جيىندا «وتانداستار قورى» كەاق پرەزيدەنتى دانيار قادىروۆ: « ۇلى دالا» كىتاپتار سەرياسى جوباسى 2023 جىلى باستاۋ العان. سودان بەرى شەتەلدە تۇراتىن قازاق قالامگەرلەرىنىڭ 20-دان استام كىتابى جارىق كوردى. بۇل تۋىندىلار ارنايى قۇرىلعان كوميسسيانىڭ ساراپتاۋى ناتيجەسىندە تاڭدالدى. كوميسسيا قاراۋىنا وتكەن جىلى 100-دەن استام ءارتۇرلى جانردا جازىلعان شىعارمالار كەلىپ ءتۇسىپ, وسىلاردان توعىزى تاڭدالىپ الىندى. ساراپشىلار كىتاپتىڭ تاربيەلىك جانە ۇلتتىق بىرەگەيلىكتى ساقتاۋداعى ماڭىزىنا ءمان بەرەدى. سونداي-اق اۆتورلاردىڭ جازۋ مانەرى مەن ءتىل بايلىعى دا ەسكەرىلەدى. جوبا اياسىندا جارىق كورگەن كىتاپتار ەلىمىزدىڭ كىتاپحانالارى مەن مەكتەپتەرىنە تەگىن تاراتىلادى», دەدى.
سەنات دەپۋتاتى عالياسقار سارىباەۆ تا شىعارمالارى جارىق كورگەن اۆتورلاردى قۇتتىقتادى. «جاھاندانۋ كەزىندە كەز كەلگەن مەملەكەت ءوزىنىڭ ءتىلىن, ءدىنىن, ءدىلىن تازا ۇستاپ, بىرەگەيلىگىن ساقتاپ قالۋعا تىرىسادى. سول سەبەپتى مىنا جارىق كورگەن كىتاپتار جەرگە تۇسكەن ءدان سەكىلدى. بۇل تۋىندىلار بىرەۋدىڭ جۇرەگىنە جەتسە, بولمىسىنا ءدان بولىپ ەگىلسە, ەرتەڭ ماۋەلى بايتەرەك بولىپ وسەدى. سونداي-اق بۇل كىتاپتار سيرەك كەزدەسەتىن سوزدەر قازىناسى ىسپەتتى», دەدى.
جوبا اياسىندا موڭعوليالىق قالامگەرلەر رىسبەك زۇرعانباي ۇلىنىڭ «قوبدانىڭ قوڭىر جەلى», زۇلكاپىل ءماۋلىت ۇلىنىڭ «ۇركەر اۋىپ بارادى» اتتى جىر جيناقتارى, جازۋشى ەرباقىت ءنۇسىپ ۇلىنىڭ «كىمدى كىنالارسىڭ...» اتتى حيكاياتى, سونداي-اق ومىردەن وتكەن قالامگەرلەر ەلەۋسىز مۇقامادي ۇلىنىڭ «ورىكتى كول» پوۆەسى مەن بامان قۇرمانحان ۇلىنىڭ «ايتاعالى سالت اتتى» تۋىندىسى, تاجىكستاندىق ابدۋساتتار نۋراليەۆتىڭ «تاجىكستانداعى قازاقتار» اتتى زەرتتەۋ ەڭبەگى, وزبەكستاندىق اعايىندار: جاراسقان مىرزامۇراتوۆ («اقيقاتتىڭ ءدامى اششى») پەن لالا جۇمانوۆانىڭ («قاراسۋ جىرلارى») شىعارمالارى, رف التاي رەسپۋبليكاسىنىڭ تۇرعىنى پيونەر مۇحتاسىروۆتىڭ «ۇرپاعىڭ ۇزىلمەسىن» اتتى عۇمىر-باياندىق ەسسەسى باسپادان شىعىپتى.
جيىن سوڭىندا شىعارما اۆتورلارى مەن تۋىستارى «وتانداستار قورىنا» ءىلتيپات تانىتىپ, العىسىن ايتتى. اتاپ ايتقاندا, كىتابى جارىق كورگەن اۆتور ەلەۋسىز مۇقامادي ۇلىنىڭ قارىنداسى, ءوزى دە تانىمال ءسوز زەرگەرى ەگەۋحان مۇقاماديقىزى: «وتانداستار قورى» اتىنان شەتتە جۇرگەن قالامگەرلەردىڭ كىتاپتارى جارىق كورگەنىنە وتە ريزامىن. مەنەن ەكى جاس ۇلكەن ەلەۋسىز اعام ەڭبەكقور, ەلگەزەك ەدى. بۇگىن سول كىسى قايتا ءتىرىلىپ كەلگەندەي قۋانىپ تۇرمىن. ەل ىرگەسى تىنىش بولسىن, حالقىمىز امان بولسىن!» دەسە, «اقيقاتتىڭ ءدامى اششى» كىتابىنىڭ اۆتورى جاراسقان مىرزامۇراتوۆ: «وسىعان دەيىن كىتاپتارىم وزبەكستاندا جارىق كوردى. اتاجۇرتىمىزبەن ءاردايىم تىعىز بايلانىستامىز. جوبانى ۇيىمداستىرۋشى «وتانداستار قورى» مەن جازۋشىلار وداعىنا ايتار العىسىم شەكسىز»,دەدى.
