فوتو: 7kun.kz
قاسىم-جومارت كەمەل ۇلىنىڭ «وسى سۇحباتتى سىزدەردىڭ باسىلىمدارىڭىزعا بەرۋ ارقىلى ەلىمىزدەگى جۋرناليستيكانىڭ تىرەگى سانالاتىن قازاق تىلىندەگى مەدياعا قولداۋ كورسەتكىم كەلدى» دەگەنى دە تۇيسىگى بار جانعا كوپ جايتتان حابار بەرسە كەرەك.
جالپى, «جۇدىرىق بەتكە تيگەنگە دەيىن» دەموكراتيا ساقتالاتىن ساتتە تۇرمىز عوي... كەز كەلگەن ۇلت قيىن-قىستاۋ كۇندەردە عانا ەمەس, ءوزىنىڭ بۇكىل ءجۇرىپ وتەتىن جولىندا پاسسيونار, مەملەكەتشىل تۇلعالاردىڭ سوڭىنان ەرەدى.
بۇگىن الەم وزگەرگەن. قالاي بولعاندا دا جاھاندانۋدىڭ كوشىنەن قالىپ, ەسىك-تەرەزەمىزدى تاس بۇركەپ, قىمتاپ, شەكارامىزدى شەگەندەپ, قاقپامىزعا سوم تەمىر ءىلىپ قوياتىن ءداۋىر ەمەس, البەتتە. بارماساق, كەلمەسەك – ەل جارىلادى, الماساق, بەرمەسەك – دەم تارىلادى. الەمدىك ساياسي كوشتىڭ موزايكاسىنا ءوز بوياۋ-بولمىسىمىزدى, جاراتىلىس پەن تابيعاتىمىزدى كوشىرىپ اپارعىڭ كەلەدى.
الەمنىڭ ساياسي كارتاسىندا باتىس پەن شىعىس, وڭتۇستىك پەن سولتۇستىك قاقپاقىلداسىپ, قاپسىرا قۇشاقتاپ قابىرعاڭدى ءبىر-بىردەن ساناپ جاتقان وسىناۋ الماعايىپ شاقتا قازاق قوعامىنداعى ءاربىر جۇمىر باستى, سەرگەك سانالى پەندەنىڭ ءبىرىنشى بورىشى – تاۋەلسىزدىكتى قورعاۋ. ەرسىلى-قارسىلى اعىستارعا, مەڭزەۋ مەن ەمەۋرىنگە, ەلدىك مۇراتتارعا قۇرىلعان بۇگىنگى سۇحباتتىڭ نەگىزگى لەيتموتيۆى – وسى. اينالدىرعان ءتورت-بەس جىلدىڭ بەدەرىندە قازاق ەلى الاعاي دا بۇلاعاي ساتتەردى باستان وتكەردى. جۇيەلى رەفورمالارعا قۇرىلعان وڭ وزگەرىستەر از ەمەس.
قوعامدا كوپ ماسەلەردى «قاڭتارعا دەيىن جانە كەيىن» دەپ قاراستىراتىن جاعداي قالىپتاسىپ قالدى. قوعام تەك سول قاڭتار وقيعاسىنان كەيىن عانا تىرىلگەن سەكىلدى اسەر قالدىرادى. وعان دەيىن ەشكىم يت اۋزىنا اعاش تىعىپ وتىرعان جوق قوي... ارينە, قاسىرەتتى «قاڭتار وقيعاسى» بيلىكتىڭ ۇشار باسىنان اۋىلدىق بولىمشەگە دەيىن, التىن ساندىقتىڭ ۇستىندە وتىرعان وليگارحتان كۇركەدە كۇنەلتىپ جۇرگەن جانعا دەيىن, قارتتارىمىزدىڭ ءاميانىنان ءسابيدىڭ جورگەگىنە دەيىن, دۋبايداعى ءسان-سالتاناتتىڭ ورتاسىندا كوفە ءىشىپ وتىرعان الپاۋىتتان 5 مىڭ مەتر تەرەڭدە كەن قازىپ جۇرگەن كەنشىگە دەيىن جاعدايدى قايتا قاراپ, «كوررەكتيروۆكا» ەنگىزۋدى كۇن تارتىبىنە قويدى. الايدا 2019 جىلعى پرەزيدەنت سايلاۋىنان كەيىنگى قاسىم-جومارت توقاەۆتىڭ جاريالاعان كەزەڭ-كەزەڭىمەن ء(ۇش كەزەڭنەن تۇراتىن) جۇزەگە اسىرىلۋعا ءتيىس رەفورمالىق پاكەتتەر ءتۇرلى احۋالدارعا قاراماستان جۇيەلى تۇردە جۇزەگە اسىرىلىپ جاتقانىن ەرەكشە اتاپ ايتقىم كەلەدى.
كورەر كوز, تۇيسىنەر سەزىم بولسا, پرەزيدەنتتىڭ قوعامنىڭ, پارلامەنت پەن ۇكىمەتتىڭ, جەرگىلىكتى اتقارۋشى بيلىكتىڭ الدىنا قويعان مىندەتتەرى بويىنشا از جۇمىس ىستەلگەن جوق. پارلامەنت تورىندەگى جولداۋلار, ۇلتتىق قۇرىلتاي مىنبەرىندەگى تۇجىرىمدامالار, كاسىبي فورۋمدارداعى سالالىق تاپسىرمالار, پارتيالىق پلاتفورمالارداعى مىندەتتەر – ءبارى-ءبارى ءبىر جىپكە بايلانعان جۇيەلى جوبالار.
ارينە, كەيبىر ماسەلەلەردە جەكەلەگەن ۋاكىلەتتى ورگاندار سىر بەردى. جاۋىردى جابا توقيتىن ەمەس, ۇكىمەتتىڭ ءبىرتۇتاس قارقىندى جۇمىسىنا ۇيلەسە الماي, ناتيجەسىندە زاردابى حالىققا تيگەن جاعدايلار بولدى. ەڭ باستىسى — مەملەكەتتىك قۇرىلىمدى قۇراپ وتىرعان نەگىزگى جۇيەنىڭ ىرعاقتى جۇمىسى سىر بەرگەن جوق. پرەزيدەنت ۇكىمەتكە قاتىستى باعاسىندا بۇل ماسەلەنى جاسىرىپ-جاپپاي, بارىن بار, جوعىن جوق دەپ اتاپ كورسەتىپتى. ەمەۋرىننەن تۇسىنگەنىم, الداعى كۇندەرى وتەتىن ۇكىمەتتىڭ قورىتىندى جيىنىندا ناقتى دياگنوزى قويىلاتىن دا سەكىلدى.
پرەزيدەنت حالىقپەن قويان-قولتىق جۇمىس ىستەپ جاتقان پارلامەنتتىڭ كاسىبي قىزمەتىن, قوعامنىڭ تامىرىن تاپ باساتىن ساپالى زاڭداردى شىعارۋداعى ەسەلى ەڭبەگىن وتە جوعارى باعالاعانىنا ءدان ريزا بولدىم. ءبارىن كوزىممەن كورىپ, جانىممەن سەزىنىپ, بويىمىزدان وتكىزىپ, جۇرەككە جەتكىزىپ, بەل ورتاسىندا ءجۇرمىز عوي. ءتۇرلى قارجىلىق توپتار مەن كوزگە كورىنبەيتىن لوببيستەردىڭ قارسىلىقتارىنا قاراماستان ءاربىر تاعدىرشەشتى نورما ءۇشىن جان اياماي كۇرەسىپ جاتقان, سىن ساعاتتا وت پەن سۋدىڭ ورتاسىندا جۇرگەن ارىپتەستەرىمنىڭ جانكەشتى ەڭبەگى ەرلىككە پارا-پار دەر ەدىم.
جاناربەك ءاشىمجان,
ءماجىلىس دەپۋتاتى
