فوتو: اقوردا
بۇگىن ۇكىمەتتىڭ كەڭەيتىلگەن وتىرىسىندا وتە وزەكتى ماسەلەلەر تاقىلانادى. پرەزيدەنت ۇكىمەتتىڭ كەڭەيتىلگەن وتىرىسىندا جاھاندىق وزگەرىستەردىڭ ەلىمىزگە اسەرىن اتاپ ءوتتى.
«جاپپاي تسيفرلاندىرۋ ءداۋىرى, ياعني جاڭا تەحنولوگيالىق كەزەڭ باستالدى. كۇللى الەم مۇلدەم باسقا جاعدايدا ءومىر سۇرەدى. ءبىز سوعان مىندەتتى تۇردە دايىن بولۋىمىز كەرەك. جاڭا تەحنولوگيالىق احۋالعا ساقاداي ساي تۇرۋىمىز قاجەت. بۇل – ەلىمىزدىڭ باسەكەگە قابىلەتىن ارتتىرىپ, تۇراقتى دامۋىنا جول اشاتىن اسا ماڭىزدى فاكتور», دەدى مەملەكەت باسشىسى.
پرەزيدەنت ۇكىمەت پەن اكىمدەردىڭ جۇمىسى قانشالىقتى ءتيىمدى ەكەنىن الدىمەن ەكونوميكانىڭ دامۋ كورسەتكىشتەرى مەن ازاماتتاردىڭ تۇرمىس ساپاسىنا قاراي باعالايتىنىن تىلگە تيەك ەتتى. وسى جۇمىستىڭ ناتيجەسى بىلتىر قانداي بولدى؟ نەگىزگى مىندەتتەر ورىندالدى ما؟ بۇگىن وسى سۇراقتارعا توقتالىپ جانە جاقىن ارادا شەشىمىن تابۋعا ءتيىس وزەكتى ماسەلەلەر تالقىلانادى.
