ويداعىمىزدى بولدىرامىز!

مەرزىمدى ءباسپاسوز ءبارىبىر مەملەكەتتىك ساياساتتان حابار بەرەتىن ماڭىزدى اقپارات كوزى بولىپ قالا بەرەدى» دەگەن سوزدەرى ءومىر بويى گازەتتە جۇمىس ىستەگەن ادام رەتىندە جانىمىزعا بولەكشە جاققانىن الدىمەن ايتقىمىز بار. ايتقانبىز, تاعى ايتامىز: گازەت وقۋ – مەملەكەتتىك ماسەلە. قيت ەتسە ادام قۇقىمەن اۋىز جاپتىرا سالاتىن, ءتىپتى مەكتەپ مۇعالىمىنىڭ, مەملەكەتتىك قىزمەتكەردىڭ گازەت وقىماۋىن قالىپتى جايت سانايتىن, مەملەكەتشىلدىكتىڭ باستى مىنبەرىنە – باسپاسوزگە ارحايكاداي قارايتىن, اسىرە­ساق ۇستانىمنىڭ ۇستىنى وسىندايدا ءبىر ىرعاتىلىپ كەتەدى, بيىلعى, 2025 جىلعى باسپاسوزگە جازىلۋ ىسىنە مەملەكەتتىك دەڭگەيدە ءمان بەرىلەدى دەپ سەنگىمىز كەلەدى.

 باسپاسوزگە باسقا سوزدەي قاراۋعا بولمايدى.

پرەزيدەنت قاسىم-جومارت توقاەۆ ءوز ءسوزىن بىلاي تۇيىندەپتى: «شىن مانىندە, بۇل سۇحباتتى ەلگە تەرەڭ وي سالۋ جانە بيىلعى جۇمىسىمىزعا تىڭ سەرپىن بەرۋ ءۇشىن وتانداس­تارىما جولداعان باستى ۇندەۋىم دەۋگە بولادى». كەلىسەمىز. كەلىسەتىنىمىز – مەملەكەت باسشىسى كەيىنگى جىلداردا قازاق باسىلىمدارىنا كەزەك-كەزەك بەرىپ جۇرگەن (بۇل دا – مەملەكەتتىك تىلگە قۇرمەتتىڭ ءبىر بەلگىسى), داستۇرگە اينالا باستاعان سۇحبات ءپىشىنىن بەلگىلى ءبىر دارەجەدە باعدارلامالىق باعىتقا بۇرا بىلگەن. سوندىقتان دا سۇحبات وتكەن جىلعى تىندىرىلعان ىستەردى تىلگە تيەك ەتە وتىرىپ, الداعى مىندەتتەردى مەجەلەۋىمەن دە قۇندى. ال تىنعان ءىس قىرۋار. ناقتى فاكتى تىلىمەن سويلەيىك. 2024 جىلى قازاقستانعا 15,7 ملرد دوللار كولەمىندە تىكەلەي شەتەل ينۆەستيتسياسى تارتىلعان, بۇل 2023 جىلمەن سالىستىرعاندا 88 پايىزعا ارتىق, ءبىز سولتۇستىك جانە ورتالىق ازياداعى ەڭ جوعارى كورسەتكىشكە قول جەتكىزدىك. زاڭسىز الىنعان اكتيۆتەردى قايتارۋدان مەملەكەت قازىناسىنا 2 ترلن-نان استام تەڭگە تۇسكەن. بيىل 836 شاقىرىمدىق «دوستىق – مويىنتى» تەمىرجولىنىڭ ەكىنشى جەلىسى سالىنىپ بىتەدى. وسىنىڭ ءبارى الەمدە بۇرىن-سوڭدى بولماعان اسا كۇردەلى گەوساياسي احۋا­ل قالىپتاسقان قيلى كەزەڭدە, ەلىمىزگە سىرتقى فاكتورلاردىڭ سالقىنى ءتيىپ تۇرعان تۇستا, ول ازدىق ەتكەندەي, تابيعات اپاتتارى جالعاسىپ جاتقان جىلداردا تىندىرىلىپ جاتىر. ورماننىڭ وتىنا كۇيسەك تە كۇيەلەنبەي, سۋ باسسا دا بالدىرعا باتپاي شىعىپ جاتىرمىز. ويتكەنى «داعدارىس كەزىندە بايبالام سالماي, بايىپتى بولعان ءجون» ەكەنىن ەستەن ەكى ەلى شىعارمايتىن ەلمىز. ويتكەنى بىرلىگى بەرىك, تىرلىگى تياناقتى ەلمىز. بۇرىن-سوڭدى بولىپ كورمەگەن الاپات تاسقىننىڭ ءوزىن-اق الايىقشى. قىركۇيەك ايىندا تاسقىننىڭ زاردابىن جويۋعا ء(ۇي سالۋ, جول توسەۋ, كوپىر, توعان تۇرعىزۋ, وتەماقى تولەۋ, ت.ب.) 300 ملرد تەڭگە جۇمسالعانى, بۇل جۇمىستى قارجىلاندىرۋ جالعاسىپ جاتقانى ايتىلدى. 300 ملرد تەڭگە! قىركۇيەككە دەيىن جۇمسالعان اقشا وسىنداي. ويلاستىرىلماعان وسىنداي وراسان قارجىنى تەز ارادا تابا الاتىن, تاپتىرا الاتىن مەملەكەت – مىقتى مەملەكەت. مۇنى باسىن اشا ايتۋ كەرەك. وتكەن جىلى ەلىمىزدە 27 ملن تونناعا جۋىق استىق جينالدى. بۇل, باياعى ءبىز ۇيرەنگەن ۇعىمعا سالساق, ءبىر جارىم ميلليارد پۇت. قازاقستاندىق ميلليارد پۇت استىق جيناۋ ءۇشىن قاندايلىق بۇكىلحالىقتىڭ مايدان اشىلاتىنىن, سول مايدانعا ستۋدەنتتەرگە دەيىن جۇمىلاتىنىن, رەسپۋبليكامىزعا بۇكىل الىپ ەلدىڭ قيىر-قيىرىنان كومباينشىلار, جۇرگىزۋشىلەر, جاۋىنگەرلەر جابىلا جەتىپ, جانتالاسا جاردەمدەسىپ جاتاتىنىن ۇمىتا قويعان جوقپىز. مۇنىڭ دا باسىن اشىپ ايتۋ كەرەك. جالپى, جەتىستىكتى جازۋ باياعى ناسيحاتشىلىق ناۋقاننىڭ, ۇگىتشىلىك ءۇردىستىڭ سارىنى دەي سالۋ – بەرى قويعاندا جەڭىل ءسوز. جوقتى جوق دەۋ قانداي كەرەك بولسا, باردى بار دەۋ دە سون­داي كەرەك. اسىرەسە بۇكىل الەمدە بيلىك بىتكەنگە سەنىم السىرەپ, جالپاق جۇرتتىڭ سانا­سىنا الەۋجەلى الىمجەتتىك جاساپ تۇرعان ءارلى-بەرلى ۋاقىتتا قوعامدا الەۋمەتتىك ءوپتي­ميزمدى ورنىقتىرۋ – اسا ماڭىزدى مىندەت. سەنىم – ۇلى كۇش. «مەملەكەت باسشىسى بولعان ساتتەن باستاپ قازىرگە دەيىنگى قابىل­داعان شەشىمدەرىم مەن ونىڭ ءتۇرلى سالدارى ءۇشىن بار جاۋاپكەرشىلىكتى ءوز موينىما الامىن. مەن باسقاشا جۇمىس ىستەي المايمىن, ىستەگىم دە كەلمەيدى» دەپ اق جارىلىپ, اقتارىلىپ, ادالىن ايتىپ وتىرعان ازامات­قا, ەلىنە سەنىپ وتىرعان پرەزيدەنتكە سەنەيىك.

قازاننىڭ ء«رۋبينى» ەۋروكۋبوكتىڭ فينالىندا «بارسەلونانىڭ» بەلىن بۇكتىرىپ, ايدى اسپانعا شىعارعان كۇنى سول كەزدەگى تاتارستان باسشىسى مينتەمير شايميەۆ بۇكىل ەلگە ارناعان ءسوزىن «بەز بۋلدىرابىز!» دەپ بىتىرگەن. سول سلوگان كەيىن تاتار ۇلتىنىڭ ۇدايى ۇستانار ۇرانسوزىنە اينالىپ كەتتى, ارۋاقتانىپ, ارقالانىپ العان ەل ەكونوميكادا تالاي تابىسقا جەتتى. سەنىمنەن ايىرىلماساق, ەڭبەكتى ەرەكشە قاستەرلەيتىن ەلگە اينالساق, قازاقستاننىڭ اسقار اسۋلارى ءالى الدا.

پرەزيدەنتتىڭ ۇندەۋدەي ۇلكەن ءسوزى وسىعان سەندىرەدى.

ويداعىمىزدى بولدىرامىز!

ساۋىتبەك ابدراحمانوۆ,

مەملەكەتتىك سىيلىقتىڭ لاۋرەاتى