وسىعان دەيىن تەمىركوپىر باستاۋىش مەكتەبىنىڭ 38 وقۋشىسى جايسىز دا سۋىق ەسكى ۆوكزال عيماراتىندا ءبىلىم الۋعا ءماجبۇر بولدى. اۋىل تۇرعىندارىنىڭ بىردەن- ءبىر ءوتىنىشى جاڭا مەكتەپ ەدى. ءبىر جاعىنان, وسى اۋىلدى ساقتاپ قالۋدىڭ توتە جولى – جاڭا ءبىلىم ورداسىن سالۋ. قانشاما ۇرپاق وقىعان 1937 جىلى ساماننان سالىنعان ەسكى مەكتەپ قۇلاپ قالعان سوڭ وقۋشىلارى مەن مۇعالىمدەرى امالسىزدان ەسكى ۆوكزال عيماراتىن پانالادى. جايسىز جەردە ءبىلىم الۋ وقۋشىعا دا, مۇعالىمگە دە وڭايعا سوقپادى. سودان 2022 جىلى مەكتەپ سالۋ تۋرالى شەشىم شىعىپ, كوپ كەشىكپەي مەردىگەر انىقتالدى.
ءوندىرىس وشاقتارى كوپ شوعىرلانعان مۇعالجار اۋدانىنىڭ ورتالىعى – قاندىاعاشتان تەمىركوپىر 25 شاقىرىم جەردە ورنالاسقان. ءۇش مىڭعا جۋىق تۇرعىنى بار ەڭبەك اۋىلدىق وكرۋگىنە ساعاشيلى, ءباسشيلى, تەمىركوپىر, تەپسەڭ, قارابۇلاق اۋىلدارى كىرەدى. بۇلاردىڭ اراسى ءبىر-بىرىنە وتە جاقىن. اۆتوكولىك جولى ءتيىپ تۇر, اۋىلدىق وكرۋگ اۋماعىنان تەمىر جانە جەم وزەندەرى اعادى. ءبىر سوزبەن ايتقاندا, شارۋاعا قولايلى جەر.1905 جىلى ورىنبور – تاشكەنت تەمىرجولىنىڭ رەلستەرى توسەلە باستاعاندا سالىنعان ۆوكزال عيماراتى تەمىركوپىردە ەسكىنىڭ كوزىندەي بولىپ ءالى تۇر. قابىرعالارى بەرىك. ايتا كەتۋ كەرەك, تۇرعىندار سانى از بولعاندىقتان, وسى وكرۋگ كوپتەگەن الەۋمەتتىك كومەكتەن قاعاجۋ قالىپ كەلەدى.
اقتوبە وبلىسى
