بىلتىر اگەنتتىك 2024 جىلعى 1 قاڭتارداعى جاعداي بويىنشا بانك جۇيەسى اكتيۆتەرىنىڭ 85%-ىن قۇراعان 11 ءىرى بانكتىڭ اراسىندا تۇراقتى AQR وتكىزدى. باعالاۋ كولەمى 27,4 ترلن تەڭگەگە جەتتى, بۇل وتكەن جىلمەن سالىستىرعاندا 31,3%-عا ارتىق. بەرەشەكتىڭ نەگىزگى بولىگى كەپىلسىز تۇتىنۋشىلىق قارىزدارعا (9 ترلن تەڭگە), ءىرى بيزنەسكە (4,4 ترلن تەڭگە), شاعىن بيزنەسكە (3,4 ترلن تەڭگە) جانە ينۆەستيتسيالىق جوبالار (3,1 ترلن تەڭگە) قارىز پورتفەلدەرىنە تيەسىلى. جەكە نەگىزدە 1 583 ءىرى قارىز الۋشى, سونداي-اق 856 قوسالقى قارىز الۋشى مەن كەپىلگەرلەر باعالانىپ, جالپى قارىزى 9,6 ترلن تەڭگەنى قۇرادى. جالپى سوماسى 17,8 ترلن تەڭگە 29,9 ملن قارىز ۇجىمدىق نەگىزدە تالداندى.
«تۇراقتى AQR ناتيجەلەرى سەكتوردىڭ جۇيەلىك دەڭگەيدەگى تۇراقتىلىعىن راستادى. 11 بانك بويىنشا كاپيتالدىڭ جەتكىلىكتىلىك دەڭگەيى 16,3%-دى قۇرادى, بۇل بەلگىلەنگەن نورماتيۆتىك ەڭ تومەنگى 5,5%-دىق دەڭگەيدەن ەداۋىر جوعارى. بانكتەر مەن AQR اراسىنداعى رەزەرۆتەردى باعالاۋداعى ايىرماشىلىق 415,1 ملرد تەڭگەنى قۇرادى. 2-ساتىداعى بەرەشەكتەر 492,7 ملرد تەڭگەگە, 1,5%-دان 3,3%-عا دەيىن ۇلعايدى, ال 3-ساتىداعى بەرەشەكتەر 327,8 ملرد تەڭگەگە, 8,6%-دان 9,8%-عا دەيىن ۇلعايدى», دەپ مالىمدەدى اگەنتتىك.
«وسىلايشا, 2023 جىلعى تۇراقتى AQR-مەن سالىستىرعاندا باعالاۋ ناتيجەلەرى جاقسارعان. بانكتەردىڭ نەسيە پورتفەلىنىڭ وسۋىنە قاراماستان, رەزەرۆتەر بويىنشا تۇزەتۋلەر 36,1 ملرد تەڭگەگە ازايدى. تۇتاستاي العاندا, پورتفەلدىڭ جالپى وسىمىمەن, جەكەلەگەن پورتفەلدەر بويىنشا قارىز الۋشىلاردىڭ قارجىلىق جاعدايىنىڭ جاقسارۋىمەن, سونداي-اق پروبلەمالىق قارىز الۋشىلار بويىنشا پروۆيزيالاردى ەسەپتەن شىعارۋ, وتەۋ جانە قالىپتاستىرۋ جونىندەگى بانكتەردىڭ جۇمىسىنا بايلانىستى كرەديتتىك پورتفەلدىڭ ساپاسىنىڭ ارتۋى بايقالدى», دەلىنگەن مالىمدەمەدە.
