جەدەل باسقارۋ ورتالىعىنىڭ «102» پۋلتىنە كۇنىنە 3 مىڭعا جۋىق تەلەفون قوڭىراۋى تۇسەدى. ولاردى ارنايى وقۋدان وتكەن 14 وپەراتور وڭدەيدى.
تالداۋ كورسەتكەندەي, قوڭىراۋلاردىڭ 25 % اقپاراتتىق-انىقتامالىق ماقساتتا ەكەن.
- توتەنشە جاعدايلار قىزمەتتەرىنە قوڭىراۋ شالۋ اسا قاجەتتىلىكپەن نەگىزدەلۋى كەرەك ەكەنىن ءتۇسىنۋ ماڭىزدى. «102» نومىرىنە قوڭىراۋ شالعان كەزدە قاجەتتى اقپاراتتى انىق جانە دۇرىس بەرىپ, نە بولعانىن ءتۇسىندىرۋ كەرەك. وسى كەڭەستەردى ورىنداۋ بىرەۋدىڭ ءومىرىن ساقتاپ قالۋعا جانە جەدەل قىزمەتتى قاتە شاقىرماۋعا كومەكتەسەدى, - دەدى قالالىق پد جەدەل باسقارۋ ورتالىعىنىڭ باسشىسى زۋحراب مىرزاعالي.
سونداي-اق ورتالىق باسشىسى قوڭىراۋلاردى قابىلداۋ ءۇشىن جەدەل باسقارۋ ورتالىعى پايدالاناتىن جابدىق اۆتوماتتى رەجيمدە جۇمىس ىستەيتىنىن ايتتى.
ءاربىر قوڭىراۋ كەزەك تارتىبىمەن قابىلدانادى. كوپتەگەن قالا تۇرعىندارى جاۋاپ الۋ ءۇشىن بىرنەشە سەكۋند كۇتكەننەن كەيىن تەلەفوندى قويا سالادى. ولار «102» نومىرىنە قايتا قوڭىراۋ شالسا, وزدەرىنىڭ قوڭىراۋىنا بىردەن جاۋاپ بەرەدى دەپ قاتەلەسەدى. بىراق بۇل جەردە باعدارلامانىڭ اۆتوماتتى ەكەنىن ەسكەرۋ ماڭىزدى, ادام فاكتورى جوق. ءسىز قوڭىراۋدى ءۇزىپ, «102» ءنومىرىن قايتا تەرگەندە, باعدارلاما ءسىزدى كەزەكتىڭ سوڭىنا قاراي باعىتتايدى. سوندىقتان قوڭىراۋدى تاستاي سالماي, وپەراتوردىڭ جاۋابىن كۇتۋدى ۇسىنامىز, - دەدى زۋحراب مىرزاعالي.
