قۇرىلىس جەرگىلىكتى تۇرعىندارعا قوسىمشا جۇمىس ورىندارى اشپاق. سونىمەن قاتار 2024 جىلى ءىرى تۇيىندىك حابتاردى دامىتۋ ماقساتىندا اۋە كولىگى ينفراقۇرىلىمىن جاڭعىرتۋ اياسىندا بىرقاتار جۇمىس اتقارىلدى. مىسالى, ءۇش جاڭا جولاۋشىلار تەرمينالى پايدالانۋعا بەرىلدى. الماتى, شىمكەنت, قىزىلوردا قالالارىندا جولاۋشىلار تەرمينالىنىڭ وتكىزۋ مۇمكىندىگى ارتتى.
الماتى قالاسى حالىقارالىق اۋەجايى جاڭا تەرمينالىنىڭ وتكىزۋ مۇمكىندىگى جىلىنا 2,5 ملن-نان 14 ملن جولاۋشىعا دەيىن ۇلعايدى.
وتاندىق اۆياكومپانيالار «Air Astana», «SCAT», «Qazaq Air», «FlyArystan» قازاقستاننىڭ 19 قالاسىنا تۇراقتى ۇشىپ تۇرادى. حالىقارالىق اۋە قاتىناسىن الەمنىڭ 26 ەلىندە 50 باعىتتا 30 شەتەلدىك اۆياكومپانيا ورىندايدى.
شىمكەنت قالاسى اۋەجايىنىڭ جاڭا تەرمينالىنىڭ وتكىزۋ مۇمكىندىگى – جىلىنا 800 مىڭنان 6 ملن جولاۋشىعا دەيىن. جاڭا تەرمينال حالىقارالىق اۋە باعىتتارىنىڭ سانىن 10-عا, رەيستەردى اپتاسىنا 24-كە دەيىن ارتتىردى. دجيددا, مەدينا (كسا), دوحا (قاتار), فۋكۋوك (ۆەتنام) جانە پحۋكەتكە (تايلاند) اۋە قاتىناسى اشىلدى.
قىزىلوردا قالاسىنىڭ «قورقىت اتا» حالىقارالىق اۋەجايىنىڭ وتكىزۋ مۇمكىندىگى جىلىنا 300 مىڭنان 2 ملن جولاۋشىعا دەيىن ءوستى. بۇگىندە قىزىلوردا قالاسىنان 25 ىشكى رەيس ورىندالىپ جاتىر.
«Skyhansa» قازاقستاندىق-گەرماندىق كومپانياسىمەن «قورعاس-شىعىس قاقپاسى» ارنايى ەكونوميكالىق ايماعىندا كوپتەگەن جوبا باستالدى. مىسالى, قۋاتى ساعاتىنا 500 ادامعا دەيىنگى جولاۋشىلار تەرمينالىن, سىيىمدىلىعى 550 مىڭ تونناعا دەيىنگى وتىن قويماسىن, جۇكتەردى 250 مىڭ تونناعا دەيىن تولىق وڭدەيتىن جۇك تەرمينالىن سالىنادى. سونداي-اق اۋە كەمەلەرىنە قىزمەت كورسەتەتىن اۆياتسيالىق-تەحنيكالىق ورتالىق قۇرىلماق. 300-دەن اسا تۇراقتى جۇمىس ورنىن قۇرا وتىرىپ, تۋريستىك جانە ساۋدا, ويىن-ساۋىق قىزمەتتەرىن دامىتۋ جوسپارلانعان.
كەيىنگى جىلدارى اۋە كولىگى جولاۋشىلارعا ىڭعايلى ءارى تارتىمدى بولۋعا تىرىسىپ جاتىر. جىلدان-جىلعا اۋە تاسىمالى 10-15%-عا ارتا تۇسكەن. 2024 جىلى وتاندىق اۆياكومپانيالار 15 ملن-عا جۋىق ادامدى تاسىمالدادى, اۋەجايلار 30 ميلليون جولاۋشىعا, ونىڭ ىشىندە شەتەلدىك اۆياكومپانيالار مەن ازاماتتارعا قىزمەت كورسەتتى. 2024 جىلى جۇك تاسىمالى كولەمى جىلىنا 28 مىڭ تونناعا ۇلعايدى.
وتاندىق اۋە تاسىمالداۋ جۇيەسىن دامىتۋداعى ماڭىزدى ەلەمەنتى – ۇشاقتار پاركىن جاڭارتۋ. ول جىل سايىن 10-15 اۋە كەمەسىمەن تولىقتىرىلادى. بۇگىندە ەلىمىزدىڭ اۆياپاركى 102 ۇشاقتى قۇرايدى.
قازاقستاننان حالىقارالىق اۋە قاتىناسى 31 ەلمەن (رەسەي, قىرعىزستان, وزبەكستان, تاجىكستان, گرۋزيا, بەلارۋس, ازەربايجان, ءباا, ساۋد ارابياسى, قاتار, يران, ومان, مىسىر, كۋۆەيت, وڭتۇستىك كورەيا, قىتاي, ءۇندىستان, ۆەتنام, تايلاند, موڭعوليا, كامبودجا, مالايزيا, مالديۆ ارالدارى, شري-لانكا, تۇركيا, ۇلىبريتانيا, گەرمانيا, يتاليا, نيدەرلاند, پولشا, چەحيا) اپتاسىنا 582 رەيس جيىلىگىمەن 117 باعىتتا ورناتىلدى.
سونىمەن قاتار ەرەكشە قاجەتتىلىكتەرى بار ازاماتتار ءۇشىن بارلىق قاجەتتى جاعداي جاسالعان. جەرۇستى قىزمەتىنىڭ ماماندارى العاشقى مەديتسينالىق كومەك كورسەتۋ, ونىڭ ىشىندە ەرەكشە قاجەتتىلىكتەرى بار ازاماتتاردى سۇيەمەلدەۋ بويىنشا تۇراقتى ارنايى وقۋدان وتەدى. امبۋلاتورلىق كوتەرگىشتەر, ارنايى اربالار, كوزى ناشار كورەتىندەرگە ارنالعان ارنايى جولاقشالار مەن دىبىستىق ناۆيگاتسيا جۇيەلەرى بار.
ەلىمىزدىڭ حالىقارالىق اۋەجايلارىندا انا مەن بالاعا ارنالعان بولمەلەر, ۆاليۋتا ايىرباستاۋ پۋنكتتەرى, پوشتا بايلانىسى, سىمسىز ينتەرنەت بار. سونداي-اق ونلاين تىركەۋ ۇدەرىسىن جىلدامداتۋ ءۇشىن بىرقاتار اۋە كومپانيالارى ءموبيلدى قوسىمشالاردى ەنگىزدى. كورسەتىلەتىن قىزمەتتەر بارلىق ساناتتاعى ازاماتتار ءۇشىن ساپانى جانە قولجەتىمدىلىكتى ارتتىرۋعا باعىتتالعان.
جولاۋشىلار اۋە تاسىمالدارى كورسەتكىشىنىڭ ءوسۋى, مارشرۋتتاردىڭ ارتۋى ىشكى جانە شەتەلدىك ءتۋريزمدى دامىتادى. بۇل ەل وڭىرلەرىنىڭ ينۆەستيتسيالىق تارتىمدىلىعىن ارتتىرادى.
قازاقستانداعى اۆياتسيا سالاسىنىڭ دامۋى, حالىقارالىق تانىلىمى ۇشۋ قاۋىپسىزدىگىنە بايلانىستى. ەلىمىزدە ۇشۋ قاۋىپسىزدىگى حالىقارالىق ستاندارتتارىنا سايكەستىك دەڭگەيى 82%-دى قۇرايدى. بۇل – تمد ەلدەرى اراسىندا ەڭ جوعارى كورسەتكىش. دانيا مەن پولشا سياقتى ەۋروپا وداعى ەلدەرىمەن سالىستىرۋعا كەلەدى.
