فوتو: gov.kz
بيىل مەكتەپكە دەيىنگى ۇيىمدارعا بارمايتىن بالالاردىڭ اتا-انالارىنا ادىستەمەلىك قولداۋ كورسەتۋ, بالا كۇتىمىنە بايلانىستى كەڭەس بەرۋ پۋنكتىنىڭ سانى 4 245-كە دەيىن كوبەيتىلەدى.
وقۋ-اعارتۋ مينيسترلگىنىڭ مالىمەتىنشە, مەملەكەتتىك 260 بالاباقشادا قايتا جوندەۋ جۇمىستارى جۇرگىزىلىپ, قۇرال-جابدىقتار جاڭارتىلادى. 500 مىڭ بالا قازاق ءتىلىن تەرەڭ وقىتۋ بويىنشا «تىلگە بويلاۋ» پيلوتتىق جوباسىنا قاتىسادى. 2025 جىلى ەلىمىزدىڭ بارلىق وڭىرىندە «اقشا بالانىڭ سوڭىنان جۇرەدى» قاعيداتى بويىنشا مەكتەپكە دەيىنگى تاربيە جانە وقىتۋ ۇيىمدارىن ۆاۋچەرلىك قارجىلاندىرۋ جۇيەسىن ەنگىزۋ جوسپارلانىپ وتىر.
ورتا ءبىلىم بەرۋدە 272,8 مىڭ وقۋشىعا ارنالعان ورىن ەنگىزۋ, ەرەكشە قاجەتتىلىگى بار بالالاردىڭ 90 پايىزىن ارنايى پسيحولوگيالىق-پەداگوگيكالىق قولداۋ جانە ەرتە جاستان تۇزەتۋ شارالارىمەن قامتۋ, فيزيكا, حيميا, بيولوگيا, روبوتوتەحنيكا, STEM پاندەرى بويىنشا 1 مىڭ زاماناۋي كابينەت ساتىپ الۋ, 1,3 مىڭ اۋىل مەكتەبىن قايتا جاڭارتۋ جوباسىن ىسكە قوسۋ كوزدەلگەن.
كوللەدجدەردە تەحنيكالىق جانە كاسىپتىك ءبىلىم بەرۋ باعىتى بويىنشا سۇرانىسقا يە ماماندىقتارعا (9-سىنىپ تۇلەكتەرىن) 100% تەگىن وقىتۋ, جۇمىسقا ورنالاستىرۋ مىندەتتەمەسىمەن ماقساتتى تاپسىرىستى 10 مىڭ ورىنعا ۇلعايتۋ, جان باسىنا شاققانداعى نورماتيۆتىك قارجىلاندىرۋ كولەمىن 2 ەسەگە ارتتىرۋ, 80 كوللەدجدىڭ ماتەريالدىق-تەحنيكالىق بازاسىن جەكە ينۆەستيتسيالاردى تارتۋ ارقىلى نىعايتۋ جانە جابدىقتاۋ, كوللەدجدەردە 10 شاعىن كاسىپورىن اشۋ جوسپارلانعان.
