فوتو: senate.parlam.kz
ماۋلەن اشىمباەۆ دەپۋتاتتاردىڭ وڭىرلەردە ازاماتتارمەن كەزدەسۋلەر وتكىزىپ, سۇحباتتىڭ نەگىزگى ويلارىن حالىققا جەتكىزۋگە ۇلەس قوسقانىن اتاپ ءوتتى.
«مەملەكەت باسشىسى سۇحباتتا 2024 جىلى ءار سالا بويىنشا اتقارىلعان جۇمىستاردى قورىتىندىلاپ, الداعى باسىم باعىتتاردى بەلگىلەپ بەردى. سونداي-اق, بىلتىر پارلامەنت قابىلداعان زاڭداردىڭ ماڭىزدىلىعى دا ەرەكشە اتالىپ ءوتىلدى. جالپى, پرەزيدەنتىمىزدىڭ بارلىق باستامالارى مەن رەفورمالارىنىڭ ستراتەگيالىق ماقساتى – ەگەمەندىگىمىزدى جانە ەكونوميكامىزدى ودان ءارى نىعايتۋ», دەدى سەنات توراعاسى.
ونىڭ پىكىرىنشە, سۇحباتتا ەلىمىزدىڭ الەۋمەتتىك-ەكونوميكالىق دامۋىنا قاتىستى ماڭىزدى ساۋالدارعا جاۋاپ بەرىلىپ, مەملەكەتتىك ساياساتتىڭ نەگىزگى باعىتتارى ايقىندالدى.
«سىرتقى ساياسات پەن حالىقارالىق ىنتىماقتاستىق ماسەلەلەرى دە نازاردان تىس قالعان جوق. سونىمەن قاتار, پرەزيدەنتىمىز قوعامدا قىزۋ تالقىلانعان وزەكتى ماسەلەلەردىڭ ءتۇيىنىن تارقاتىپ, ولار بويىنشا ءوز ۇستانىمىن ءبىلدىردى. مۇنداي اشىقتىق پەن ديالوگ جانە ازاماتتاردىڭ تالاپ-تىلەكتەرىنە جەدەل نازار اۋدارۋ – «زاڭ مەن ءتارتىپ» قاعيداتتارىنا تابان تىرەگەن ادىلەتتى قازاقستاننىڭ جارقىن كورىنىسى ەكەنى ءسوزسىز. وسى رەتتە, پرەزيدەنتىمىزدىڭ باستاماسىمەن قولعا الىنعان رەفورمالاردى زاڭنامالىق تۇرعىدان قامتاماسىز ەتۋ اسا ماڭىزدى ەكەنىن تاعى ءبىر اتاپ وتكەن ءجون», دەدى ماۋلەن اشىمباەۆ.
ماۋلەن اشىمباەۆ الداعى ۋاقىتتا ەكونوميكامىزدى دامىتۋعا جانە حالىقتىڭ ءال-اۋقاتىن ارتتىرۋعا ارنالعان بىرقاتار ماڭىزدى زاڭدار قارالاتىن تىلگە تيەك ەتتى.
«ولاردى ساپالى پىسىقتاپ, ۋاقتىلى قابىلداۋىمىز قاجەت. جالپى, مەملەكەت باسشىسىنىڭ پارلامەنتكە ارتقان جوعارى سەنىمىن اقتاپ, ەلدىك مۇددە جولىندا ايانباي ەڭبەك ەتۋمىز كەرەك. وسى جولدا ءبارىمىز بىرلەسىپ, ناتيجەلى جۇمىس ىستەيمىز دەپ سەنەمىن جانە الداعى قىزمەتتەرىڭىزگە ساتتىلىك پەن تابىس تىلەيمىن!», دەپ ءسوزىن قورىتىندىلادى سەنات توراعاسى.
