سۋرەتتى تۇسىرگەن – يۋري بەككەر
ەسكەرتكىشتىڭ اشىلۋ سالتاناتىنا مادەنيەت جانە اقپارات ءمينيسترى ايدا بالاەۆا, الماتى قالاسىنىڭ اكىمى ەربولات دوساەۆ, ءانشىنىڭ اعاسى مۇرات سەركەباەۆ پەن ۇلى بايعالي سەركەباەۆ, سونداي-اق شىعارماشىلىق زيالى قاۋىم وكىلدەرى مەن قالا تۇرعىندارى قاتىستى. مينيستر ايدا بالاەۆا ەسكەرتكىشتىڭ اشىلۋى قازاق حالقىنىڭ ۇلى پەرزەنتىنە دەگەن قۇرمەتى ەكەنىن اتاپ ءوتىپ, ەرمەك سەركەباەۆتىڭ باي رۋحاني مۇراسى ۇلت جادىندا ماڭگى ساقتالاتىنىن ايتتى.
– ەرمەك سەركەباەۆ – سيرەك كەزدەسەتىن تالانت يەسى, كاسىبي شەبەرلىگى جوعارى مۋزىكانت. ول ميلليونداعان ونەرسۇيەر كورەرمەننىڭ شىنايى ماحابباتىنا بولەندى. بۇگىنگى قازاق وپەراسىن ەرمەك سەركەباەۆسىز ەلەستەتۋ قيىن. ونىڭ عيبراتتى عۇمىرى – مادەنيەتىمىزدىڭ تاريحىنداعى تۇتاس ءبىر تاراۋ. كوپشىلىك بىلمەۋى مۇمكىن, بىراق ول قوعامدىق-ساياسي ومىردە دە بەلسەندىلىك تانىتىپ, تاۋەلسىزدىگىمىزدىڭ قالىپتاسۋى مەن نىعايۋىنا زور ۇلەس قوستى. سونىمەن قاتار ەرمەك بەكمۇحامەد ۇلى دارىندى مۋزىكانتتار اۋلەتىنىڭ نەگىزىن قالادى. بالالارى مەن نەمەرەلەرى ونىڭ ءىسىن لايىقتى جالعاستىرىپ, قازاق ونەرىن الەمنىڭ ءار تۇكپىرىندە دارىپتەپ جاتىر. بۇل ەسكەرتكىش سۇيىكتى قالامىزدىڭ تاعى دا ءبىر اسەم دە اسەرلى نىسانى عانا ەمەس, ءوز ءومىرىن ونەرگە ارناعان تالاي جاستارعا كورنەكى ۇلگى, بيىك باعدار بولارىنا سەنىمدىمىن, – دەدى مادەنيەت جانە اقپارات ءمينيسترى.
ۆەدومستۆو باسشىسى ءوز سوزىندە اسقار تالانت يەسىنىڭ بەينەسىن قولادان سومداعان مۇسىنشىلەر ايدوس بۇركىتباەۆقا, تيمۋر ەرمۇحامەتوۆكە, اقىلبەك ورمانبەكوۆكە جانە قۋانىش اسىلبايعا ەرەكشە العىس ءبىلدىردى.
ءىس-شاراعا كەلگەن زيالى قاۋىم كاسىبي شەبەرلىگى ارقىلى مويىندالىپ, ەل جۇرەگىندەگى ەكىنشى ءومىرى باستالعان دارا دارىننىڭ ءومىر تىنىسى مەن شىعارماشىلىق جولى, ادامي قاسيەتى تۋرالى جۇرەكجاردى لەبىزدەرىن جەتكىزدى.
– ەرمەك سەركەباەۆ – بۇكىل جاندۇنيەسىن شىعارماشىلىققا ارناعان ادام. ول ءوزىنىڭ قايتالانباس تالانتىمەن ونەردىڭ شەكاراسىن كەڭىتتى, اقتىق دەمى قالعانشا بەكزات ونەردىڭ ءباسىن بيىك ۇستادى. ول كىسىمەن تالاي ساحنادا بىرگە ونەر كورسەتتىك, ۇزاق ساپارلاردا بىرگە جۇردىك. اسقاق تالانتى ءبىر توبە, كىسىلىك كەلبەتى ءوز الدىنا ءبىر توبە كەرەمەت جان ەدى. ارتىندا ولمەيتىن ءۇنى مەن سيقىرلى سازى قالدى. ىزىنەن ىلەسكەن شاكىرتتەرى, ونىڭ ونەرى ارقىلى شىعارماشىلىققا قىزىققان وسكەلەڭ ۇرپاق رۋحىنا ماڭگى قۇرمەت كورسەتەدى دەپ ەسەپتەيمىن. بۇل ەسكەرتكىش – ونەر مەن رۋحانياتتىڭ بيىكتىگىن پاش ەتەتىن ماڭگىلىك ەستەلىك. ول – ۇلى تۇلعانىڭ رۋحىنا كورسەتىلگەن قۇرمەت قانا ەمەس, ونىڭ ونەرى مەن مۇراسىن كەلەر ۇرپاققا امانات ەتۋدىڭ بەلگىسى, – دەدى وپەرا ءانشىسى الىبەك دىنىشەۆ.
ەرمەك سەركەباەۆ ۇلت مادەنيەتىنىڭ, اسىرەسە, كلاسسيكالىق مۋزىكا ونەرىنىڭ دامۋىنا ۇلكەن ۇلەس قوستى. ول ونەردەگى جولىن قۇرمانعازى اتىنداعى الماتى مەملەكەتتىك كونسەرۆاتورياسىندا وقي ءجۇرىپ, 1947 جىلى اباي اتىنداعى وپەرا جانە بالەت تەاترىندا قويىلعان ا.جۇبانوۆ پەن ل.ءحاميديدىڭ كلاسسيكالىق تۋىندىسى – «اباي» وپەراسىنداعى اباي پارتياسىن ورىنداۋدان باستاعان. كامەرالىق جانە ەسترادالىق ءانشى رەتىندە دە كەڭىنەن تانىلعان ونىڭ رەپەرتۋارىندا قازاقتىڭ حالىق اندەرىمەن قاتار, كەڭەس وداعى جانە دۇنيە ءجۇزى كومپوزيتورلارىنىڭ تاڭداۋلى تۋىندىلارى كەڭىنەن ورىن الدى. ول كوپتەگەن حالىقارالىق كونكۋرس پەن الەمدىك فەستيۆالعا قاتىسىپ, جەڭىمپاز اتاندى. قازاقتىڭ ءان ونەرىن ەۋروپا مەن ازيانىڭ بىرقاتار مەملەكەتىندە جانە اقش-تا وتكەن قازاق مادەنيەتىنىڭ كۇندەرىندە كەڭىنەن ناسيحاتتادى.
الەمدىك كلاسسيكالىق ونەردىڭ دارا تۇلعاسى ەرمەك بەكمۇحامەد ۇلى 2013 جىلدىڭ 16 قاراشاسىندا 88 جاسقا قاراعان شاعىندا دۇنيەدەن وزعان ەدى.
الماتى
