قاسىم-جومارت توقاەۆ تۇڭعىش پرەزيدەنتتىڭ قىزمەتىن, ونىڭ ەلگە سىڭىرگەن تاريحي ەڭبەگىن ءادىل باعالاۋ قاجەتتىگىن بىرنەشە رەت ايتقان ەدى. وسىعان بايلانىستى قويىلعان سۇراققا بەرگەن جاۋابىندا مەملەكەت باسشىسى كەز كەلگەن داۋىردىڭ جاقسى جاعى دا, كولەڭكەلى تۇستارى دا بار ەكەنىنە نازار اۋداردى.
ء«بىزدىڭ جاڭا تاريحىمىزدا جارقىن ساتتەر الدەقايدا كوپ بولدى. بۇل – اقيقات. سالىستىرمالى تۇردە العاندا, قىسقا مەرزىم ىشىندە مەملەكەتتىگىمىزدىڭ بەرىك تۇعىرى قالىپتاستى, بيلىك ينستيتۋتتارى قۇرىلدى, جاڭا استانامىز بوي كوتەردى, شەكارامىز شەگەندەلىپ, زاڭ جۇزىندە بەكىتىلدى. كوپتەگەن ەلمەن ءتيىمدى قارىم-قاتىناس ورناتىلدى, ەكونوميكاعا شەتەلدەن ينۆەستيتسيا تارتىلدى. وسى جەتىستىكتىڭ ءبارىن جوققا شىعارۋ دۇرىس بولماس ەدى. ءبىز ادىلەتتى مەملەكەت قۇرامىز دەسەك, تاريحقا دا, ونى جاساۋعا اتسالىسقان ازاماتتارعا دا ءادىل قاراۋىمىز كەرەك. مۇنىڭ ءبارى, تۇپتەپ كەلگەندە, ۇلتتىڭ بولاشاعى ءۇشىن قاجەت. وتكەندى وي ەلەگىنەن وتكىزىپ, ونى ءادىل ءارى شىنايى باعالاي الماساق, العا سەنىممەن قادام باسا المايمىز. ساياسي احۋالدىڭ ىقپالىمەن ءوز تاريحىڭدى كوپە-كورىنەۋ بۇرمالاي بەرۋگە بولمايدى. ەل شەجىرەسىن باسىنان باستاپ قايتا جازۋ ءتىپتى قاۋىپتى», دەدى قاسىم-جومارت كەمەل ۇلى.
قاسىم-جومارت توقاەۆ بىرىنشى پرەزيدەنت وتستاۆكاعا كەتكەن العاشقى كەزەڭدەردە ساياسي سىپايلىقتى ساقتاماعان تۇستارىن اشىق ايتتى.
«ارينە, نۇرسۇلتان نازارباەۆ ۇزاق جىل بويى ەل تىزگىنىن ۇستاعان ۋاقىتتا كەمشىلىكتەر بولدى. بىراق ەشتەڭە ىستەمەگەن ادام عانا قاتەلەسپەيدى. اشىعىن ايتۋ كەرەك, ول وتستاۆكاعا كەتكەنىمەن, قاۋىپسىزدىك كەڭەسىنىڭ توراعاسى بولىپ وتىرعان كەزدە ساياسي سىپايىلىقتى ساقتاي بەرمەيتىن. مۇنى دا ايتا كەتكەن ءجون. ۇنەمى پرەمەر-ءمينيستردى, ۇلتتىق بانكتىڭ توراعاسىن, مينيسترلەردى, اكىمدەردى شاقىرىپ الىپ, جينالىس وتكىزەتىن. بۇعان ءوز ازاماتتارىمىزدى بىلاي قويعاندا, شەتەل باسشىلارى مەن ديپلوماتتارى دا تاڭدانا قارايتىن. «نازارباەۆ قىزمەتىنەن كەتكەن سوڭ ءتىپتى جوعارىلادى, ەندى پرەزيدەنت تە وعان باعىنادى» دەگەن ءازىل اڭگىمە دە پايدا بولدى. ال شىن مانىندە, بۇل ازىلدەيتىن جاعداي ەمەس ەدى.
بۇل جاعداي قوسارلانعان بيلىك تۋرالى الىپ قاشپا اڭگىمەنىڭ ءورشۋىنە اكەپ سوقتى. شەنەۋنىكتەر دە كابينەتتەن كابينەتكە جۇگىرءىپ, كىمنىڭ تاپسىرماسىن ورىندايتىنىن بىلمەي دال بولاتىن. ول از دەسەڭىز, كەيبىر شەنەۋنىكتەر «ەلباسى ينستيتۋتى پرەزيدەنت بيلىگىنەن جوعارى تۇرۋعا ءتيىس» دەپ, اقىلعا سىيمايتىن جاعدايدى زاڭ جۇزىندە نەگىزدەمەك بولدى. نۇرسۇلتان نازارباەۆتىڭ 2021 جىلعى قاراشادا وتكەن Astana Club جيىنىندا 92 جاستاعى ماحاتحير موحامادتى مىسالعا كەلتىرىپ, ءوزىنىڭ اقورداعا قايتىپ كەلۋى مۇمكىن ەكەنىن مالىمدەۋىن جانە بۇرىنعى پرەزيدەنتتىڭ سول جىلى جەلتوقسان ايىندا سانكت-پەتەربۋرگ قالاسىندا وتكەن تمد ەلدەرىنىڭ سامميتىنە قاتىسۋىن ناعىز بيلىك داعدارىسىنا اكەپ سوقتىرعان نەگىزگى وقيعالار دەۋگە بولادى. سونىڭ الدىندا عانا جەرگىلىكتى ءبىر ساياساتتانۋشى وعان «ەلباسىنىڭ التىن ءداۋىرىن» قالپىنا كەلتىرۋ ءۇشىن باتىل شارالار قابىلداۋ قاجەتتىگىن ايتىپ, ارانداتۋشىلىق مازمۇنداعى حات جولداعان ەدى», دەدى قاسىم-جومارت كەمەل ۇلى.
جاۋابىن قورىتىندىلاي كەلە مەملەكەت باسشىسى وتكەنگە قاراماستان قازىر پاراساتتىلىق تانىتىپ, نۇرسۇلتان نازارباەۆتىڭ قازاقستانعا سىڭىرگەن تاريحي ەڭبەگىن لايىقتى باعالاۋ كەرەك ەكەنىن تاعى ءبىر اتاپ ءوتتى.
سونداي-اق پرەزيدەنت قاسىم-جومارت توقاەۆ قازىر نۇرسۇلتان نازارباەۆپەن شامامەن ايىنا ءبىر رەت تەلەفون ارقىلى سويلەسىپ تۇراتىنىن ايتتى.
