پاتەر كىلتتەرىن تابىس ەتتى

قورعانىس ءمينيسترى يمانعالي تاسماعامبەتوۆ 2014 جىلعى 23 قىركۇيەكتە الماتى وبلىسى جاڭالىق اۋىلىنىڭ ماڭايىندا اۆياتسيالىق اپاتقا ۇشىراعان سۋ-27 ۇشاعى قازا تاپقان ەكيپاجىنىڭ جەسىرلەرىنە پاتەر كىلتتەرىن تابىس ەتتى. ماعريپا سارقىنوۆا مەن ليۋبوۆ گوربۋنوۆاعا اقمولا وڭىرلىك گارنيزونى تۇرعىن ءۇي كوميسسياسىنىڭ شەشىمىمەن ەكى جانە ءۇش بولمەلى پاتەرلەر بەرىلدى. «ءبىز بەيبىت تۇرعىنداردى امان ساقتاپ قالۋ ءۇشىن ءوز ومىرلەرىن قيىپ, ناعىز ەرلىك جاساعان وفيتسەرلەردى قۇرمەتپەن ەسكە الامىز. ولاردىڭ ەسىمدەرى وسى ەرلىكتەرىنە ريزا بولعان ميلليونداعان قازاق­ستان­دىقتىڭ جۇرەگىندە ءاردايىم  ساقتا­لىپ قالاتىن بولادى», – دەدى قور­عانىس ءمينيسترى يمانعالي تاسما­عامبەتوۆ. «ءبىز كوڭىل ءبولىپ, پاتەر بەرىپ وتىرعان قورعانىس مينيسترلىگىنە ريزامىز, بالالارىمىزدىڭ بولا­شاعى بار», – دەدى پودپولكوۆنيك دەنيس گوربۋنوۆتىڭ ارتىن­دا قال­عان زايىبى ليۋبوۆ الەكسەەۆنا. ەستەرىڭىزگە سالا كەتەيىك, 2014 جىلعى قىركۇيەكتە الماتى وبلىسىندا وقۋ-جاتتىعۋ ۇشۋلارى كەزىندە سۋ-27 اسكەري ۇشاعى قۇلاعان بولاتىن. پودپولكوۆنيك ەرلان ناۋانوۆ پەن پودپولكوۆنيك دەنيس گوربۋنوۆتان تۇراتىن ۇشاق ەكيپاجى ۇشاقتى ەلدى مەكەننەن اۋلاققا الىپ كەتۋ ءۇشىن قولدان كەلگەننىڭ ءبارىن جاسادى. 2014 جىلعى جەلتوقسان ايىندا مەملەكەت باسشىسىنىڭ جارلىعىمەن جاۋىنگەرلىك جانە قىزمەتتىك بورىشتارىن ورىنداۋ كەزىندە كورسەتكەن جانقيارلىق ەرلىگى ءۇشىن پودپولكوۆنيك ەرلان ناۋانوۆ پەن پودپولكوۆنيك دەنيس گوربۋنوۆ قازا تاپقاننان كەيىن ءىى دارەجەلى «ايبىن» وردەنىمەن ناگرادتالعان بولاتىن. «ەگەمەن-اقپارات».