شىرشانى ساندەۋ ءداستۇرى ەجەلگى تابيعاتقا تابىنۋ كەزەڭىنەن باستاۋ الادى. سولتۇستىك ەۋروپا حالىقتارى ماڭگى جاسىل اعاشتى ءومىر مەن مولشىلىق ءرامىزى دەپ ەسەپتەپ, قىستىڭ ورتاسىندا ۇيلەرىنە اكەلىپ قويعان. XV-XVI عاسىرلاردا بۇل ءداستۇر گەرمانيادا جاڭاشا سيپات الادى. نەمىستەر شىرشانى جەمىس-جيدەك, جاڭعاق جانە ءتاتتى تاعامدارمەن بەزەندىرىپ, ونى قىسقى مەرەكەنىڭ باستى بەلگىسى ساناعان. اڭىز بويىنشا, مارتين ليۋتەر ورمانداعى قار باسقان شىرشالار مەن جۇلدىزداردىڭ جارقىراپ تۇرعانىن كورىپ, ونى ۇيىندە جاساپ كورەدى. كەيىن بۇل ءداستۇر گەرمانيادان ەۋروپانىڭ باسقا ەلدەرىنە تارادى. XIX عاسىردا اعىلشىن پاتشايىمى ۆيكتوريا مەن حانزادا البەرت شىرشانى روجدەستۆونىڭ باستى رامىزىنە اينالدىردى. وسىلايشا شىرشا بەزەندىرۋ ءداستۇرى الەمگە كەڭ تارالىپ كەتكەن.
ەڭ ۇزاق تويلايتىن ەل
تەت مەيرامى – ۆەتنامدىقتاردىڭ مادەنيەتى مەن ءداستۇرىن دارىپتەيتىن, 15 كۇن بويى تويلاناتىن الەمدەگى ەڭ ۇزاق جاڭا جىل مەرەكەسى.
ۆەتنامدا جاڭا جىلدى قارسى الۋ مەرەكەسى – تەت مەيرامى كۇنتىزبەنىڭ العاشقى كۇنىنەن باستالىپ 15 كۇنگە سوزىلادى. بۇل مەيرام جىلدىڭ ەڭ ماڭىزدى ءارى ەرەكشە ۋاقىتى سانالادى. ۆەتنامدىقتار ءۇشىن تەت تەك جاڭا جىلدىڭ باستالۋىن عانا ەمەس, تابيعاتتىڭ جاڭارۋى مەن وتباسىلىق داستۇرلەردى دارىپتەيتىن كەزەڭ بولىپ سانالادى.
