2024 جىلدىڭ 20 جەلتوقسانىنان 2025 جىلدىڭ 3 قاڭتارىنا دەيىن شامامەن 5,1 ملن تەكشە مەتر سۋ جىبەرىلدى. مينيسترلىك 2025 جىلدىڭ 1 ساۋىرىنە دەيىن قويماداعى سۋ كولەمىن 300 ملن تەكشە مەتر نەمەسە 73%-عا دەيىن ازايتۋدى جوسپارلاپ وتىر.
اقتوبە سۋ قويماسىندا شامامەن 51 ملن تەكشە مەتر سۋ بار. 1 ساۋىرگە دەيىن سۋ كولەمى 47,3 ملن تەكشە مەتر دەڭگەيىنە دەيىن ازايتىلۋعا ءتيىس. ال باتىس قازاقستان وبلىسى بىتىك قويماسىنداعى سۋ كولەمى 34,4 ملن تەكشە مەترگە دەيىن تومەندەتىلدى. بۇگىندە سۋ قويماسىنان سەكۋندىنا 8,3 تەكشە مەتر سۋ جىبەرىلىپ جاتىر.
شىعىس قازاقستان وبلىسىنداعى بۇقتىرما سۋ قويماسى 79%-عا تولى. مينيسترلىك 1 ساۋىرگە دەيىن قويماداعى سۋ كولەمىن تاعى 8%-عا ازايتۋعا نيەتتى. قاراعاندى وبلىسىنداعى ىنتىماق سۋ قويماسىندا 69 ملن تەكشە مەتر سۋ بار. كوكتەمدە تاسقىن سۋ قابىلداۋ ءۇشىن سۋ قويماسىن 39%-عا دەيىن بوساتۋ قاجەت.
ۇلىتاۋ وبلىسىنداعى كەڭگىر سۋ قويماسىنداعى سۋ كولەمى 86%-عا تومەندەتىلدى. كوكتەمگە دەيىن تاعى 11%-عا جۋىق سۋ جىبەرۋ جوسپارلانعان. قوستاناي وبلىسىنداعى جوعارعى توبىل سۋ قويماسىندا 585,4 ملن تەكشە مەتر سۋ بار. سۋ قويماسىنىڭ جۇمىس رەجىمىنە سايكەس, 1 ساۋىرگە دەيىن سۋ كولەمىن 499,37 ملن تەكشە مەتر نەمەسە 61%-عا دەيىن ازايتۋ كۇتىلەدى.
«كوكتەمدە تاسقىن سۋدى رەزەرۆۋارلاردا جيناپ قانا قويماي, كولدەر جۇيەسىنە, تابيعي جايىلىمدار مەن شابىندىقتارعا باعىتتاۋ وتە ماڭىزدى. سول سەبەپتى سۋدى ءتيىمدى ءبولۋ جۇمىسىن الدىن الا جوسپارلاۋ قاجەت. بيىل شارۋالار مەن باسقا دا سۋ پايدالانۋشىلاردىڭ سۇرانىسى تولىق قاناعاتتاندىرىلدى. وتكەن سۋارۋ كەزەڭىندە ەلىمىزدىڭ شارۋا قوجالىقتارىنا شامامەن 11 ملرد تەكشە مەتر سۋ بەرىلدى. بۇدان بولەك, ۇلكەن جانە شاعىن سۋ ايدىندارىن ساقتاۋ جانە قالپىنا كەلتىرۋ بويىنشا ۇلكەن جۇمىس اتقارىلدى», دەپ اتاپ ءوتتى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
