بيىل ەل سپورتشىلارى قانداي جارىستارعا قاتىسادى

بيىل قازاقستاندا حالىقارالىق دەڭگەيدەگى بىرنەشە جارىس وتەدى. ال وتاندىق سپورتشىلار ادەتتەگىدەي الەمنىڭ ءار قيىرىندا وتەتىن ءدۇبىرلى دودالاردا باق سىنايدى.

الماتىداعى «شىمبۇلاق» تاۋ-شاڭعى كۋرورتىندا فريستايل-موگۋل جانە فريستايل-اكروباتيكادان جاسوسپىرىمدەر اراسىنداعى الەم چەمپيوناتىندا قازاقستان, گەرمانيا, كانادا, قىتاي, فرانتسيا, اقش, وڭتۇستىك كورەيا جانە باسقا دا ەلدەردەن 100-دەن استام سپورتشى 6 سپورت ءتۇرى بويىنشا 196 مەدال جيىنتىعىن ساراپقا سالىپ جاتىر. ەل قۇراماسى ساپىندا جاس دارىندى سپورتشىلار اناستاسيا گورودكو, دىنمۇحاممەد رايىمقۇل, يلنار يبراگيموۆ جانە باسقا دا ساڭلاقتار بار.

اقپان ايىندا قىتايدىڭ حاربين قالاسىندا وتەتىن IX قىسقى ازيا ويىندارىندا قازاقستاننىڭ 139 سپورتشىسى بياتلون, شايبالى حوككەي, مانەرلەپ سىرعاناۋ, شورت-ترەك جانە باسقا دا سپورت تۇرلەرى بويىنشا باق سىنايدى. جارىسقا 32 ەلدەن 1000-نان استام اتلەت قاتىسادى دەپ جوسپارلانىپ وتىر.

سونىمەن قاتار وتاندىق سپورتشىلار بيىل ءباا-دە وتەتىن II «بولاشاق ويىندارىنا» قاتىسادى. بۇعان دەيىن مەملەكەت باسشىسىنىڭ باستاماسىمەن قازاقستان 2026 جىلى ءداستۇرلى سپورت پەن كيبەرسپورتتى بىرىكتىرەتىن بىرەگەي تۋرنير – Phygital Games of the Future جارىسىن وتكىزۋ قۇقىعىنا يە بولعان ەدى. سپورتتىق ءىس-شارانى وتكىزۋ قۇقىعى ءۇشىن قازاقستان, پەرۋ, چيلي مەملەكەتتەرى باق سىناعان بولاتىن.

سونداي-اق جەرلەستەرىمىز بيىل بىرنەشە ماڭىزدى جارىستاردا سىنعا تۇسەدى. اتاپ ايتقاندا, ەر-ريادتاعى (ساۋد ارابياسى) VI يسلام ىنتىماقتاستىق ويىندارى, باكۋدەگى (ازەربايجان) III تمد ويىندارى, چەندۋدەگى (قىتاي) XII دۇنيەجۇزىلىك ويىندارىنا قاتىسادى.

جالپى 2025 جىلى وتاندىق سپورتشىلار 100-دەن استام حالىقارالىق جانە رەسپۋبليكالىق دەڭگەيدەگى سپورتتىق تۋرنيرلەر مەن جارىستارعا قاتىسادى.