ايتۋلى سايىستى «Qazaq kuresi» قاۋىمداستىعى ۇيىمداستىرىپ, «دالا قىراندارى» سپورتتى قولداۋ ۇلتتىق قورى دەمەۋشىلىك ەتتى. جاقسىلىق ۇشكەمپىروۆ اتىنداعى جەكپە-جەك سارايىنداعى سايىستى 55 كگ سالماق دارەجەسىندەگى بالۋاندار باستادى. قازاق كۇرەسىنەن بىلتىر الەم چەمپيونى اتانعان قىزىلوردالىق رۋسلان تەمىرجان فينالدىق تارتىستا قوستانايلىق ارحات بايمۋرزينمەن باق سىناستى. ەكەۋى فينالعا شىعار جولدا نەبىر تەگەۋرىندى قارسىلاستارىن ۇتتى. فينالدىق بەلدەسۋ دە اسا تارتىستى ءوتتى. الدىمەن رۋسلان ابجىلدىك تانىتىپ, جارتىلاي جەڭىس ۇپايىمەن العا شىققان. ارحات نەگىزگى ۋاقىتتىڭ بىتۋىنە 2 سەكۋند قالعاندا قارسىلاسىن الىپ ۇرىپ, تارازى باسىن تەڭەستىردى. ودان كەيىنگى قويان-قولتىق بەلدەسۋدە 20 جاستاعى بالۋان ءوزىن ءوزى جىعىپ بەرگەندەي كورىندى. رۋسلاندى قاپسىرا قىسىپ, كەۋدەسىنەن اسىرا لاقتىرۋعا ارەكەت ەتىپ ەدى, وڭاي بەرىلە سالاتىن رۋسلان با, بار سالماعىن سالا باسىپ قالىپ جەڭىسكە جەتتى.
60 كگ سالماقتا اقتوبەلىك نۇرلىحان مۇحانبەتوۆ فينالدىق تارتىستا ۇلىتاۋ وبلىسىنىڭ بالۋانى نۇرتىلەك قاراكەسەكوۆتى ايقىن ۇتتى. 66 كگ سالماق دارەجەسىندە استانالىق ەرجان ەرانعايىپوۆ سولتۇستىك قازاقستان وبلىسىنىڭ بالۋانى نۇرعالي تۇرسىنعازيەۆتى جەڭدى. 32 جاستاعى ەرجان ءالى دە بابىندا ەكەنىن بايقاتتى.
74 كگ سالماقتا اقتوبە وبلىسىنىڭ وكىلى بيبارىس تۇرعانبەك ۇلى جەتىسۋلىق ارمات ەسقازيەۆتەن باسىم ءتۇسىپ, چەمپيوندىق بەلبەۋدى يەلەندى. 22 جاستاعى بالۋان وزىنەن بەس جاس ۇلكەندىگى بار تاجىريبەلى قارسىلاسىنان قايمىقپاي, جەڭىستى ج ۇلىپ الدى. 82 كگ سالماقتا شىمكەنتتىك نۇرداۋلەت باقتىباي ۇلى اباي وبلىسىنىڭ بالۋانى ەرسىن سەيىتقازىنوۆتى جەڭسە, 90 كگ سالماق دارەجەسىندە الماتى قالاسىنىڭ بالۋانى ەراسىل جاڭاتاەۆ قىزىلوردالىق سەرىك اقىلبەكتى ايقىن ۇتتى.
تارتىستى بەلدەسۋلەر 100, 100 كگ-دان اۋىر سالماق دارەجەسىندە ءوتتى. 100 كگ سالماقتا فينالعا دەيىنگى قارسىلاستارىن ەركىن ەڭسەرگەن شىمكەنتتىك ەرسۇلتان مۇزاپپاروۆ قاراعاندىلىق ەرعانات مولداعۇلوۆپەن نەگىزگى ۋاقىتتا يتجىعىس ءتۇسىپ, قويان-قولتىق بەلدەسۋدە جەڭىسكە جەتتى. وزىنەن بويشاڭ قارسىلاسىن تىك كوتەرىپ الدى دا, قىرقا شالىپ اۋدارىپ تاستادى. ەنشىسىندە الەم چەمپيونى اتاعى, «قازاقستان بارىسى» رەسپۋبليكالىق ءتۋرنيرىنىڭ كۇمىس بەلبەۋى بار ەرسۇلتان وسىلايشا ءوزىنىڭ مىقتىلىعىن تاعى ءبىر پاش ەتتى.
اسا اۋىر سالماقتا (+100 كگ) قالىڭ كورەرمەن بىلتىر «قازاقستان بارىسى» رەسپۋبليكالىق ءتۋرنيرىنىڭ چەمپيونى اتانعان اباي وبلىسىنىڭ بالۋانى ەراسىل قاجىباەۆتىڭ باعى جاناتىنىنا شاك كەلتىرمەي, سەنىم ارتقان ەدى. بىراق ەراسىل العاشقى اينالىمدا-اق ءسۇرىندى, تۇركىستان وبلىسىنىڭ بالۋانى قايسار شامشيدينوۆتەن اسا المادى. قايسار قارىمدى ەكەنىن ءار بەلدەسۋىندە دالەلدەدى. وزىنەن سالماعى ەداۋىر اۋىر قارسىلاستارىن ايقىن جەڭدى. فينالدا ماڭعىستاۋلىق نۇرداۋلەت جارىلعاپوۆپەن جولى ءتۇيىستى. قوس الىپ نەگىزگى ۋاقىتتا ىرعاسىپ ءجۇردى دە, ءبىر-ءبىرىنىڭ شەڭگەلىنە ىلىنە قويمادى. كىلەمدەگى تورەشى قويان-قولتىق بەلدەسۋگە شاقىردى. بۇعان دەيىن ەكى قارسىلاسىن ءدال وسى قويان-قولتىق بەلدەسۋدە شوگە ءتۇسىپ اۋدارىپ تاستاعان ەدى. فينالدا دا ءدال وسى ءتاسىلىن قولدانۋعا ۇمتىلعانىمەن, قايسار تاباندىلىق تانىتىپ, بەرىلمەدى. ۇرىمتال ساتتە ءوزى ءادىس جاساپ, اۋىر قارسىلاسىن الىپ ۇردى.
«Qazaq kuresi» قاۋىمداستىعىنىڭ باس ديرەكتورى دامير بەكبوسىنوۆ ۇلتتىق كۇرەستىڭ قاناتى كەڭگە جايىلىپ, وزگە ەلدەردە دە دامۋى جولىندا اۋقىمدى جۇمىس اتقارىلاتىنىن اتاپ ءوتتى. ەلىمىزدە ءتول ونەرگە قىزىعۋشى جاستاردىڭ قاتارى ارتىپ كەلەتىنىن جەتكىزدى. «دالا قىراندارى» رەسپۋبليكالىق تۋرنيرىنە ىرىكتەۋدەن ءوتىپ قاتىسقان ءار بالۋاننىڭ تەگەۋرىندى ەكەنىن ايتتى. جەتكىنشەك ورەندەردىڭ ۇلتتىق سپورتقا ىنتاسىن وياتىپ, قىزىعۋشىلىعىن ارتتىرۋدا مۇنداي دودالاردىڭ ماڭىزى جوعارى ەكەنىنە ەرەكشە توقتالدى.
قازاق كۇرەسىنەن ۇلتتىق قۇرامانىڭ باس باپكەرى عاني كەلدىقۇلوۆ تۋرنير جاڭا ەسىمدەردىڭ جارقىراپ شىعاتىن دوداسى ەكەنىن ءمالىم ەتە كەلىپ: «جۋىردا عانا قازاق كۇرەسىنەن ەل چەمپيوناتى مارەسىنە جەتتى. سول تارتىستا جاس بالۋاندار توپ جارىپ, وزدەرىنىڭ قارىمىن بايقاتتى. استانا تورىندە وتكەن «دالا قىراندارى» سايىسىندا دا جاڭا ەسىمدەر تانىلدى. مۇنىڭ بارلىعى باسەكەلەستىكتىڭ جوعارى ەكەنىن ايقىنداي تۇسەدى. ءار سالماقتا سەگىز بالۋان عانا بەلدەسۋگە مۇمكىندىك الاتىن تارتىستىڭ ءباسى دە, باسەكەسى دە جوعارى. جەڭىمپازعا عانا 5 ميلليون تەڭگە مەن بەلبەۋ بەرىلەتىندىكتەن, ءاربىر بالۋان بارىن سالىپ كۇرەستى. بابى كەلىسىپ, باعى جانعان ساڭلاقتار توپ جاردى», دەدى.
تۋرنير بىرنەشە جىلدان بەرى تۇراقتى ۇيىمداستىرىلىپ كەلەدى. بايگەسى قوماقتى باسەكە جوعارى دەڭگەيدە ۇيىمداستىرىلدى. تاعى ءبىر كوڭىل قۋانارلىق كورىنىس, وليمپيادالىق سپورت تۇرلەرىنىڭ ساڭلاقتارى, وليمپيادا, الەم چەمپيوندارى ۇزاقتى كۇن ۇلتتىق كۇرەستى ۇلىقتاپ, بالۋاندارعا جانكۇيەرلىك تانىتتى. ريو جازعى وليمپياداسىنىڭ چەمپيونى دانيار ەلەۋسىنوۆ, الەم چەمپيونى مەرەي اقشالوۆ, لوندون جازعى وليمپياداسىنىڭ قولا جۇلدەگەرى اقجۇرەك تاڭاتاروۆ, پاريج جازعى وليمپياداسىنىڭ قولا جۇلدەگەرى عۇسمان قىرعىزباەۆ, الەم چەمپيوناتىنىڭ بىرنەشە دۇركىن جۇلدەگەرى المات كەبىسباەۆ سىندى ساڭلاقتار قاتىسۋشىلارعا قولداۋ كورسەتتى.
