جاس عالىم ۇلىبريتانياداعى وكسفورد جاھاندىق جانە ايماقتىق زەرتتەۋلەر مەكتەبىندە «ايماقتانۋ» ماماندىعىندا وقىماق. وقۋدى اياقتاعاننان كەيىن ارىستانبەك وكسفورد ۋنيۆەرسيتەتىنىڭ قاۋىمداستىرىلعان تۇلەگى مارتەبەسىن الادى. بۇعان دەيىن گارۆاردقا (اقش) شاقىرتۋ الىپ, عىلىمي قىزمەتكەر رەتىندە جۇمىس ىستەگەن بولاتىن.
قىتايتانۋ كافەدراسىنان باستالعان عىلىمي ساپار ونى وكسفورد ۋنيۆەرسيتەتىنە جەتەلەپ اكەلدى. شىمكەنت قالاسىنداعى №40 مەكتەپ-گيمنازيانى «التىن بەلگىمەن» بىتىرگەن ارىستانبەك قازۇۋ-عا وقۋعا ءتۇسىپ, شىعىستانۋ فاكۋلتەتىندە ءبىلىم الا ءجۇرىپ, قىتاي ءتىلىن جەتىك مەڭگەردى, عىلىمعا دەگەن قىزىعۋشىلىعىن شىڭدادى. وسى قابىلەتتەرىنىڭ ارقاسىندا قىتاي ۇكىمەتىنىڭ تولىق گرانتىن جەڭىپ الىپ, شانحاي حالىقارالىق زەرتتەۋلەر ۋنيۆەرسيتەتىندە ءبىلىمىن جالعاستىردى. شانحايدا وقىعان جىلدارى قىتايدى عانا ەمەس, ازيا-تىنىق مۇحيتى ايماعىنىڭ وزەكتى ماسەلەلەرىن زەرتتەۋمەن اينالىستى. بۇل ساپار وعان ايماق ەلدەرىنىڭ مادەنيەتى مەن ساياساتىن تەرەڭ تۇسىنۋگە مۇمكىندىك بەردى. سونىمەن قاتار وڭتۇستىك كورەيا, سينگاپۋر, مالايزيادا وتكەن حالىقارالىق كونفەرەنتسيالارعا قاتىستى.
ماگيسترلىك ديسسەرتاتسياسىن اعىلشىن تىلىندە قورعاپ, ەلگە ورالعان ارىستانبەك ءوز مانسابىن اقپارات جانە قوعامدىق دامۋ مينيسترلىگىندە باستادى. حالىقارالىق ىنتىماقتاستىق پەن جاستار ساياساتى سالاسىندا جۇمىس ىستەي ءجۇرىپ, ەلدەگى ماڭىزدى جوبالاردى ۇيلەستىردى. عىلىمي جۇمىسقا دەگەن ىنتاسى ونى قازۇۋ-عا قايتا اكەلدى. ۋنيۆەرسيتەتتە شىعىستانۋ سالاسىنان ءدارىس وقىپ, ازيا ەلدەرىنىڭ جاھاندىق ۇدەرىسكە اسەرىن زەرتتەدى.
