2024 جىل ەلىمىز ءۇشىن وڭاي بولعان جوق. تابيعي اپاتتار مەن سىرتقى فاكتورلاردىڭ سالقىنى ءتيدى, سونداي-اق الەمدە بۇرىن-سوڭدى بولماعان كۇردەلى گەوساياسي احۋال قالىپتاستى. دەگەنمەن ەلىمىز بەيبىتشىلىك ءۇشىن ءتيىمدى ديالوگ ورناتا الاتىن مەملەكەت رەتىندە ءوزىنىڭ حالىقارالىق پوزيتسياسىن نىعايتتى. بۇل ەلدىڭ قاۋىپسىزدىگىن قامتاماسىز ەتىپ قانا قويماي, ەكونوميكانىڭ تۇراقتى دامۋىنا سەپتىگىن تيگىزدى. الەۋمەتتىك مەملەكەت رەتىندەگى مىندەتتەرىن جۇيەلى جۇزەگە اسىرۋدى تاباندى تۇرعىدا جالعاستىردى. ايتالىق, بىلتىردان باستاپ «ۇلتتىق قور – بالالارعا» باعدارلاماسى اياسىندا تولەم بەرىلە باستادى. زەينەتاقى, جاردەماقى, شاكىرتاقى, ازاماتتىق سالا قىزمەتكەرلەرىنىڭ جالاقى مولشەرى ءوستى. جۇزدەگەن جاڭا مەكتەپ, بالاباقشا جانە دەنە شىنىقتىرۋ-ساۋىقتىرۋ ورتالىقتارى سالىندى. شەتەلدىڭ وننان اسا بەدەلدى جوعارى وقۋ ورنىنىڭ بولىمشەسى اشىلدى. عىلىمدى قارجىلاندىرۋ كولەمى ارتا ءتۇستى, مادەنيەت سالاسىنىڭ قىزمەتكەرلەرىنە ەلەۋلى قولداۋ كورسەتىلىپ جاتىر. بۇقارالىق سپورتتى دامىتۋعا دا باسا ءمان بەرىلدى. مۇنىڭ ءبارىن ازاماتتاردىڭ جاسامپازدىق الەۋەتىن ارتتىرۋ ءۇشىن پايدالى ينۆەستيتسيا دەۋگە بولادى.
«كەلەشەك» اتتى بىرىڭعاي ەرىكتى جيناقتاۋشى جۇيەنىڭ زاڭنامالىق نەگىزىن قالىپتاستىرۋ ماقساتىندا كوپ جۇمىس اتقارىلدى. وندا جيناقتالعان قارجىنى ەلىمىزدىڭ, شەتەلدىڭ كوللەدجدەرى مەن جوعارى وقۋ ورىندارىندا ءبىلىم الۋ, سونداي-اق تۇرعىن ءۇي الۋعا جۇمساۋعا بولادى.
ەكولوگيا سالاسىندا دا ماڭىزدى وزگەرىستەر جۇزەگە اسىرىلىپ جاتىر. سۋ رەسۋرستارىن باسقارۋ, تابيعاتتى قورعاۋ, سۋ ماماندارىنىڭ تاپشىلىعىن شەشۋ باعىتىندا قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى قۇرىلىپ, سۋ شارۋاشىلىعىن دامىتۋعا ارنالعان باعدارلامالار قولعا الىندى. بۇل قادام ەلدىڭ ەكولوگيالىق تۇراقتىلىعىن قامتاماسىز ەتۋگە, يرريگاتسيالىق كانالداردى جاڭعىرتۋعا باعىتتالعان.
2025 جىل «جۇمىسشى ماماندىقتار جىلى» دەپ جاريالاندى. بۇل – جۇمىسشى ماماندىقتارىن دارىپتەپ, ناسيحاتتاپ, جاستاردى وسى سالاعا تارتۋدى كوزدەيتىن ماڭىزدى باستاما.
پرەزيدەنت اۋىلدىق ايماقتاردى دامىتۋعا ارنالعان ۇلتتىق جوبالاردىڭ جالعاساتىنىن ايتتى. جوبالار اۋىل تۇرعىندارىنىڭ ءومىر ءسۇرۋ ساپاسىن ارتتىرۋعا, مەديتسينالىق ينفراقۇرىلىمدى نىعايتۋعا, جاڭا جۇمىس ورىندارىن اشۋعا, حالىقتىڭ الەۋمەتتىك جاعدايىن جاقسارتۋعا باعىتتالعان. ەلگە ورالعان جاس ماماندارعا جاعداي جاساۋ, ولاردى جوعارى تابىستى سالالارعا تارتۋ ۇكىمەتتىڭ باسىم مىندەتتەرىنىڭ بىرىنە اينالادى.
مەملەكەت باسشىسى حالىقتىڭ ءۇنى – رەفورمالاردىڭ نەگىزى ەكەنىن ءارى حالىقتىڭ ءومىر ساپاسىن جاقسارتۋعا ارنالاتىنىن باسا ايتتى. سول تۇرعىدا پرەزيدەنت باستامالارىن قولداپ, ستراتەگيالىق مىندەتتەردى جۇزەگە اسىرۋعا ات سالىسۋ ساياسي كەمەلدىلىكتىڭ كورىنىسى بولماق. بارشامىزعا قوعام ءومىرىن, ادام قىزمەتىن دۇرىس جولعا قويىپ, جاپپاي ءوسىپ-وركەندەۋ جولىندا جۇمىلا ەڭبەكتەنە بەرۋ قاجەت.
جۇلدىز سۇلەيمەنوۆا,
ءماجىلىس دەپۋتاتى
