فوتو: كولىك مينيسترلىگى
پرەزيدەنت تاپسىرماسىنا ساي جۇرگىزىلىپ وتىرعان جوبالار وڭىرلەردىڭ ەكونوميكاسىنا سەرپىن بەرىپ, ءتۋريزمدى تۇلەتۋگە سەپ بولماق.
جاڭا اۋەجاي تەرمينالدارىنىڭ سالىنۋى جەرگىلىكتى حالىقتى جۇمىسپەن قامتىپ, شەتەلدىك تۋريستەردىڭ قاتارىنىڭ قالىڭداۋىنا مۇمكىندىك بەرەدى.
2024 جىلى ەلىمىزدە ءۇش جاڭا جولاۋشىلار تەرمينالى پايدالانۋعا بەرىلدى. ماسەلەن, الماتى, شىمكەنت جانە قىزىلوردا قالالارىندا جولاۋشىلار تەرمينالىنىڭ وتكىزۋ قابىلەتى ۇلعايتىلعان.
الماتى قالاسى حالىقارالىق اۋەجايىنىڭ جاڭا تەرمينالىنىڭ وبەكتىنى وتكىزۋ قابىلەتى جىلىنا 2,5 ملن-نان 14 ملن. جولاۋشىعا دەيىن ءوسىپ وتىر. وتاندىق اۆياكومپانيالار Air Astana, SCAT, Qazaq Air, Fly Arystan رەيستەرى قازاقستاننىڭ 19 قالاسىنا تۇراقتى ۇشادى. ال حالىقارالىق اۋە قاتىناسىن الەمنىڭ 26 ەلىندە 50 باعىت بويىنشا 30 شەتەلدىك اۆياكومپانيا ورىندايدى.
شىمكەنت قالاسى اۋەجايى جاڭا تەرمينالىنىڭ جىلىنا 800 مىڭنان 6 ملن. جولاۋشىعا دەيىن قىزمەت كورسەتە الۋعا قاۋقارلى. جاڭا تەرمينال حالىقارالىق اۋە مارشرۋتتارىنىڭ سانىن 10-عا, رەيستەردى اپتاسىنا 24-كە دەيىن ارتتىردى. دجيددا, مەدينا (كسا), دوحا (كاتار), فۋكۋوك (ۆەتنام) جانە پحۋكەتكە (تايلاند) اۋە قاتىناسى اشىلدى.
قىزىلوردا قالاسىنىڭ «قورقىت اتا» حالىقارالىق اۋەجايىنىڭ وتكىزۋ قابىلەتى جىلىنا 300 مىڭنان 2 ملن. جولاۋشىعا دەيىن ءوستى. بۇگىنگى تاڭدا قىزىلوردا قالاسىنان 25 ىشكى رەيس ورىندالىپ جاتىر.
«SKYHANSA» قازاقستان-گەرماندىق كومپانياسى «قورعاس – شىعىس قاقپاسى» ارنايى ەكونوميكالىق ايماعىندا قۋاتى ساعاتىنا 500 ادامعا دەيىنگى جولاۋشىلار تەرمينالىن, سىيىمدىلىعى 550 000 تونناعا دەيىنگى وتىن قويماسىن, جۇكتەردى 250 000 تونناعا دەيىن تولىق وڭدەيتىن جۇك تەرمينالىن سالۋ, اۋە كەمەلەرىنە قىزمەت كورسەتۋ اۆياتسيالىق-تەحنيكالىق ورتالىعىن قۇرۋ بويىنشا جوبا ىسكە اسىرىلۋدا. سونداي-اق 300-دەن استام تۇراقتى جۇمىس ورىندارىن قۇرا وتىرىپ, حالىق ءۇشىن تۋريستىك, ساۋدا, ويىن-ساۋىق قىزمەتتەرىن دامىتۋ جوسپارلانعان.
سوڭعى جىلدارى اۋە كولىگى جولاۋشىلار ءۇشىن ىڭعايلى ءارى تارتىمدى بولۋدا. مىسالى, قازاقستاندا جىل سايىن اۋە تاسىمالى 10-15% ارتىپ كەلەدى. 2024 جىلى وتاندىق اۆياكومپانيالار 15 ميلليونعا جۋىق ادامدى تاسىمالدادى, اۋەجايلار 30 ميلليون جولاۋشىعا, ونىڭ ىشىندە شەتەلدىك اۆياكومپانيالار مەن ازاماتتارعا قىزمەت كورسەتتى. 2024 جىلى جۇك تاسىمالى كولەمى - جىلىنا 28 مىڭ تونناعا ۇلعايعان.
