«1998 جىلى ىرگەسى قالانعان زاۋىتتا 6 وندىرىستىك تسەح ىسكە قوسىلعان. ستەريلدى جانە ستەريلدى ەمەس قولعاپتار ءوندىرۋ تسەحى, «ۋلترا-ادسورب» ساۋدا ماركاسىمەن بەلسەندىرىلگەن كومىر ءوندىرۋ تسەحى, مەديتسينالىق ماقساتتاعى بۇيىمدار ءوندىرىسى تسەحى, ماقتا مەن پلاستيكادان جاسالعان بۇيىمدار وندىرۋگە دايىندالعان تسەح, ەتيلەن وكسيدىمەن ستەريلدەۋ تسەحى جانە پلاستيكتەن جاسالعان بۇيىمدار ءوندىرىسى تسەحى قالىپتى جۇمىس ىستەپ كەلەدى. وسى ۋاقىت ارالىعىندا ۇزدىك كومپانيالار قاتارىنان كورىندى. 2 700 شارشى مەترلىك ءۇش قاباتتى عيمارات 2020 جىلى ىسكە قوسىلدى», دەيدى تەحنولوگ مۇحامەدجان جۇماباي ۇلى.
ء«بىرىنشى قاباتىندا مەديتسينالىق قولعاپتار شىعارۋ تسەحى جۇمىس ىستەسە, ەكىنشى قاباتىندا تىگىلگەن بۇيىمدار جيناقتالادى, ياعني, وتاعا ارنالعان مەديتسينالىق بۇيىمدار جيىنتىعى, كومپلەكتاتسيا تسەحى بار. سونىمەن قاتار مۇندا ءبىر رەتتىك شپريتستەر جاسالادى. ءۇشىنشى قاباتتا تىگىن تسەحى جۇمىس ىستەيدى. مۇندا توقىما ەمەس ماتادان بۇيىمدار, ياعني كۇردەلى جانە جەڭىل وتالارعا ارنالعان مەديتسينالىق حالاتتار مەن جايالىقتار تىگىلەدى. سونىڭ ىشىندە كۇردەلى وتاعا قاجەت بۇيىمنىڭ ءتۇرى 40-قا جۋىقتايدى. زاۋىت تولىق اۆتوماتتاندىرىلعان, زاماناۋي ستانوكتارمەن اتقارىلادى», دەيدى تەحنولوگ.
ونىڭ ايتۋىنشا, كاسىپورىننىڭ تىگىن تسەحىندا بىرنەشە تىگۋ ءادىسى پايدالانىلادى.
«ۋلترادىبىستىق تىگۋدە توقىلماعان ماتانى ەرىتۋ ارقىلى ءبىر-بىرىنە جابىستىرىپ, ءجىپسىز تىگەدى. بۇل – زيانسىز, وتە بەرىك تىگۋ ءتۇرى. مۇندا 35 ادام جۇمىس ىستەيدى. وراما ماتەريالدار الدىمەن ءپىشىلىپ, كەسىلىپ كەلگەن سوڭ وسى تسەحتا بولىكتەر بىرىكتىرىلىپ تىگىلەدى. تاپسىرىس كولەمى ارتسا 2-3 اۋىسىممەن جۇمىس ىستەۋگە تۋرا كەلەدى. تىگىنشىلەر جۇمىسقا الىنعاندا الدىمەن اتتەستاتسيادان وتەدى. ودان سوڭ كومپانيا وكىلدەرى ارنايى كۋرستا وقىتادى. سەبەبى بۇل قاراپايىم تىگىن تسەحى ەمەس, كۇردەلى وتالارعا ارنالعان بۇيىمدار دايارلاناتىندىقتان, وعان ۇلكەن جاۋاپكەرشىلىك پەن ءتارتىپ, تازالىق قاجەت», دەيدى تەحنولوگ.
وسى كۇنى 330-عا جۋىق ادامدى ەڭبەكپەن قامتىپ وتىرعان زاۋىتتا قويانقۇس مەن ىنتىماق شاعىن اۋداندارىنىڭ جانە الماتى قالاسىنىڭ تۇرعىندارى جۇمىس ىستەيدى.
«Dolce» زاۋىتىنداعى تازالىق كلاسى وتە جوعارى زونادا ءارتۇرلى ولشەمدەگى مەديتسينالىق شپريتستەر شىعارىلادى. مۇندا جىلىنا 150 ملن دانا شپريتس شىعارۋعا مۇمكىندىك بار. سونداي-اق بەلسەندىرىلگەن كومىر تابلەتكالارى وندىرىلەدى. ونىمدەر ديستريبيۋتورلىك كومپانيالار ارقىلى تاراتىلادى. زاۋىت ەڭبەككەرلەرىنىڭ 70 پايىزعا جۋىعى ايەلدەر بولسا, ستەريلدى تسەحتا تەك قانا ەر ازاماتتار جۇمىس ىستەيدى.
«وتكەن جىلى زاۋىتتىڭ قۇرىلعانىنا 25 جىل تولعانىن اتاپ وتتىك. جىلىنا 350-450 مىڭ دانا مەديتسينالىق بۇيىم شىعارامىز. ونىڭ ىشىندە ءبىر رەتتىك بەتپەردە, باحيلا, حالات, حيرۋرگيالىق, اكۋشەرلىك بۇيىمدار وندىرەمىز. كارانتين جىلدارى تابىسى از بولسا دا بىرنەشە تۇردەن تۇراتىن بەتپەردەلەر شىعارۋمەن اينالىستىق. قازىر وتە كۇردەلى كارديو جيىنتىقتاردى تىگۋمەن اينالىسىپ جاتىرمىز. ەسىمى ەلگە تانىمال اكادەميك يۋري پيا جەتەكشىلىك ەتەتىن UMC كارديوورتالىعىنان تاپسىرىس الىپ جاتىرمىز. جوبانى جۇزەگە اسىرۋعا ءبىزدىڭ تىگىنشىلەر دايارلانىپ جاتىر. بۇل – وتە ۇلكەن جەتىستىك. «سك-فارماتسيا» جشس-مەن كەلىسىمشارت اياقتالدى. وتكەن جىلعى ينۆەستيتسيا كولەمى 9 ملرد تەڭگەنى قۇرادى. ءبىز ءونىم وندىرۋمەن قاتار, قايىرىمدىلىق ءىس-شارالارىنا ۇزبەي قاتىسامىز. جاڭادان قۇرىلعان الاتاۋ قالاسىنىڭ اۋماعىنا كىرەتىن مەديتسينالىق مەكەمەلەرگە, سونداي-اق الماتىداعى «سابيلەر ۇيىنە» مەرەكەلەردە تۇراقتى تۇردە قولۇشىن بەرۋدى داستۇرگە اينالدىردىق», دەيدى زاۋىت ديرەكتورى مارجان وماروۆا.
كەلەشەكتە زاۋىت ىرگەسى كەڭەيمەك. وسى ماقساتتا 15 گەكتار جەر بولىنگەن ەكەن. ينۆەستورلاردىڭ كومەگىمەن پوليمەرلىك زاۋىتتى كەڭەيتۋ ارقىلى گينەكولوگيالىق بۇيىمداردى كوبەيتۋ, لوگيستيكالىق ورتالىق سالۋ ءارى ونىمگە كەرەك شيكىزاتتى وزدەرىنەن ءوندىرۋدى ماقسات ەتىپ وتىر. وتاندىق كومپانيا ءوز ونىمدەرىن كورشىلەس ەلدەرگە دە ەكسپورتتاۋدى دا دامىتىپ جاتىر.
الماتى وبلىسى,
الاتاۋ قالاسى
