فوتو: gov.kz
قر وقۋ-اعارتۋ ءبىرىنشى ۆيتسە-ءمينيسترى ناتاليا جۇمادىلداەۆا اشىلۋ سالتاناتىنداعى سويلەگەن سوزىندە:
«جاۋتىكوۆ وليمپياداسى وقۋشىلاردىڭ ينتەللەكتۋالدىق الەۋەتىن دامىتۋعا عانا ەمەس, قازاقستانداعى ءبىلىم بەرۋدىڭ مارتەبەسىن ارتتىرۋعا دا ىقپال ەتەتىنىنە سەنەمىن», دەپ اتاپ ءوتتى.
سونداي-اق, وليمپيادانىڭ قازىلار القاسى توراعاسى, ۇلتتىق عىلىم اكادەمياسىنىڭ اكادەميگى اسقار جۇمادىلداەۆ ءوز سوزىندە جاۋتىكوۆ وليمپياداسى ءار ەلدىڭ ەڭ قابىلەتتى وقۋشىلارى اراسىندا ءبىلىم, تاجىريبە جانە يدەيالار الماساتىن بىرەگەي الاڭ ەكەنىن اتاپ ءوتتى.
«بۇل تاپسىرمالار ءبىلىمدى تەكسەرىپ قانا قويماي, سىني ويلاۋعا, شىعارماشىلىق شەشىمدەر تابۋعا, عىلىمدى ومىردە قولدانۋعا ۇيرەتەدى. سىزدەرگە سەنىمدىلىك, ساتتىلىك جانە جاڭا جەتىستىكتەر تىلەيمىن!», دەدى اسقار جۇمادىلداەۆ.
وقۋ-اعارتۋ مينيسترلىگىنىڭ ءباسپاسوز قىزمەتىنىڭ مالىمەتىنشە بايقاۋعا قازاقستان, قىرعىزستان, وزبەكستان, تۇرىكمەنستان, تاجىكستان, رەسەي, بەلارۋس, ارمەنيا, ازەربايجان, تۇركيا, گرۋزيا, بولگاريا, رۋمىنيا, سەربيا, موڭعوليا ەلدەرىنەن 700-گە جۋىق قاتىسۋشى كەلدى.
وليمپيادا 5 كۇنگە سوزىلىپ, جەڭىمپازدار 17 قاڭتار كۇنى انىقتالادى. ءبىلىم بايگەسىنىڭ قورىتىندىسى بويىنشا جەكە رەيتينگ, سونىمەن بىرگە مامانداندىرىلعان مەكتەپتەردىڭ مىقتى كوماندالارىنىڭ رەيتينگى شىعارىلادى. وليمپيادانىڭ جەڭىمپازدارى مەن جۇلدەگەرلەرىنە باعالى سىيلىقتار بەرىلەدى.
