سۇحباتتان ىشكى جانە سىرتقى ساياسات, ەكونوميكا, الەۋمەت, قوعامنىڭ دامۋى, مەملەكەت پەن زاڭنىڭ نىعايۋى, ادىلدىكتىڭ ورنىعۋى سياقتى ماسەلەلەرگە قاتىستى انىق وي, ايقىن ۇستانىم اڭعاردىق. كوڭىلدى كۇپتى ەتكەن كەيبىر ماڭىزدى سۇراقتارعا دا جاۋاپ الدىق.
«Ana tili» گازەتىنە بەرىلگەن سۇحباتتا قازاق ءتىلىنىڭ جايى, سونىڭ ىشىندە ءبىزدىڭ باستامامىزبەن قۇرىلعان «قازاق ءتىلى» ەنداۋمەنت قورى تۋرالى بولەك ايتىلدى. بۇل قور قازاق ءتىلىن قولداۋ, ونىڭ قولدانىس اياسىن كەڭەيتۋ, ءتىلدى وقىتۋ ادىستەمەسىن دامىتۋ, قازاق تىلىندەگى مازمۇندى كوبەيتۋ ءۇشىن جۇمىس ىستەيدى.
قور قۇرىلعاندا وعان ءبىرىنشى بولىپ ۇلەس قوسقان قاسىم-جومارت توقاەۆ بولاتىن. پرەزيدەنت جەكە قاراجاتىنان 7 ملن تەڭگە ءبولىپ, كوپكە ۇلگى كورسەتتى. مەملەكەت باسشىسىنىڭ وسى قادامىنا ەرگەن ەلىمىزدىڭ كاسىپكەرلەرى قورعا 500 ملن-عا تارتا قاراجات سالدى. قازىر قوردا جينالعان قاراجاتتىڭ ناقتى كولەمى – 493 669 299 تەڭگە.
ەنداۋمەنت قورىنا كەلگەن قاراجاتتىڭ ءوزى جۇمسالمايدى, تەك سول قاراجاتتى باسقارۋدان تۇسكەن ۇستەمە تابىس جۇمسالادى. 2024 جىلى «قازاق ءتىلى» ەنداۋمەنت قورىنىڭ ۇستەمە تابىسى 75 473 020 تەڭگەنى قۇرادى.
بۇل «قازاق ءتىلى» قوعامىنىڭ جۇمىسىن جانداندىرۋعا مۇمكىندىك بەردى. ءبىر جىلدىڭ ىشىندە 40-قا تارتا ايماقتىق, رەسپۋبليكالىق جانە حالىقارالىق ءىس-شارا وتكىزدىك. تولىق اقپارات «قازاق ءتىلى» قوعامىنىڭ til.kz سايتىندا ورنالاسقان.
سۇحباتىندا پرەزيدەنت «قازاق ءتىلى» ەنداۋمەنت قورىن قولداۋ قاجەتتىگىن بولەك ايتتى. ءبىز ءۇشىن بۇل – زور دەمەۋ, قازاق ءتىلىن كەڭىنەن قولداۋعا جول اشاتىن ۇلكەن مۇمكىندىك, اسا زور جاۋاپكەرشىلىك جۇكتەيتىن سەنىم. وسىنداي قولداۋى مەن سەنىمى ءۇشىن مەملەكەت باسشىسىنا العىس ايتامىز. مەملەكەتتىك ءتىلدى ءتيىستى بيىك تۇعىرىنا شىعارۋ جولىنداعى جۇمىسىمىزدى ۇدەتەمىز.
راۋان كەنجەحان ۇلى,
حالىقارالىق «قازاق ءتىلى» قوعامىنىڭ پرەزيدەنتى
