فوتو: freepik.com
2030 جىلعا دەيىن ەلىمىزدە كولىك ينفراقۇرىلىمىن جاقسارتۋ بويىنشا اۋقىمدى جوبا جۇزەگە اسىرىلادى. بۇگىندە جاڭا اۆتوجولداردىڭ جالپى ۇزىندىعى – 4,7 مىڭ شاقىرىم, ونىڭ 3,7 مىڭ شاقىرىمى – ءى ساناتتاعى جولدار. سونىمەن قاتار بيىلعا مىناداي اۋقىمدى جوبالار جوسپارلانعان: قىزىلوردا – جەزقازعان (208 كم), اقتوبە – ۇلعايسىن (234 كم), قاراعاندى – جەزقازعان (572 كم), سارىاعاش قالاسى اينالما جولى (102 كم), قىزىلوردا قالاسى اينالما جولى (20 كم), قىزىلوردا – سەكسەۋىل (470 كم), اتىراۋ – دوسسور (86 كم), رۋدنىي قالاسى اينالما جولى (16,9 كم), جاڭاوزەن – كەندىرلى (156 كم), پەتروپاۆل قالاسى اينالما جولى (8 كم), تۇركىستان قالاسى اينالما جولى (29,6 كم), استانا – قوستاناي – رف-مەن شەكارا (830 كم), شىمكەنت قالاسى اينالما جولى (48 كم), اتىراۋ – ورال (ورتاشا جوندەۋ, 516 كم), اتىراۋ – شاپاي (136 كم), الماتى – تالعار – بايدىبەك بي (68 كم), الماتى – ۇشقوڭىر (48 كم), بەينەۋ – سەكسەۋىل (736 كم) جانە جايىق وزەنى ارقىلى وتەتىن كوپىر (6,5 كم). بۇل جوبالاردى ىسكە اسىرۋعا جالپى كولەمى 9 ترلن-نان اسا تەڭگە ينۆەستيتسيا كوزدەلگەن. قازىر ينۆەستور تارتۋ جۇمىسى بەلسەندى جۇرگىزىلىپ جاتىر.
تەمىرجول كولىگى سالاسىندا دا بىرقاتار اۋقىمدى جاڭعىرتۋ جوسپارلانعان. 2025 جىلى 225 جاڭا ۆاگون ساتىپ الىنادى. «دوستىق – مويىنتى» جوباسى بويىنشا تەمىرجول قۇرىلىسى اياقتالادى, بۇل وتكىزۋ قابىلەتىن 5 ەسە ارتتىرىپ, تاۋلىگىنە 12-60 پويىز جۇبىنىڭ ۇزدىكسىز قوزعالىسىن قامتاماسىز ەتەدى. سونىمەن قاتار «الماتى اينالما جولى» جوباسى جۇزەگە اسىرىلادى. سونداي-اق «دوستىق – بەسكول» جانە «مويىنتى – بالقاش» ۋچاسكەلەرىندە قوزعالىس اشۋ جوسپارلانعان. بۇل شەشىم كورسەتىلگەن ۋچاسكەلەردەگى پويىز قوزعالىسىن جاقسارتۋعا جانە جۇك تاسىمالى ماسەلەلەرىن شەشۋگە كومەكتەسەدى.
تەڭىز كولىگىن دامىتۋ ماقساتىندا اقتاۋ پورتىندا كونتەينەرلىك حاب سالۋ جۇمىستارى باستالدى, بۇل پورتتىڭ وتكىزۋ قابىلەتىن جىلىنا 240 مىڭ جفە-گە دەيىن ارتتىرادى. بۇل قازاقستاننىڭ حالىقارالىق لوگيستيكاداعى ورنىن نىعايتىپ, ازەربايجان, گرۋزيا جانە تۇركيا ارقىلى وتەتىن ترانسكاسپي باعىتىنداعى كونتەينەرلەر تاسىمالى كولەمىن ۇلعايتۋعا, سونداي-اق قىتايدان ەۋروپاعا جەتكىزىلەتىن ترانزيتتىك جۇكتەردىڭ ءبىر بولىگىن قايتا باعىتتاۋعا مۇمكىندىك بەرەدى. سونىمەن قاتار پورتتا تەرەڭدەتۋ جۇمىستارىن جۇرگىزۋ جوسپارلانعان. بۇل ونىڭ تەرمينالدىق قۋاتى مەن كونتەينەرلەردى تاسىمالداۋدىڭ تيىمدىلىگىن ۇلعايتادى.
