ءىس-شاراعا قاتىسقان قارۋلى كۇشتەر قۇرلىق اسكەرلەرىنىڭ باس قولباسشىسى, گەنەرال-مايور مەرەكە كوشەكباەۆ اسكەردەگى قاۋىپسىزدىكتى ارتتىرۋدىڭ جانە اسكەري قىزمەتشىلەردىڭ ءومىرى مەن دەنساۋلىعىنا قاتەر توندىرەتىن جايتتارمەن كۇرەستىڭ ماڭىزدىلىعى جايىندا اڭگىمەلەدى.
«اسكەري قىزمەتشىلەردىڭ قازا بولۋىنىڭ ءاربىر جاعدايىن قىلمىستىق قۋدالاۋ ورگاندارى مۇقيات تەكسەرەدى, سونداي-اق قايعىلى جاعدايدىڭ سەبەپتەرىن انىقتاۋ ءۇشىن شەشىم قابىلدانادى. ارينە, ءبىز مۇنداي جاعدايدىڭ اراگىدىك بار ەكەنىن بىلەمىز جانە ماسەلەنى شەشۋدىڭ جولدارىن ىزدەيمىز. ءبىز قاتەر توندىرەتىن جايتتاردىڭ الدىن الۋ, بارلىق اسكەري قىزمەتشى ءۇشىن قولايلى جاعداي جاساۋ ءۇشىن بەلسەندى جۇمىس ىستەپ جاتىرمىز», دەدى ول.
قۇرلىق اسكەرلەرى – ارميامىزداعى ادام سانى ەڭ كوپ جاۋىنگەرلىك قۇرام. ولار اسكەري تەحنيكانى پايدالانۋ, وقۋ-جاتتىعۋلارعا قاتىسۋ, اتىس جۇرگىزۋ جانە باسقا دا مىندەتتەمەلەردى ورىندايتىندىقتان, قاۋىپسىزدىك ماسەلەسىنە ەرەكشە نازار اۋدارۋدى تالاپ ەتەدى. م.كوشەكباەۆ اسىرەسە مەرزىمدى اسكەري قىزمەتشىلەردى دايارلاۋدا تەك ساباق وقىتۋ ەمەس, ەڭ الدىمەن ولاردىڭ دەنساۋلىعى مەن ومىرىنە قاتەر توندىرەر جاعدايلاردىڭ الدىن الۋعا ەرەكشە كوڭىل بولىنەتىنىن جەتكىزدى. سونىمەن قاتار ولاردى اسكەري-پاتريوتتىق تۇرعىدا تاربيەلەۋ دە – قولباسشىلىق الدىندا تۇرعان مىندەتتىڭ ءبىرى.
«جىل سايىن ءبىز ارقىلى ازاماتتىق قوعامدا سۇرانىسقا يە جانە تاپشى جۇمىسشى ماماندىقتارى بويىنشا دايىندىعى جوعارى مىڭداعان بالا وقىپ شىعادى. ولار – شىنجىر تاباندى جانە دوڭگەلەكتى تەحنيكانى پايدالانۋ جونىندەگى ماماندار, گاز-ەلەكترمەن دانەكەرلەۋشىلەر, كرانشىلار, بايلانىسشىلار, ت.ب.», دەپ اتاپ ءوتتى ول.
بريفينگ بارىسىندا گەنەرال-مايور جاس ساربازداردىڭ اسكەرگە العاش كەلگەن ۋاقىتتاعى جاڭا ومىرگە بەيىمدەلۋى مەن جاۋىنگەر رەتىندە قالىپتاسۋ ءۇردىسى تۋرالى دا اڭگىمەلەدى. ونىڭ ايتۋىنشا, اسكەردەگى قىزمەت – وتان الدىنداعى مىندەت قانا ەمەس, سونىمەن قاتار ءاربىر سارباز ءۇشىن ۇلكەن الەۋمەتتىك سىناق. بۇل اۋىر فيزيكالىق جانە پسيحوەموتسيالىق سترەسستەرمەن بايلانىستى. قىزمەت بارىسىندا اسكەري قىزمەتشىلەر قاراۋىلدارعا, ناريادتارعا ءتۇسىپ, جاۋىنگەرلىك دايارلىق ءىس-شارالارىنا قاتىسادى. سول سەبەپتى كوپتەگەن اسكەري قىزمەتشى وتباسى مەن قوعامنان وقشاۋلانۋعا بايلانىستى بەيىمدەلۋ قيىندىقتارىنا تاپ بولىپ, بۇل ولاردىڭ مورالدىق-پسيحولوگيالىق جاعدايىنا دا اسەر ەتەدى. سوندىقتان ولاردىڭ قىزمەتكە دەگەن دايىندىعى وتە ماڭىزدى.
ء«بىرىنشى كۇنى ولارمەن جەكە اڭگىمەلەسۋ وتكىزىلەدى, نەنى قالايتىنى, قانداي قاجەتتىلىگى بارى تەكسەرىلەدى, سوعان سايكەس شەشىم قابىلدانادى. پسيحولوگتەر جۇمىس ىستەيدى. ارقايسىسىنا تالىمگەر بەكىتىلىپ, «جاۋىنگەرلىك دوس» جۇيەسى بويىنشا ارىپتەستەر ايقىندالادى. اسكەري ءبولىم ورىندايتىن مىندەتتەردىڭ سيپاتى مەن ەرەكشەلىگى جايىندا اقپارات بەرىلىپ, قاۋىپسىزدىك شارالارى تۇسىندىرىلەدى», دەدى قۇرلىق اسكەرلەرىنىڭ باس قولباسشىسى.
ايتا كەتسەك, مەرزىمدى اسكەري قىزمەت بارىسىندا «جاس جاۋىنگەر كۋرسى» باعدارلاماسى بويىنشا ساربازدى اسكەري عىلىمدارعا باستاپقى دايارلاۋ ساباقتارى وتكىزىلىپ, ءار ساربازدىڭ مورالدىق-پسيحولوگيالىق جاي-كۇيى مەن قىزمەت وتكەرۋگە دايىندىعى زەردەلەنەدى. قىزمەتتىڭ قاۋىپسىزدىگىن قامتاماسىز ەتۋ ماقساتىندا جاۋاپتى وفيتسەرلەردىڭ تاۋلىك بويى كەزەكشىلىگى ۇيىمداستىرىلىپ, قۇقىق قورعاۋ ورگاندارىنىڭ قاتىسۋىمەن پروفيلاكتيكالىق دەنە تەكسەرۋ جۇرگىزىلەدى.
گەنەرال-مايور م.كوشەكباەۆ اسكەري پوليتسيا جاساقتارىمەن, سارباز انالارى كوميتەتىمەن جانە اسكەري قىزمەتشىلەردىڭ وتباسى مۇشەلەرىمەن ءوزارا جۇمىس جۇيەسى ۇيىمداستىرىلعانىن تىلگە تيەك ەتتى. مەرزىمدى اسكەري قىزمەتشىلەرگە تۋىستارىمەن بايلانىستا بولۋعا مۇمكىندىك بەرەتىن «وتباسىمەن بەينەقوڭىراۋ» جوباسى بار. ءار سارباز اپتاسىنا ءبىر رەت جاقىن ادامدارىمەن بەينەبايلانىسقا شىعادى, سونىمەن قاتار كۇن سايىن تەلەفون ارقىلى بوس ۋاقىتىندا ۇيىنە قوڭىراۋ شالا الادى.
قۇرلىق اسكەرلەرىنىڭ باس قولباسشىسى وزىنە باعىنىشتى قۇرىلىمداعى ءاربىر جارعىدان تىس قارىم-قاتىناس وقيعاسىن قورعانىس مينيسترىلىگىنە باعىنبايتىن قىلمىستىق قۋدالاۋ ورگاندارى تەكسەرەتىنىن, ارميادا سالاماتتى ورتا قالىپتاستىرۋ ماقساتىندا مۇنداي جاعدايلاردىڭ قايتالانۋىن بولدىرماۋعا باعىتتالعان شارالار قابىلدايتىنىن اتاپ ءوتتى.
