فوتو: ءماجىلىستىڭ ءباسپاسوز قىزمەتى
ءماجىلىس دەپۋتاتتارى ەڭ اۋەلى وڭىردەگى «Agrotur» شارۋا قوجالىعى جىلىجايىنىڭ تىنىس-تىرشىلىگىمەن تانىستى. مۇندا 4 گەكتار جەردە قيار مەن قىزاناقتان باستاپ كوپتەگەن باقشا ونىمدەرى وسىرىلەدى. ولاردىڭ قاتارىندا ءزايتۇن مەن روزمارين, كيۆي مەن قۇلپىناي, انار مەن قۇرما سياقتى سيرەك كەزدەسەتىن جەمىستەر بار. سونداي-اق ءبىر گەكتار جەردە قيار مەن قىزاناق كوشەتى, ال ەكى گەكتار باقتا المۇرت, شيە مەن ورىك ەگىلەدى. سونىمەن بىرگە قوجالىق گوللانديالىق گۇلدەردى ءوسىرىپ, ساتىلىمعا شىعارادى. قازىر تروپيكالىق جەمىستەردى ءوسىرۋ جولعا قويىلعان.
دەپۋتاتتار جىلىجاي قىزمەتكەرلەرىمەن اڭگىمەلەسىپ, اۋىل شارۋاشىلىعى سالاسىن دامىتۋعا باعىتتالعان زاڭدار تۋرالى باياندادى. كاسىپكەرلەر تۇقىمباق شارۋاشىلىقتارىن سۋبسيديالاۋ, جىلىجايلاردى كومىرمەن قامتاماسىز ەتۋدە تۋىندايتىن پروبلەمالارعا قاتىستى ويلارىن ورتاعا سالىپ, ۇسىنىستارىن جەتكىزدى.
ء«بىز بۇل جىلىجاي كەشەنىنە ارنايى كەلىپ وتىرمىز. ويتكەنى پارلامەنتتە جىلىجاي شارۋاشىلىقتارىن مەملەكەتتىك سۋبسيديالاۋ تۋرالى ماسەلە كوتەرگەن ەدىك. ول وڭ شەشىمىن تاۋىپ, جىلىجايلارعا سۋبسيديا بەرىلە باستادى. جىلىجاي – اۋىل شارۋاشىلىعى سالاسىنىڭ ماڭىزدى باعىتتارىنىڭ ءبىرى. سوندىقتان ايتىلعان ۇسىنىستارىڭىزدىڭ ءبارى ءتيىستى مينيسترلىكتەرگە جەتكىزىلىپ, زەردەلەنەتىن بولادى. قاجەت بولسا, زاڭناماعا وزگەرىس ەنگىزۋ ماسەلەسىن دە قاراستىرامىز», دەدى قايرات بالابيەۆ.
ودان ءارى دەپۋتاتتار سارىاعاش قالاسىنداعى «بايتەرەك - شىمكەنت» تاماق ونەركاسىبى مەكەمەسىنە باردى. كاسىپورىن ساپالى كونديتەرلىك تاعامدارمەن ىشكى نارىقتى قامتاماسىز ەتىپ قانا قويماي, كورشىلەس ەلدەرگە دە ەكسپورتقا شىعارادى. دەپۋتاتتار سۇرانىسى جوعارى ءونىم تۇرلەرىن كوبەيتۋ, ىشكى ءوندىرىس الەۋەتىن ارتتىرۋ سياقتى بىرقاتار سۇراق بويىنشا پىكىر الماستى.
