اۋىر قىلمىس جاساعاندار جەتكىزىلدى

رەسەي اسقان كۇدىكتىلەر 2023 جىلدىڭ قاڭتارىندا شىمكەنت قالاسىندا وزگە ءۇش اداممەن بىرلەسە جوسپار قۇرىپ, باس ارازدىق نەگىزىندە تانىسىن ءولتىرۋدى ءجون كورگەن. وسى ويدى جۇزەگە اسىرۋ ماقساتىندا كۇدىكتىلەر تاپانشا, مەتالل شىبىقتار مەن بيتالارمەن قارۋلانىپ, قولعاپ پەن ماسكا كيىپ, ءتۇننىڭ ءبىر ۋاعىندا جابىر­لەنۋشىنىڭ ۇيىنە باسا-كوكتەپ كىرگەن. ولار تەرەزەلەردى سىندىرىپ, ۇيگە كىرىپ, جابىرلەنۋشىنى سوققىنىڭ استىنا الىپ, دەنەسىنىڭ ساۋ-تامتىعىن قالدىرماعان. كەيىن ۇيدەگى باسقا ادامداردى دا ۇرىپ-سوعىپ, وقيعا ورنىنان تا­يىپ تۇرعان.

جابىرلەنۋشى اۋىر دەنە جارا­قاتتارى سالدارىنان جەدەل جار­دەم كولىگىندە قازا تاپقان. ارتىن­شا كۇدىكتىلەردىڭ ەكەۋى ءىزىن سۋىتپاي ۇستالىپ, ءارتۇرلى جازاعا تارتىلعان. ال قال­عان ءۇش كۇدىكتى ەلدەن قاشىپ ۇل­گەرىپ, ولارعا حالىقارالىق ىزدەۋ جاريالانعان.

وتكەن جىلدىڭ مامىر ايىندا سىبايلاستاردىڭ ءبىرى كورشىلەس ەلدەن ەكستراديتسيالانىپ, تەمىر تورعا قامالعان. ىزدەۋدەگى قالعان ەكى كۇدىكتى بىلتىر شىلدەدە رەسەي فەدەراتسياسىنىڭ ماسكەۋ وبلىسىندا ۇستالىپ, قازاقستان باس پروكۋراتۋراسىنىڭ سۇراۋى بو­يىنشا ەلگە ەكستراديتسيالاندى.  ايىپ رەتىن­دە تاعىلعان قىلمىستى جاسا­عانى ءۇشىن ولارعا 15 جىلدان 20 جىلعا دەيىنگى مەرزىمگە نەمەسە ءومىر بويىنا باس بوستاندىعىنان ايىرۋ جازاسى قاراستىرىلعان. وسىلايشا, اتالعان قىلمىستىق وقيعانى جاساۋعا قاتىسى بار بارلىق كۇدىكتى قولعا ءتۇستى.

سونداي-اق باس پروكۋراتۋرا قىزمەتكەرلەرى ءىرى مولشەردەگى الاياقتىق جاساپ, ەلدەن جىراق­تا بوي تاسالاپ جۇرگەن كۇدىك­تىنى قازاقستاننىڭ بەلارۋستەگى ەلشىلىگىنىڭ كومەگىمەن اتال­عان ەلدەن ونى قىلمىستىق جاۋاپ­تىلىققا تارتۋ ماقساتىندا ەكستراديتسيالادى.

ول 2022 جىلدىڭ قاڭتارىنان 2023 جىلدىڭ تامىزىنا دەيىنگى كەزەڭدە تۇركىستان قالاسىندا ءبىر توپ اداممەن بىرگە كاسىپ اشۋ ءۇشىن تەگىن اقشالاي گرانت الۋعا كومەكتەسەمىز دەگەن سىلتاۋمەن 13 ازاماتتىڭ قاراجاتىن قولدى قىلعان. ءسويتىپ, ولارعا 10 ميلليون تەڭگەدەن اسا كولەمدە شىعىن كەلتىرگەن.

بۇل قىلمىستىڭ «شەلەك جالا­عان» سىبايلاسى ۇستالىپ قا­­لىپ, سوتتالعان. ال «ايران ىشكەن» ناعىز كۇدىكتى الاياق­تىق ارەكەتىنەن كەيىن ەلدەن قاشىپ كەتىپ, ونى ءتيىستى ورگان حالىق­ارالىق ىزدەۋگە تاپسىرعان.

بىلتىر قازان ايىندا ول بەلارۋس جەرىندە ۇستالىپ, جۋىر­­دا قازاقستان باس پروكۋرا­تۋرا­سىنىڭ ءوتىنىشى بويىنشا ەلگە جەتكىزىلدى. قازىر ول استاناداعى تەرگەۋ يزولياتورىندا قاماۋدا وتىر. بۇل قىلمىستى جاساعانى ءۇشىن مۇلكىن تاركىلەۋ ارقىلى ءۇش جىلدان جەتى جىلعا دەيىن باس بوستاندىعىنان ايىرۋ تۇرىندە جازا قاراستىرىلعان.