پرەزيدەنت نەسيە بەرۋ راسىمدەرىن جەڭىلدەتۋدىڭ ماڭىزدىلىعىنا توقتالدى. بۇل تاسىلدەردىڭ قاجەتتىلىگىنىڭ مىسالى رەتىندە ەگىننىڭ رەكوردتىق كولەمىنە قاراماستان باعانىڭ تومەندەگەنىن اتاپ ءوتتى.
ەكىنشى. اۋىل شارۋاشىلىعى ونىمدەرىنىڭ ەكسپورتىنا قولداۋ كورسەتە وتىرىپ, رەنتابەلدى داقىلداردى ءوسىرۋ باعىتىن جالعاستىرۋ. وسى ورايدا, ەت ونىمدەرىن ەكسپورتتاۋ الەۋەتىن دامىتۋدىڭ ماڭىزدى ەلەمەنتتەرىنىڭ ءبىرى رەتىندە مالدى ۆاكتسيناتسيالاۋدىڭ جانە ولاردىڭ اراسىنداعى ىندەتكە قارسى تۇرۋدىڭ ماڭىزدىلىعىن اتاپ ءوتتى. قاجەتتى ينفراقۇرىلىمدى, ونىڭ ۇستىنە اۋىلداعى تۇرمىس جاعدايىن دامىتپاي تۇرىپ, اگروونەركاسىپ كەشەنىن دامىتۋ مۇمكىن ەمەس. اۋىلداردا تۇرمىس دەڭگەيىن ارتتىرۋ بويىنشا نەگىزگى مىندەتتەردىڭ قاتارىندا ينفراقۇرىلىمدى دامىتۋ جانە شاعىن جانە ورتا بيزنەس پەن بيزنەس باستامالاردى قولداۋ بولىپ تابىلادى», دەدى باۋىرجان شەريازدانوۆ.
وسى جىلدى ەل باسشىسى «جۇمىسشى ماماندىقتارى جىلى» دەپ جاريالاعانى بەلگىلى. ۇكىمەتتىڭ كەڭەيتىلگەن وتىرىسىندا پرەزيدەنت اتاۋلى جىل اياسىندا كاسىپتەردىڭ بەدەلىن ارتتىرۋعا باعىتتالعان بىرقاتار شارالار قابىلدايتىنىن تىلگە تيەك ەتتى. باۋىرجان شەريازدانوۆ بۇل باستاما كادرلاردىڭ كاسىبي بىلىكتىلىگىن شىڭداپ, تۇرمىسىن تۇزەۋگە اشىلعان داڭعىل جول ەكەنىنە دە توقتالدى.
«جۇمىسشى ماماندىقتارى جىلى» اياسىندا جۇمىسشى كاسىپتەردىڭ بەدەلىن ارتتىرۋعا باعىتتالعان بىرقاتار شارالار قابىلداناتىن بولادى. اتاپ ايتقاندا, كاسىپتىك جانە تەحنيكالىق ءبىلىم بەرۋ جۇيەسىن تولىق قايتا قاراۋ جوسپارلانىپ وتىر. بيزنەستى وسى جۇمىسقا كەڭىنەن تارتۋ ءۇشىن بارلىق تجكب ۇيىمدارى ءۇشىن مەملەكەتتىك تاپسىرىس مولشەرى ۇلعايتىلادى جانە تەڭەستىرىلەدى. ءوز كەزەگىندە اكىمدەر كاسىپكەرلەرمەن بىرلەسىپ وڭىرلەر ءۇشىن باسىم ماماندىقتاردى ايقىنداپ, كوللەدجدەردى سۇرانىسقا يە كادرلاردى دايارلاۋعا باعدارلاۋ مۇمكىندىگىن يەلەنەدى.
مەملەكەت باسشىسى مەملەكەتتىك اپپارات جۇمىسىنىڭ تيىمدىلىگىن ارتتىرۋ مىندەتىن قويدى. اتاپ ايتقاندا, جەرگىلىكتى اتقارۋشى ورگاندار جەلىسى بويىنشا «اكىمدەر مەكتەبى» اۋقىمدى ءبىلىم بەرۋ جوباسىن ىسكە قوسۋ تاپسىرىلدى (سايلانعان اكىمدەر, اسىرەسە بۇرىن مەملەكەتتىك قىزمەتتە جۇمىس ىستەمەگەندەر ءۇشىن). سونداي-اق, «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ شارالارى رەتىندە مەملەكەتتىك اپپاراتتىڭ ازاماتتاردىڭ وتىنىشتەرىمەن جۇمىس جاساۋىنا نازار اۋدارىلدى. بۇل رەتتە, تەك تىڭداپ قانا قويماي, كوتەرىلگەن ماسەلەلەردى شەشۋ ءۇشىن جۇيەلى جۇمىس جۇرگىزۋ ماڭىزدى», دەدى مەملەكەت تاريحى ينستيتۋتىنىڭ جەتەكشى عىلىمي قىزمەتكەرى.
