سۋرەتتەردى تۇسىرگەندەر – د.ەروفەەۆ, ج.مۇسابەكوۆ
2030 جىلعا دەيىن وبلىس ورتالىعىنان تىسقارى جاتقان شالعاي اۋىلدارعا گاز جەتكىزىلەدى. بەلگىلەنگەن جوسپار شەڭبەرىندە 2024 جىلى كوكسۋ, قاراتال, ەسكەلدى اۋداندارى, تالدىقورعان قالاسىن العاندا, 11 ەلدى مەكەن كوگىلدىر وتىنمەن قامتاماسىز ەتىلدى. جاقىندا ەسكەلدى اۋدانىنىڭ شىمىر, اباي اۋىلدارىنا كوپتەن كۇتكەن كوگىلدىر وتىن باردى. 5735 تۇرعىنى بار ەكى اۋىلدىڭ تۇرعىندارى گازعا قول جەتكىزدى. بۇل وبلىستىڭ گازداندىرۋ دەڭگەيىن 56,9%-عا دەيىن ارتتىرۋعا مۇمكىندىك بەردى. الداعى ۋاقىتتا تاعى 433 شاقىرىمعا گاز تاراتۋ جەلىلەرى سالىنادى.
«بۇگىندە ەسكەلدى اۋدانىنىڭ 14 ەلدى مەكەنى گازداندىرىلدى. گازعا 39 مىڭ ادام نەمەسە 10 354 ابونەنت قول جەتكىزدى. كوكجازىق, تەرەكتى, قاراتال, جاستار, اقتاستى اۋىلدارىندا گاز جەلىلەرىن سالۋ جۇمىستارى جۇرگىزىلىپ جاتىر. بيىل قاينارلى, جالعىزاعاش اۋىلدارىن گازداندىرۋ جۇمىستارى جوسپارلانعان», دەدى وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسى باسشىسىنىڭ ورىنباسارى ازامات بەيىسباەۆ.
گازداندىرۋ جوبالارىن ىسكە اسىرۋعا 2024 جىلى وبلىس بيۋدجەتىنەن 12 ملرد تەڭگە, رەسپۋبليكالىق بيۋدجەتتەن 6,8 ملرد تەڭگە ءبولىندى. قاراجاتتىڭ كۇنى بۇگىنگە دەيىن 6 ملرد-قا جۋىعى يگەرىلدى. جەرگىلىكتى بيۋدجەتتەن بولىنگەن 5,2 ملرد تەڭگەنىڭ 817 ملن تەڭگەسى جۇمسالدى. قوسىمشا قارجىلاندىرۋ 10,4 ملرد تەڭگەنى قۇرايدى. ول قاراجاتتىڭ «سامۇرىق-قازىنا» اق ديۆيدەندتەرىنەن تۇسەتىنىن اتاپ ءوتۋ ماڭىزدى.
ايتا كەتەيىك, ەسكەلدى اۋدانىنىڭ شىمىر, اباي اۋىلدارىندا گاز قۇبىرلارىن سالۋ جۇمىستارى 2023 جىلدىڭ قاراشا ايىندا باستالعان. گاز قۇبىرىنىڭ جالپى ۇزىندىعى – 47 كم. 2024 جىلدىڭ قىركۇيەگىندە 24 ەلدى مەكەندە قۇرىلىس-مونتاج جۇمىستارىن ورىنداۋعا شارتتار جاسالدى. بۇل ينفراقۇرىلىمدى ودان ءارى جەدەل دامىتۋعا مۇمكىندىك بەرەدى. اشىقتىق پەن تيىمدىلىكتى قامتاماسىز ەتۋ ماقساتىندا تاعى 18 ەلدى مەكەنگە جوبالاۋ-سمەتالىق قۇجاتتاما ازىرلەندى, ولاردىڭ ساراپتاماسى جاڭا جىل قارساڭىندا اياقتالدى.
تاعى ءبىر قۋانىشتى جاڭالىق, كوكسۋ اۋدانىنا قاراستى «قازاقستان» اۋىلىنا گاز كەلىپ, تۇرعىندار كوپتەن كۇتكەن كوگىلدىر وتىنعا كوزايىم بولدى. وسى كۇنگە دەيىن جۇزگە جۋىق ءۇي كومىر جاعىپ كەلگەن ەدى. جالپى, كوكسۋ اۋدانىنداعى 34 ەلدى مەكەننىڭ 26-سى گازداندىرىلادى. گازعا قوسىلعان 18 اۋىلدىڭ 3,5 مىڭ تۇرعىن ءۇيى كوگىلدىر وتىن قىزىعىن كورىپ وتىر. قالعان 7 ەلدى مەكەندە قۇرىلىس جۇمىستارى جۇرگىزىلىپ جاتىر. گاز جەلىلەرىنىڭ قۇرىلىسىن بيىلعى جىلى كەزەڭ-كەزەڭمەن اياقتاۋ جوسپارلانعان.
«گازداندىرۋ جەرگىلىكتى تۇرعىنداردىڭ تۇرمىسىن جەڭىلدەتىپ قانا قويماي, اۋىلدىڭ ودان ءارى وسۋىنە قۋاتتى سەرپىن بەرەدى. ءبىز اۋداننىڭ ءاربىر تۇرعىنىنا قولايلى جاعداي جاساۋ جونىندەگى جۇمىستاردى جالعاستىرىپ جاتىرمىز. گازدى قوسۋ وڭىرلىك ينفراقۇرىلىمدى دامىتۋدا, اۋىلداعى ءومىر ءسۇرۋ جاعدايىن جاقسارتۋدا شەشۋشى ءرول اتقارادى», دەيدى كوكسۋ اۋدانى اكىمىنىڭ ورىنباسارى ءمادي كارباەۆ.
ءوڭىر اكىمى ءباسپاسوز قىزمەتىنىڭ مالىمەتىنشە, بيىل 21 نىساننىڭ قۇرىلىسى جالعاسىپ, تاعى 42 نىساننىڭ قۇرىلىسى باستالادى. ماسەلەن, جىل سوڭىنا قاراي كەربۇلاق اۋدانىنان تالدىقورعانعا دەيىنگى 126 ەلدى مەكەننىڭ بارلىعى گازداندىرىلادى. سونىڭ ناتيجەسىندە گازعا بەس ءجۇز مىڭنان استام تۇرعىن نەمەسە جالپى حالىقتىڭ 71,4%-ى قول جەتكىزەدى.
«بۇل كۇندى جىلدار بويى كۇتتىك. باستىسى, وت جاعۋ ماشاقاتىنان قۇتىلدىق. بۇل جاڭالىق اسىرەسە ءۇي شارۋاسىنداعى ايەلدەردى قاتتى قۋانتتى. ويتكەنى ولار ەندى وتىن تاسۋ, كۇل شىعارۋ سىندى جۇمىستارىنان ارىلادى, تۇرمىس-تىرشىلىك جەڭىلدەيدى. ءبىزدىڭ قاجەتتىلىكتەرىمىزگە نازار اۋدارعان اۋدان, وبلىس باسشىلىعىنا راحمەت», دەيدى اۋىل تۇرعىنى ساپارعالي سماعۇلوۆ.
وتكەن جىلى 19 تامىزدا باستالعان «تالدىقورعان – ءۇشارال» ماگيسترالدى گاز قۇبىرىنىڭ قۇرىلىسى دا بيىل اياقتالادى دەپ كۇتىلىپ وتىر. سونىمەن قاتار اقسۋ, سارقان, الاكول اۋداندارىنىڭ 66 ەلدى مەكەنىنە گاز جەلىلەرىن تارتۋ جوباسى ازىرلەنىپ جاتىر. 2029 جىلعا قاراي بارلىق 192 ەلدى مەكەندى گازداندىرۋ, 642 مىڭنان استام تۇرعىننىڭ نەمەسە حالىقتىڭ جالپى سانىنىڭ 91,9%-ىنىڭ گازعا قول جەتكىزۋىن قامتاماسىز ەتۋ جوسپارلانعان.
جەتىسۋ وبلىسى
