فوتو: gov.kz
تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ اۋىلدىق ەلدى مەكەندەردى ينتەرنەتپەن قامتۋدىڭ جاڭا ءادىسىنىڭ ارتىقشىلىقتارىن باعالاپ, سارىباي بي اۋىلىنىڭ تۇرعىندارىمەن اڭگىمەلەستى.
بۇعان دەيىن سارىباي بي اۋىلىنىڭ تۇرعىندارى ەسكىرگەن ADSL تەحنولوگياسى ارقىلى ينتەرنەتكە قوسىلىپ كەلگەن ەدى. بۇل تەحنولوگيا جىلدامدىق پەن قوسىلۋ ساپاسىنىڭ شەكتەۋلىگىمەن ەرەكشەلەنەدى. جەلى ينفراقۇرىلىمىن قۇرۋدىڭ جاڭا ءتاسىلى دەرەكتەردى سەكۋندىنا 200-300 مبيت جىلدامدىقپەن بەرۋگە, ۇلكەن اۋماقتاردى قامتۋعا جانە قولدانۋشىلار سانىنىڭ ارتۋىنا قاراماستان تۇراقتى قوسىلىمدى قامتاماسىز ەتەدى.
105 ءۇي جاڭا تەحنولوگياعا قوسىلىپ, ونىڭ ارتىقشىلىقتارى مەن مۇمكىندىكتەرىن جوعارى باعالادى. قازىرگى ۋاقىتتا تۇرعىندار بەلسەندى تۇردە قوسىلۋعا ءوتىنىم بەرىپ جاتىر.
«بۇل تەحنولوگيانىڭ ەڭ باستى ارتىقشىلىعى – قىمبات وپتيكالىق جەلىنى جۇرگىزۋدىڭ قاجەتتىلىگىنسىز تۇراقتى جانە جوعارى جىلدامدىقتى ينتەرنەتكە قول جەتكىزۋ. ءبىز بۇگىن سارىباي بي اۋىلىندا FWA تەحنولوگياسىنىڭ 5G نەگىزىندە قانشالىقتى ءتيىمدى ءارى بولاشاعى بار ەكەنىن كوردىك. ەندى وسى اۋىلدىڭ جانە باسقا دا ۇقساس ەلدى مەكەندەردىڭ تۇرعىندارى قازىرگى زامانعى سەرۆيستەر مەن ونلاين قىزمەتتەردى پايدالانۋ مۇمكىندىگىنە يە بولادى دەپ سەنەمىن», دەپ مالىمدەدى قر تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.
«قازاقتەلەكوم» كومپانياسى ءوزىنىڭ جاڭا «اۋىلتەلەكوم» ەنشىلەس كاسىپورنى ارقىلى تابىستى سىناقتاردىڭ قورىتىندىسى بويىنشا وسى جوبانى رەسپۋبليكاداعى باسقا اۋىلداردا دا ەنگىزۋدى جوسپارلاپ وتىر.
جاڭا تەحنولوگيا 7 اۋىلعا ەنگىزىلىپ, 200-دەن استام ءۇي شارۋاشىلىعىن قامتىدى. 2025 جىلى 100-دەن استام اۋىلداعى 10 000-نان استام تۇرعىن زاماناۋي ينتەرنەتتىڭ يگىلىگىن كورەدى.
ء«بىز ەنشىلەس ۇيىمداردىڭ ءبىرىنىڭ جۇمىسىن اۋىلدىق جەرلەردە جوعارى جىلدامدىقتى ينتەرنەتپەن قامتاماسىز ەتۋگە باعىتتادىق. «اۋىلتەلەكوم» قازىرگى ۋاقىتتا ەڭ وڭتايلى تەحنولوگيالاردى انىقتاپ, اۋىل تۇرعىندارىنا ساپالى ينتەرنەتكە قول جەتكىزۋ مۇمكىندىگىن ۇسىنۋ ءۇشىن جۇمىس ىستەۋدە. سارىباي بي اۋىلىنداعى تەستىلەۋ كورسەتكەندەي, زاماناۋي سىمسىز تەحنولوگيالار – FWA اۋىلدىق جەرلەردە ينتەرنەتكە جوعارى جىلدامدىقتى قوسىلۋ ماسەلەسىن ءتيىمدى شەشە الادى», دەدى «قازاقتەلەكوم» اق باسقارما توراعاسى باعدات مۋسين.
تسيفرلىق دامۋ مينيسترىمەن كەزدەسكەن بىرقاتار تۇرعىندار جاڭا بايلانىس تەحنولوگياسىنا قاتىستى پىكىرلەرىن ءبىلدىردى. ءداستۇرلى وپتيكالىق جەلىلەردى الىس ايماقتاردا جۇزەگە اسىرۋ قيىن ءارى قىمبات بولعان جاعدايدا, FWA تەحنولوگياسى مينيمالدى ينفراقۇرىلىم شىعىندارىمەن ينتەرنەتكە قول جەتكىزۋگە مۇمكىندىك بەرەدى.
